ఏకంగా అద్దె ఇంట్లోనే ఆ దుకాణం పెట్టేశాడు.. పోలీసుల మైండ్ బ్లాంక్

ఓ అపార్ట్‌మెంట్‌ వద్దకు వచ్చిన పోలీసులు.. నేరుగా పదో అంతస్తులోకి ఓ ఫ్లాట్‌లో తనిఖీలు చేపట్టారు. దీంతో ఏం జరిగిందో తెలియక ఆ అపార్ట్‌మెంట్ వాసులు ఆందోళనకు గురయ్యారు. చివరకు ఫ్లాట్‌లో అద్దెకు ఉండే వ్యక్తి నిర్వాకం తెలిసి వారంతా అవాక్కయ్యారు. ఫ్లాట్‌నే గార్డెన్‌గా మార్చేసిన అతడు.. రకరకాల పూల మొక్కలను పెంచుతున్నాడు. మరి కుండీల్లో మొక్కలు పెంచితే నేరమా అనుకోకండి. ఆ నర్సరీ మాటున అతడు గంజాయి సాగుచేస్తున్నట్టు తెలిసి పోలీసులే విస్మయానికి గురయ్యారు. పూర్తిగా వికసించిన గంజాయి మొక్కలు, వాటిని పండించడానికి అవసరమైన సామగ్రిని చూసి పోలీసుల కళ్లుబైర్లు కమయ్యాయి. పూల కుండీలో కొన్ని గంజాయిమొక్కలు ఉంటాయని అనుకున్నాం కానీ, మేము ఊహించన దానికి భిన్నంగా వివిధ రకాల గంజాయి రకాలు ఉన్నాయని పోలీసులు చెప్పారంటే అతడి తెలివితేటలు ఏమాత్రమో అర్ధం చేసుకోవచ్చు.

  హాలీవుడ్ సినిమాను తలపించేలా ఉన్న ఈ ఘటన దేశ రాజధాని ఢిల్లీ శివారులోని గ్రేటర్ నొయిడాలో వెలుగులోకి వచ్చింది. నొయిడాలోని పార్శవనాథ్ పనోరమ సొసైటీలోని ఓ అపార్టమెంట్ భవనంలో గంజాయి సాగుచేస్తున్నట్టు సమాచారం రావడంతో పోలీసులు దాడులు చేశారు. పదో అంతస్తులో అద్దెకు ఉంటోన్న రాహుల్ చౌధురి అనే 46 ఏళ్ల వ్యక్తిని అరెస్ట్ చేశారు. ఒంటరిగా ఉంటోన్న అతడు గంజాయి పండించి, దానిని డార్క్ వెబ్‌ ద్వారా అమ్ముతున్నట్టు గుర్తించారు.

గ్రేటర్ నొయిడా డీసీపీ మియా ఖాన్ మాట్లాడుతూ.. గంజాయి పండిస్తోన్న రాహుల్ చౌధురి దానిని కస్టమర్‌కు అమ్మడానికి వెళ్తున్నట్టు సమాచారం వచ్చిందన్నారు. అతడు ఇంటి లోపలే గంజాయి పండిస్తున్నాడని మేము ఊహించలేదని చెప్పారు. మంగళవారం ఉదయం అతడ్ని కంచనార్ ఎస్టేట్‌ సమీపంలో ట్రాప్ చేసి పట్టుకున్నట్టు తెలిపారు. ఉదయం 10.30 గంటల సమయంలో ఓ కస్టమర్‌కు గంజాయి ప్యాకెట్ అందజేస్తుండగా రౌండప్ చేసి అరెస్ట్ చేశామని డీసీపీ అన్నారు.

విచారణలో అతడు ఏ విధంగా గంజాయి సాగు చేస్తున్నదీ వివరించాడు. అతడు అద్దెకు ఉండే ఫ్లాట్‌లో 12 మందికిపైగా పోలీసులు వెళ్లి తనిఖీలు చేపట్టారు. అందులో రూ.50 నుంచి 60 లక్షల విలువ చేసే దాదాపు 80 వరకు గంజాయి మొక్కలు, ఓజీ, పలు రసాయనాలు, పురుగు మందులు, విత్తనాలు లభ్యమయ్యాయి. గంజాయి మొక్కలకు నెంబర్లు వేసి.. కృత్రిమ కాంతి, గది ఉష్ణోగ్రతను నియంత్రించేలా ఏసీ ఏర్పాటు చేశాడు.

‘ఇంగ్లిష్‌లో పీజీ పూర్తిచేసిన తర్వాత నొయిడాలో ఓ ఈటరీ నిర్వహించిన నిందితుడు రాహుల్ చౌధురి.., కోవిడ్ సమయంలో దానిని మూసివేశాడు. అతను డార్క్ వెబ్‌ను అన్వేషించడం, సినిమాలు చూడటం, గంజాయి సాగుపై పుస్తకాలు చదవడం ప్రారంభించాడు’ అని డీసీపీ అన్నారు. యూపీలోని మీరట్‌కు చెందిన అతడికి భార్య, ఇద్దరు పిల్లలు ఉన్నారని, ప్రస్తుతం వారికి దూరంగా ఉంటున్నాడని చెప్పారు. గంజాయి విత్తనాలను సీడ్సమెన్ అనే విదేశీ వెబ్‌సైట్ నుంచి ఆన్‌లైన్‌లో ఆర్డర్ చేసి, పేపాల్ యాప్ ద్వారా వారికి చెల్లించినట్టు వివరించారు.

ఒక్కో గంజాయి మొక్క పెంచడానికి రూ.5 నుంచి రూ.6 వేలు ఖర్చుచేసి.. ఒక్కో దాన్ని రూ.50 నుంచి రూ.60 వేలుకు అమ్ముతున్నాడని డీసీ ఖాన్ వెల్లడించారు. కస్టమర్లకు డార్క్ వెబ్ ద్వారా సరఫరా చేస్తున్నట్టు విచారణలో వెల్లడించారు. సోదాల సమయంలో 2.07 గ్రాములు గంజాయి, 164 గ్రాములు ఓజీని స్వాధీనం చేసుకున్నారు. అతడిపై కేసు నమోదుచేసి, కోర్టు ముందు హాజరుపరిచినట్టు పోలీసులు తెలిపారు.