నాలుగేళ్ల చిన్నారిపై వీధి కుక్క దాడి.. ముఖంపై తీవ్ర గాయాలు

హైదరాబాద్ నగరంలో వీధి కుక్కల స్వైరవిహారం మరోసారి రక్తాన్ని చిందించింది. జీహెచ్‌ఎంసీ అధికారులు చర్యలు తీసుకుంటున్నామని చెబుతున్నా.. క్షేత్రస్థాయిలో పరిస్థితి దారుణంగా ఉందనేందుకు ఈ ఘటనే నిదర్శనం. తాజాగా ఖైరతాబాద్ నియోజకవర్గ పరిధిలో ఓ నాలుగేళ్ల చిన్నారిపై వీధి కుక్క విచక్షణారహితంగా దాడి చేసి తీవ్రంగా గాయపరిచింది.

శ్రీనివాస్ నగర్‌కు చెందిన పాక శార్వి అనే నాలుగేళ్ల చిన్నారి సోమవారం సాయంత్రం తన ఇంటి ముందు సరదాగా ఆడుకుంటోంది. ఆ సమయంలో ఎక్కడి నుంచి వచ్చిందో ఏమో కానీ.. ఒక వీధి కుక్క ఒక్కసారిగా పాపపై దాడి చేసింది. చిన్నారి ఏమరుపాటుగా ఉన్న సమయంలో ఆమె ముఖంపై దాడి చేసి కొరికింది. అదే సమయంలో అటుగా వెళ్తున్న ఓ బైక్ వాహనదారుడు సకాలంలో స్పందించి కుక్కను వెళ్లగొట్టడంతో పెద్ద ప్రమాదం తప్పింది. లేదంటే ఆ కుక్క చిన్నారి ప్రాణాలకే ముప్పు తెచ్చి ఉండేదని స్థానికులు చెబుతున్నారు.

కుక్క దాడిలో శార్వి ముఖంపై లోతైన గాయాలయ్యాయి. రక్తసిక్తమైన చిన్నారిని కుటుంబ సభ్యులు హుటాహుటిన బంజారాహిల్స్‌లోని రెయిన్‌బో ఆసుపత్రికి తరలించారు. ప్రస్తుతం వైద్యులు పాపకు అత్యవసర చికిత్స అందిస్తున్నారు. అప్పటివరకు కళ్లముందు ఆడుకున్న తమ బిడ్డ ఇలా ఆసుపత్రి పాలు కావడంతో తల్లిదండ్రులు కన్నీరుమున్నీరవుతున్నారు. చిన్నారి ముఖంపై గాయాలు మానినా.. ఆ మచ్చలు, భయం పాపపై ఎలాంటి ప్రభావం చూపుతాయోనని వారు ఆందోళన చెందుతున్నారు.

ఈ ఘటనతో శ్రీనివాస్ నగర్ వాసులు ఒక్కసారిగా భయాందోళనకు గురయ్యారు. కాలనీలో వీధి కుక్కల సంఖ్య విపరీతంగా పెరిగిపోయిందని, పిల్లలను బయటకు పంపాలన్నా, కనీసం రోడ్లపై నడవాలన్నా భయం వేస్తోందని వారు వాపోతున్నారు. గతంలో కూడా ఇలాంటి దాడులు జరిగాయని.. జీహెచ్‌ఎంసీ అధికారులకు ఎన్నిసార్లు మొరపెట్టుకున్నా పట్టించుకోవడం లేదని వాపోతున్నారు. కుక్కలను పట్టుకెళ్లడం, మళ్లీ ఇక్కడే వదిలేయడం వల్ల సమస్య పరిష్కారం కావడం లేదని స్థానికులు ఆవేదన వ్యక్తం చేస్తున్నారు.

వెంటనే స్థానిక ఎమ్మెల్యే, జీహెచ్‌ఎంసీ ఉన్నతాధికారులు స్పందించి వీధి కుక్కల బెడద నుంచి తమకు శాశ్వత విముక్తి కలిగించాలని కాలనీవాసులు డిమాండ్ చేస్తున్నారు. నగరవ్యాప్తంగా ఇదే పరిస్థితి నెలకొందని.. ఇకనైనా ప్రభుత్వం మేల్కొని కఠిన చర్యలు తీసుకోవాలని నగర ప్రజలు కోరుతున్నారు.