జార్ఖండ్‌‌లో తొలి దశ ఎన్నికలు.. ఒంటి గంట వరకు 46% పోలింగ్ నమోదు

జార్ఖండ్‌ శాసనసభ ఎన్నికల తొలి దశతో పాటు కాంగ్రెస్ నాయకురాలు ప్రియాంకా గాంధీ పోటీ చేస్తోన్న కేరళలోని వయనాడ్ పార్లమెంట్ ఉపఎన్నికకు పోలింగ్‌ బుధవారం ఉదయం 7 గంటలకు ప్రారంభమైంది. మొత్తం 81 స్థానాలున్న ఝార్ఖండ్‌లో రెండు విడతల్లో ఎన్నికలు జరుగుతోన్న విషయం తెలిసిందే. నేడు మొదటి విడతలో 15 జిల్లాల్లోని 43 అసెంబ్లీ నియోజకవర్గాల్లో ఓటింగ్ నిర్వహిస్తున్నారు. మొదటి దశలో 683 మంది అభ్యర్థుల భవితవ్యాన్ని ఓటర్లు తేల్చనున్నారు. మొత్తం 15,344 పోలింగ్ కేంద్రాలను ఏర్పాటు చేయగా.. 1.37 కోట్ల మంది తమ ఓటు హక్కును వినియోగించుకోనున్నారు.

  జార్ఖండ్‌లో మధ్యాహ్నం ఒంటి గంట వరకు 46 శాతం పోలింగ్ నమోదైంది. ఈ దశలో మాజీ సీఎం చంపయీ సోరెన్, అతడి కుమారుడు బాబూలాల్ సోరెన్ కాంగ్రెస్‌ నేత బన్నా గుప్తా, రాజ్యసభ సభ్యుడు మహువా మాఝీ, మాజీ సీఎం మధు కోడా సతీమణి గీతా కోడా, మాజీ సీఎం అర్జున్ ముండా భార్య మీరా ముండా, మాజీ సీఎం రఘుబర్‌దాస్‌ కోడలు పూర్ణిమా దాస్‌ లాంటి ప్రముఖులు తమ అదృష్టాన్ని పరీక్షించుకుంటున్నారు.

రాహుల్ గాంధీ రాజీనామాతో ఉపఎన్నిక జరుగుతోన్న వయనాడ్‌ లోక్‌సభ స్థానం నుంచి ఆయన సోదరి ప్రియాంకా గాంధీ బరిలో ఉన్నారు. ప్రత్యక్ష ఎన్నికల్లో ప్రియాంక పోటీచేయడం ఇదే మొదటిసారి. దీంతో యావత్తు దేశం ఈ ఎన్నికపై ఎంతో ఆసక్తి ప్రదర్శిస్తోంది. వీటితో పాటు దేశవ్యాప్తంగా 10 రాష్ట్రాల్లోని మరో 31 అసెంబ్లీ నియోజకవర్గాల ఉప ఎన్నికలకు పోలింగ్ జరుగుతోంది. రాజస్థాన్‌లో ఏడు, పశ్చిమ్ బెంగాల్‌లో ఆరు, అసోంలో ఐదు, బిహార్ నాలుగు, కర్ణాటకలో మూడు, మధ్యప్రదేశ్‌లో రెండు, మేఘాలయ, గుజరాత్, ఛత్తీస్‌గఢ్ ఒక్కొక్కటి చొప్పున ఉన్నాయి. వాస్తవానికి 33 స్థానాలకు నవంబరు 13న పోలింగ్ జరగాల్సి ఉండగా.. సిక్కింలోని రెండు అసెంబ్లీ స్థానాలు ఏకగ్రీవం కావడంతో అక్కడ పోలింగ్ జరగడం లేదు.

జార్ఖండ్ విషయానికి వస్తే తొలిదశ పోలింగ్ జరుగుతోన్న 43 స్థానాల్లో అధికార ఇండియా కూటమి, ప్రతిపక్ష ఎన్డీయే మధ్య ప్రధాన పోటీ ఉంది. జేఎంఎం 23, కాంగ్రెస్ 17, ఆర్జేడీ 5 చోట్లు పోటీ చేస్తుండగా.. ప్రతిపక్ష ఎన్డీయేలోని బీజేపీ 36, జేడీయూ 2, ఝార్ఖండ్ స్టూడెంట్స్ యూనియన్ 5 స్థానాల్లో ఉన్నాయి. మాయవతి పార్టీ బీఎస్పీ 7 చోట్ల బరిలో నిలిచింది.

వరుసగా రెండోసారి అధికారం కోసం జేఎంఎం-కాంగ్రెస్ కూటమి, ఐదేళ్ల తర్వాత అధికారం చేజిక్కించుకోడానికి ఎన్డీయే తీవ్రంగా కృషిచేస్తున్నాయి. మియాన్ సమ్మన్ యోజన సహా ప్రజాకర్షక పథకాలపై ఇండియా కూటమి ఆశలు పెట్టుకుంటే.. బీజేపీ సారథ్యంలోని ఎన్డీయే.. బంగ్లాదేశ్ చొరబాట్లు, అవినీతి అస్త్రాన్ని ప్రయోగిస్తోంది. మరి ఎవరిని ఓటర్లు ఆదరిస్తారు అనేది నవంబరు 23న తేలిపోనుంది.

గత ఎన్నికల్లో జేఎంఎం 30, కాంగ్రెస్ 15, ఆర్జేడీ 2 స్థానాలు గెలిచి సాధారణ మెజార్టీ కంటే ఎక్కువ సంఖ్యా బలంతో ప్రభుత్వాన్ని ఏర్పాటుచేశాయి. అక్కడ రెండో దశలో 48 సీట్లకు పోలింగ్ నవంబరు 20న జరగనుంది.