అల్లు అర్జున్ పుష్ప 2 సినిమాపై అంబటి సంచలన వ్యాఖ్యలు

వైసీపీ నేత, మాజీ మంత్రి అంబటి రాంబాబు స్టైలే వేరు. రాజకీయాలతో పాటుగా సమకాలీన అంశాల మీద ఆయన ఎప్పటికప్పుడు స్పందిస్తూ ఉంటారు. మీడియా ముఖంగా కాకపోయినా.. సామాజిక మాధ్యమాల ద్వారా అయినా తన అభిప్రాయాన్ని వ్యక్తపరుస్తూ ఉంటారు. అయితే తాజాగా అల్లు అర్జున్ హీరోగా నటించిన పుష్ప 2 సినిమా గురించి అంబటి రాంబాబు మాట్లాడారు. ప్రస్తుతం దేశవ్యాప్తంగా పుష్ప 2 చర్చ జరుగుతున్న సంగతి తెలిసిందే. ట్రైలర్ రిలీజ్ తర్వాత ఈ సినిమాపై అంచనాలు అమాంతం పెరిగిపోయాయి. ఇక డిసెంబర్ 5 ఎప్పుడొస్తుందా.. థియేటర్లలో ఎప్పుడు పుష్ప 2 సినిమా హంగామా చూద్దామా అని ప్రేక్షకులు అందరూ ఆసక్తిగా ఉన్నారు. ఈ క్రమంలోనే మాజీ మంత్రి అంబటి రాంబాబు పుష్ప 2 సినిమా గురించి కీలక వ్యాఖ్యలు చేశారు.

విలేకర్లతో మాట్లాడుతున్న సమయంలో అంబటి రాంబాబు పుష్ప 2 సినిమా గురించి మాట్లాడారు. పుష్ప సినిమాతో అల్లు అర్జున్ హాలీవుడ్ రేంజుకు ఎదిగాడన్న అంబటి రాంబాబు.. అదే కొందరికి కడుపుమంటగా మారిందన్నారు. పుష్ప 2 కోసం తాను కూడా ఎదురుచూస్తున్నానన్న అంబటి.. ఎన్ని దుష్ప్రచారాలు చేసినా పుష్ప 2 మూవీని ఆపలేరన్నారు. అరచేతిని అడ్డుపెట్టి సూర్యుడిని అడ్డుకోవటం ఎవరి తరమూ కాదంటూ సంచలన వ్యాఖ్యలు చేశారు. గతంలో జూనియర్ ఎన్టీఆర్ సినిమాను చూడకుండా బహిష్కరించాలని ప్రయత్నించారన్న అంబటి రాంబాబు.. ఆయినా కూడా ఆపలేకపోయారన్నారు. అలాగే అల్లు అర్జున్ సినిమాను ఆపాలని చూస్తే ప్రజలు అంగీకరించని అంబటి రాంబాబు అన్నారు. బాగున్న సినిమా ఏదైనా ప్రజలు చూస్తారని అభిప్రాయపడ్డారు.

పుష్ప 2 సినిమాపై అంబటి రాంబాబు సంచలన వ్యాఖ్యలు

సినిమా బాగుందంటే రాజబాబు హీరోగా నటించిన సినిమాను కూడా గతంలో తాము చూశామన్న అంబటి రాంబాబు.. బాగా లేకపోతే ఎన్టీరామారావు నటించిన సినిమాలను కూడా జనం తిరస్కరించిన సంగతిని గుర్తు చేశారు. వెధవ పోకడలకు పోయి పుష్ప2 సినిమాను ఆపలేరని.. అరచేతిని అడ్డుపెట్టి సూర్యకాంతిని అడ్డుకోలేరని అంబటి రాంబాబు కీలక వ్యాఖ్యలు చేశారు. అల్లు అర్జున్, జూనియర్ ఎన్టీఆర్ సహా హీరోలు ఎవరైనా సినిమా బాగుంటేనే ప్రజలు చూస్తారన్న అంబటి రాంబాబు.. బాగాలేకపోతే ఎవరి సినిమా అయినా చూడరని అన్నారు.

పుష్ప 2 సినిమా చూడ్డానికి అందరూ ఉవ్విళ్లూరుతున్నారని.. తాను కూడా సినిమా కోసం ఎదురుచూస్తున్నానని అంబటి రాంబాబు అన్నారు. పుష్ప 2 మూవీని థియేటర్లో చూడాలనే కోరికగా ఉందని అంబటి చెప్పుకొచ్చారు. పుష్ప పార్ట్ 1 హాలీవుడ్ రేంజులో ఉందని.. అందరినీ తలదన్నే రేంజులో అల్లు అర్జున్ వెళ్లాడన్న అంబటి రాంబాబు.. దీంతో కొంతమందికి జెలసీగా ఉందంటూ సంచలన వ్యాఖ్యలు చేశారు,