నేరుగా మనుషులపైకి దూసుకెళ్లిన ట్రక్.. అత్తాకోడళ్లు సహా స్పాట్‌లోనే ముగ్గురు మృతి!

అర్ధరాత్రి బస్సు ఎక్కిన అత్తాకోడళ్లు ఇద్దరూ సురక్షితంగా తమ గమ్యస్థానానికి చేరుకున్నారు. అయితే అప్పటి వరకు హాయిగా ఆద మరిచి నిద్రపోయిన వాళ్లు తాము దిగాల్సిన స్టేషన్ రాగానే బస్సు దిగారు. హెల్పర్ సాయంతో బస్సు వెనకాల పెట్టిన తమ లగేజీ తీసుకుంటున్నారు. అయితే అంతలోనే వారి పైకి ఓ ట్రక్ దూసుకువచ్చి వారి ప్రాణాలు తీసింది. దేశరాజధాని ఢిల్లీలోని NH-48 రోడ్డుపై ఓ ట్రక్ బీభత్సం సృష్టించి అమాయకులైన ముగ్గురు ప్రాణాలు బలిగొంది.

ఢిల్లీలోని వసంత్‌కుంజ్ సమీపంలో సోమవారం తెల్లవారుజామున ఆగి ఉన్న బస్సు వెనుక నుంచి ఓ ఇద్దరు మహిళలు తమ లగేజీ తీసుకుంటున్నారు. బస్సు హెల్పర్ వారికి సాయం చేస్తుండగా.. 4.45 గంటల సమయంలో వెనుక నుంచి వేగంగా వచ్చిన ఓ ట్రక్కు నేరుగా వారిపైకి దూసుకెళ్లింది. అక్కడికక్కడే ఆ ముగ్గురు చనిపోయారు. విషయం గుర్తించిన బస్సు ప్రయాణికులు వెంటనే బస్సు దిగి వచ్చి వారిని బయటకు తీశారు. అయితే అప్పటికే వారు ప్రాణాలు కోల్పోయినట్లు తెలుసుకుని పోలీసులకు సమాచారం అందించారు.

హుటాహుటిన సంఘటనా స్థలానికి చేరుకున్న పోలీసులు మృతదేహాలను పోస్టుమార్టం నిమిత్తం స్థానిక ప్రభుత్వ ఆస్పత్రికి తరలించారు. అలాగే ప్రమాదానికి కారణం అయిన ట్రక్‌లో డ్రైవర్ తీవ్ర గాయాల పాలవడం గుర్తించి.. అతడిని కూడా ఆస్పత్రికి పంపించారు. అతడి పర్సులో ఉన్న వివరాల ప్రకారం ఇతడు 25 ఏళ్ల తోఫిక్ అని గుర్తించారు. అయితే మృతి చెందిన ముగ్గురిలో ఇద్దరు అత్తాకోడళ్లు.. 50 ఏళ్ల కాంతాదేవి, 19 ఏళ్ల నిధిగా పోలీసులు కనుగొన్నారు. అలాగే వీరు ఉత్తర ప్రదేశ్‌కు చెందిన వాళ్లుగా గుర్తించారు. ఈ ఘటనలో చనిపోయిన మరో వ్యక్తి బస్సు హెల్పర్ అయిన 19 ఏళ్ల అభిషేక్ అని వెల్లడించారు.

అయితే ప్రమాదానికి కారణం అతివేగం, రాష్ డ్రైవింగ్ అని పోలీసులు అనుమానిస్తున్నారు. ముఖ్యంగా స్థానికులు చెప్పిన వివరాల చూస్తే అతివేగంతో పాటు నిర్లక్ష్యంగా తోఫిక్ వాహనాన్ని తోలి ఉంటారని భావిస్తున్నారు. అది ఎంత వరకు నిజమో తెలుసుకునేందుకు స్థానికంగా ఉన్న సీసీటీవీ ఫుటేజీలను గమనిస్తున్నారు. ఒకవేళ అతివేగమే ప్రమాదానికి కారణం అని తెలిస్తే.. ట్రక్ డ్రైవర్ తోఫిక్‌పై ర్యాష్ డ్రైవింగ్ కేసు నమోదు చేస్తామని పోలీసులు స్పష్టం చేశారు.