క్యాబ్ డ్రైవర్ భార్య మిస్సింగ్.. 2 రోజుల తర్వాత సోఫా తెరిచి షాకైన భర్త

రెండు రోజులుగా కనిపించకుండా పోయిన మహిళ.. తన ఇంటిలోనే శవమై తేలింది. ఆమె కోసం భర్త రెండు రోజుల పాటు అన్ని చోట్ల గాలించి.. చివరకు సోఫా కమ్ బెడ్‌‌లోనే భార్య మృతదేహాన్ని కనుగొన్నాడు. రెండు రోజుల పాటు ఆయన అదే సోఫాలో నిద్రపోయాడు. ఈ షాకింగ్ ఘటన పుణేలో చోటుచేసుకుంది. పోలీసుల కథనం ప్రకారం.. పుణే హద్పసర్ సమీపంలో హుండేకర్ వాస్తిలో క్యాబ్ డ్రైవర్ ఉమేశ్ పవార్, అతడి భార్య స్వప్నిల్ (24) నివాసం ఉంటున్నారు. రోజులాగే బుకింగ్ రావడంతో కస్టమర్లను తీసుకుని బీడ్ వెళ్లాడు. అక్కడకు వెళ్లిన తర్వాత నవంబరు 7న ఉదయం 10 గంటలకు స్వప్నిల్‌‌కు ఫోన్ చేసి మాట్లాడాడు. తర్వాత రోజు ఆమెకు ఫోన్ చేయగా.. స్విచ్ఛాఫ్ వచ్చింది. పలుసార్లు ప్రయత్నించిన ఉమేశ్... ఆందోళన చెందిన తన స్నేహితుడికి ఫోన్ చేసి ఇంటికి వెళ్లి చూడమని చెప్పాడు. అతడు ఇంటికి వెళ్లి చూడగా ఆమె కనిపించలేదు.

దీంతో అదే రోజు హుటాహుటిన పుణేకు బయలుదేరిన ఉమేశ్ రాత్రి 12.30 గంటలకు చేరుకున్నాడు. అప్పటి నుంచి ఆమె కోసం చుట్టుపక్కలా గాలించాడు. తెలిసివాళ్లు, స్నేహితుల ఇళ్లకు వెళ్లి ఆరా తీశాడు. అయినా ఆమె ఆచూకీ తెలియరాలేదు. శనివారం ఉదయం 7 గంటల సమయంలో విలువైన వస్తువులు కూడా కనిపించకుండాపోయినట్టు గుర్తించారు. దీంతో తన ఇంటిలో ఉన్న సోఫా కమ్ బెడ్‌ స్టోరేజ్‌ను తెరిచి చూసేసరికి అందులో భార్య మృతదేహం చూసి షాకయ్యాడని స్థానిక పోలీస్ అధికారి మంగల్ మోధావే చెప్పారు. ఆమెను గొంతు నులిమి హత్య చేసి ఉంటారని భావిస్తున్నట్టు పేర్కొన్నారు.

దీని గురించి సమాచారం అందున్న పోలీసులు.. అక్కడకు చేరుకుని మృతదేహాన్ని స్వాధీనం చేసుకుని, పోస్ట్‌మార్టం కోసం తరలించారు. ఆమెను గొంతు నులిమి హత్య చేసినట్టు పోస్ట్‌మార్టంలో వెల్లడయ్యింది. హంతకుడు గోటి ముద్రలను కూడా మెడపై గుర్తించారు. తెలిసినే వ్యక్తే ఈ హత్య చేసి ఉంటాడని, వారి అపార్ట్‌మెంట్‌లోకి చొరబడిన ఆనవాళ్లు లేవని డీసీపీ రాజా అన్నారు. ఉమేశ్ పుణేలో లేని సమయంలోనే హత్య జరిగిందన్నారు.

‘ఉమేశ్, స్వప్నిల్‌కు నాలుగేళ్ల కిందటే వివాహం కాగా.. అపార్ట్‌మెంట్‌లో అద్దెకు ఉంటున్నారు.. అక్కడ సెక్యూరిటీ గానీ.. సీసీటీవీ కెమెరాలుగానీ లేవు.. భవనం చుట్టుపక్కల ప్రాంతాల్లోని సీసీటీవీ ఫుటేజ్‌లను పరిశీలిస్తున్నాం’ అని తెలిపారు. అనుమానితుడు తరుచూ ఆ ఫ్లాట్‌కు వచ్చి, చాలా సమయం గడుపుతున్నట్టు పోలీసులు గుర్తించారు. ఈ ఘటనపై కేసు నమోదుచేసిన పోలీసులు.. దర్యాప్తు చేపట్టారు.