పాదచారులపైకి దూసుకెళ్లిన ఆర్టీసీ బస్సు.. ఆరుగురు మృతి, 49 మందికి గాయాలు

దేశ ఆర్థిక రాజధాని ముంబయి నగరంలో మున్సిపల్ కార్పొరేషన్ రోడ్డు రవాణా సంస్థకు చెందిన బస్సు బీభత్సం సృష్టించింది. కుర్లా వెస్ట్‌లో అదుపుతప్పి పాదచాారులు, వాహనాలపైకి దూసుకెళ్లింది. ఈ ప్రమాదంలో కనీసం నలుగురు ప్రాణాలు కోల్పోగా.. మరో 29 మంది గాయపడ్డారు. సోమవారం రాత్రి 10 గంటల సమయంలో అతివేగంతో వచ్చి ఆర్టీసీ బస్సు.. బ్రేక్‌లు ఫెయిల్ అవ్వడంతో తొలుత ఆటో రిక్షాను ఢీకొట్టడం.. తర్వాత పలు వాహనాలపై దూసుకెళ్లడం సీసీటీవీ కెమెరాల్లో రికార్డయ్యింది. బృహన్ ముంబయి ఎలక్ట్రిక్ సప్లయ్ అండ్ ట్రాన్స్‌పోర్ట్ (బెస్ట్)కు చెందిన బస్సు కుర్లా స్టేషన్ నుంచి అంధేరికీ వెళ్తుండగా బ్రేక్‌లు ఫెయిల్ కావడంతో ప్రమాదం జరిగినట్టు మున్సిపల్ కార్పొరేషన్‌ అధికారులు తెలిపారు.

అతివేగమే ప్రమాదానికి కారణమని, వాహనంపై డ్రైవర్ నియంత్రణ కోల్పోవడంతో అదుపుతప్పి వాహనాలు, పాదచారులను ఢీకొట్టిందని చెప్పారు. అనంతరం ఓ రెసిడెన్షియల్ కాంప్లెక్స్ గేటును ఢీకొట్టాడని అన్నారు.

ప్రమాదంపై తక్షణమే స్పందించిన ట్రాఫిక్ పోలీసులు.. బాధితులను చికిత్స కోసం కుర్లా, సియాన్ ఆసుపత్రులకు తరలించారు. ముంబయిలో రవాణా వ్యవస్థ మొత్తం బెస్ట్ ఆధ్వరంలోనే ఉంటుంది. నగర శివారులు, చుట్టుపక్కల ప్రాంతాలకు సైతం బస్సులను నడుపుతుంది.

ప్రత్యక్ష సాక్షుల ప్రకారం బెస్ట్ బస్సు ప్రమాదానికి ముందు 200 మీటర్ల మేర దూసుకుపోయింది. జైద్ అహ్మద్ అనే 26 ఏళ్ల యువకుడు మాట్లాడుతూ.. తాను రైల్వే స్టేషన్‌కు వెళ్లడానికి ఇంటి నుంచి బయలుదేరుతుండగా భారీ శబ్దం వచ్చిందన్నారు. ‘అక్కడకు వెళ్లి చూసేసరికి బెస్ట్ బస్సు పాదచారులు, ఆటో, మూడు కార్లు సహా పలు వాహనాలను ఢీకొట్టింది.. పలు మృతదేహాలు అక్కడ పడి ఉన్నాయి.. గాయాలతో ఆటోలో ఉన్నవారిని బయటకు తీసి చికిత్స కోసంం బహబహ ఆసుపత్రికి తరలించాం.. సహాయక కార్యక్రమాల్లో నా స్నేహితులు కూడా సాయం చేశారు’ అని అహ్మద్ తెలిపారు. పోలీస్ వాహనాలను కూడా బస్సు ఢీకొట్టిందని చెప్పారు.