ఇండియా కూటమిలో నాయకత్వ చిచ్చు.. రాహుల్‌గాంధీని కాదని మమతా బెనర్జీకి మద్దతు

లోక్‌సభ ఎన్నికల్లో దేశంలో భారీగా సీట్లు సాధించి బీజేపీ నేతృత్వంలోని ఎన్డీఏ కూటమికి గట్టి పోటీ ఇచ్చిన విపక్ష ఇండియా కూటమి.. ఆ తర్వాత జరిగిన హర్యానా, మహారాష్ట్ర అసెంబ్లీ ఎన్నికల్లో ఘోర పరాజయాన్ని మూటగట్టుకుంది. అయితే ఈ రెండు రాష్ట్రాల్లో కాంగ్రెస్ పార్టీ అనుసరించిన వైఖరి కారణంగానే ఇండియా కూటమికి విజయం దక్కలేదనే విమర్శలు వెల్లువెత్తాయి. అయితే ఇండియా కూటమిలోని పార్టీలు నేరుగా కాంగ్రెస్ పార్టీని టార్గెట్ చేసి విమర్శలు గుప్పిస్తుండటం తీవ్ర సంచలనంగా మారింది. ఈ నేపథ్యంలోనే ఇండియా కూటమిలో కొత్తగా ఇప్పుడు నాయకత్వ చిచ్చు రేగింది. కాంగ్రెస్ పార్టీని కాకుండా ఇండియా కూటమికి తృణముల్ కాంగ్రెస్ పార్టీ నేతృత్వం వహించాలని కూటమిలోని పలు పార్టీలు మమతా బెనర్జీకి మద్దతు తెలుపుతుండటం హస్తం పార్టీకి మింగుడు పడటం లేదు. అయితే రోజురోజుకూ దీదీకి.. ఇండియా కూటమిలోని పార్టీల మద్దతు పెరుగుతుండటం కాంగ్రెస్ పార్టీకి చెక్ పెడుతున్నట్లయింది. నరేంద్ర మోదీని ఎదుర్కొనేందుకు రాహుల్ గాంధీ కాకుండా మమతా బెనర్జీ సరైన వ్యక్తి అని కూటమి నేతలు అభిప్రాయపడుతున్నారు.

2014 నుంచి వరుసగా గెలుస్తూ వస్తున్న నరేంద్ర మోదీ నేతృత్వంలోని ఎన్డీఏ కూటమిని ఎలాగైనా 2024 లోక్‌సభ ఎన్నికల్లో ఓడించాలనే లక్ష్యంతో కాంగ్రెస్ పార్టీ సహా దేశంలోని దాదాపు 30 పార్టీలు గతేడాది ఇండియా కూటమిగా (ఇండియన్ నేషనల్ డెవలప్‌మెంటల్ ఇన్‌క్లూజివ్ అలయన్స్) ఏర్పడ్డాయి. అయితే ఇండియా కూటమి ఏర్పాటుకు కృషి చేసిన బీహార్ సీఎం, జేడీయూ అధినేత నితీష్ కుమార్.. అందరికీ షాక్ ఇస్తూ ఎన్డీఏలో చేరారు. ఆ తర్వాత జేడీయూ లేకుండానే ఎన్డీఏ కూటమికి వ్యతిరేకంగా ఈ ఏడాది జరిగిన లోక్‌సభ ఎన్నికల్లో పోటీ చేసిన ఇండియా కూటమి బీజేపీకి సొంతంగా మెజార్టీ రాకుండా అడ్డుకోగలిగినా.. హ్యాట్రిక్ ప్రధానమంత్రిగా నరేంద్ర మోదీని ఆపడంలో మాత్రం విఫలం అయింది. మిత్రపక్షాల మద్దతుతో మోదీ మూడోసారి ప్రధానమంత్రిగా బాధ్యతలు చేపట్టారు. అయితే అధికారం దక్కకపోయినా.. ఇండియా కూటమి గతం కంటే భారీగానే పుంజుకున్నాయి.

అయితే లోక్‌సభ ఎన్నికల తర్వాత జరిగిన హర్యానా, మహారాష్ట్ర అసెంబ్లీ ఎన్నికల్లో ఇండియా కూటమికి ఘోర పరాజయం దక్కింది. హర్యానాలో ఎగ్జిట్ పోల్స్ అంచనాలను తలకిందులు చేస్తూ బీజేపీ విజయం సాధించగా.. మహారాష్ట్రలో ఊహించిన స్థానాల కంటే భారీగా సీట్లు పడిపోయాయి. దీంతో ఇండియా కూటమిలోని పార్టీలన్నీ కాంగ్రెస్ పార్టీ వైఫల్యాలను ఎండగట్టాయి. ఈ క్రమంలోనే ఇండియా కూటమిలో కాంగ్రెస్ పార్టీ నాయకత్వానికి వ్యతిరేకంగా గళం విప్పేవారి సంఖ్య రోజురోజుకూ పెరుగుతోంది. ఇప్పటికే తృణముల్ కాంగ్రెస్ పార్టీ, ఆమ్ ఆద్మీ పార్టీ, సమాజ్‌వాదీ పార్టీ, శివసేన ఉద్ధవ్ ఠాక్రే పార్టీ, ఆర్జేడీలు కాంగ్రెస్ నాయకత్వాన్ని వ్యతిరేకిస్తున్నాయి. అదే సమయంలో టీఎంసీ అధినేత్రి, పశ్చిమ బెంగాల్ ముఖ్యమంత్రి మమతా బెనర్జీ కూటమికి నాయకత్వం వహించాలనే డిమాండ్లు వినిపిస్తున్నాయి. అయితే ఈ డిమాండ్లను కాంగ్రెస్ పార్టీ ఖండిస్తోంది.

అవకాశం వస్తే ఇండియా కూటమిని నడపడానికి తాను సిద్ధంగా ఉన్నానని ఇటీవల మమతా బెనర్జీ చేసిన వ్యాఖ్యలు దేశం మొత్తం తీవ్ర చర్చనీయాంశంగా మారాయి. దీంతో మమతా బెనర్జీకి ఇండియా కూటమిలో పార్టీలు మద్దతు పలుకుతున్నాయి. సమాజ్‌వాదీ పార్టీ అధినేత అఖిలేష్ యాదవ్.. శరద్ పవార్ ఎన్సీపీ, ఉద్ధవ్ ఠాక్రే శివసేన, ఆమ్ ఆద్మీ పార్టీ నేతలు దీదీకి మద్దతుగా వ్యాఖ్యల చేస్తున్నారు. ఇప్పటివరకు కాంగ్రెస్‌ పార్టీకి అన్ని విషయాల్లో మద్దతు పలికిన ఆర్జేడీ అధ్యక్షుడు లాలూప్రసాద్‌ యాదవ్‌ కూడా మమతా బెనర్జీకి సపోర్ట్ చేయడం గమనార్హం.

ఆయా రాష్ట్రాల ఎన్నికల్లో పశ్చిమ బెంగాల్‌ కాకుండా గోవా, త్రిపుర, మేఘాలయ, అస్సాం, నాగాలాండ్, అరుణాచల్‌ ప్రదేశ్ లాంటి రాష్ట్రాల్లో టీఎంసీ ప్రభావం ఏమీ లేదంటూ కాంగ్రెస్‌ పార్టీ చేసిన వ్యాఖ్యలను లాలూప్రసాద్ యాదవ్ ఖండించారు. ఇండియా కూటమిని మమతా బెనర్జీ నడపగలదని.. ఆమెకు నాయకత్వం ఇవ్వాలని లాలూ వ్యాఖ్యానించారు. ఇక లాలూ ప్రసాద్ యాదవ్ కుమారుడు, బీహార్ మాజీ డిప్యూటీ సీఎం తేజస్వీ యాదవ్‌ కూడా మమతా బెనర్జీకి ఇండియా కూటమి పగ్గాలు అప్పగించడంపై తమకు ఎలాంటి అభ్యంతరం లేదని తెలిపారు.

ఇక ఆంధ్రప్రదేశ్‌లో అధికారంలో ఉన్నపుడు బీజేపీకి, ఎన్డీఏకు అన్ని విషయాల్లో మద్దతుగా ఉన్న వైసీపీ కూడా ఇప్పుడు మమతా బెనర్జీకి మద్దతుగా వ్యాఖ్యలు చేయడం విశేషం. పార్లమెంటు బయట మీడియాతో మాట్లాడిన వైసీపీ రాజ్యసభ ఎంపీ వైఎస్ విజయసాయిరెడ్డి.. 42 లోక్‌సభ సీట్లు ఉన్న పెద్ద రాష్ట్రానికి ముఖ్యమంత్రిగా ఉన్న మమతా బెనర్జీ ఇండియా కూటమిని నడపడానికి సరైన వ్యక్తి అని తెలిపారు. దీంతో ఏపీలో అధికారంలో ఉన్న టీడీపీ-జనసేన-బీజేపీ కూటమి ఎన్డీఏ కాగా.. ప్రతిపక్ష ఇండియా కూటమి వైపు.. దగ్గరయ్యేందుకు వైసీపీ అధినేత వైఎస్ జగన్ మోహన్‌రెడ్డి ప్రయత్నాలు చేస్తున్నారని రాజకీయ వర్గాల్లో తీవ్ర చర్చ జరుగుతోంది.