ట్రెండింగ్
Epaper    English    தமிழ்

బరువు తగ్గడం కోసం ఏం తినాలో ఐడియా లేదా

Life style |  Suryaa Desk  | Published : Mon, Feb 03, 2025, 11:31 PM

ఈ రోజుల్లో చాలా మంది అధిక బరువు, ఊబకాయం సమస్యలతో బాధపడుతున్నారు. చిన్నా, పెద్దా తేడా లేకుండా చాలా మంది ఈ సమస్యతో బాధపడుతున్నారు అయితే, బరువు తగ్గడం కోసం చాలా మంది రకరకాల ప్రయత్నాలు చేస్తున్నారు. కొందరు ఆహారంలో మార్పులు చేసుకుంటే.. మరికొందరు జిమ్‌లు చుట్టూ తిరుగుతున్నారు. అయితే, చాలా మందిలో ఎక్కువ మార్పు కనిపించడం లేదు. ఎన్ని ప్రయత్నాలు చేసినా బరువు తగ్గలేకపోతున్నారు. ఇందుకు కొన్ని తప్పులు, పాటించే పద్దతుల్లో తేడాలు కారణం కావచ్చు.


అధిక బరువు వల్ల శారీరక రూపం ప్రభావితం అవ్వడమే కాకుండా అధిక రక్తపోటు, గుండె జబ్బులు, మధుమేహం, అధిక కొలెస్ట్రాల్ వంటి సమస్యలు రావచ్చు. బరువు తగ్గడం కోసం ప్రతి ఒక్కరూ కఠినమైన వ్యాయామాలు చేయకపోయినా సరైన ఆహారపు అలవాట్లు, జీవనశైలిలో చిన్న మార్పులు చేసుకోవడం ద్వారా అధిక బరువును నియత్రించుకోవచ్చు. డైటీషియన్ నిపుణుల ప్రకారం ఎఫెక్టివ్ డైట్ ప్లాన్ ఒకటి ఉంది. ఈ డైట్ ప్లాన్ ఫాలో అయితే బరువు తగ్గించుకోవచ్చంటున్నారు. ఆ ప్లాన్ ఏంటో ఇక్కడ తెలుసుకుందాం.


నిద్రలేవగానే చేయాల్సిన పనులు


ఉదయం నిద్రలేచిన వెంటనే ఒక గ్లాసు గోరువెచ్చని నీటిలో నిమ్మ, ఉసిరి లేదా జీలకర్ర కలిపి తాగడం మంచిది. లేదంటే కనీసం ఒక అరలీటర్ గోరువెచ్చని నీరు తాగాలి. ఆ తర్వాత ఐదు నానబెట్టిన బాదం పప్పుల్ని తినండి. ఇది శరీరాన్ని డిటాక్సిఫై చేస్తుంది. జీవక్రియను వేగవంతం చేస్తుంది. శరీరంలోని టాక్సిన్లను బయటకు పంపిస్తుంది. ఆ తర్వాత తేలికపాటి వ్యాయామం, యోగా లేదా 30 నుంచి 45 నిమిషాల పాటు నడవండి. వాకింగ్ వెయిట్ లాస్‌కి మంచి ఆప్షన్ అంటారు నిపుణులు.


బ్రేక్‌ఫాస్ట్


​అల్పాహారం లేదా బ్రేక్‌ఫాస్ట్‌లో తక్కువ కొవ్వు, అధిక ప్రోటీన్ కలిగిన ఆహారాన్ని భాగం చేసుకోండి. ఇందులో ఓట్స్, వెజిటబుల్ సలాడ్, స్ప్రౌట్స్ సలాడ్(మొలకెత్తిన గింజలతో సలాడ్), స్టీమ్ ఇడ్లీ, ఉప్మా లేదా గంజి ఉండవచ్చు. ఈ అల్పాహారం తినడం వల్ల చాలా సేపు పొట్ట నిండుగా ఉంటుంది. దీంతో ఆకలి నియంత్రణలో ఉంటుంది. అంతేకాకుండా వీటిని తినడం వల్ల శరీరానికి కావాల్సినంత శక్తి కూడా లభిస్తుంది. కావాలంటే.. ఆపిల్, బొప్పాయి, నారింజ లేదా పియర్ వంటి తాజా సీజనల్ పండ్లను బ్రేక్‌ఫాస్ట్‌లో భాగం చేసుకోవచ్చు.


మధ్యాహ్న భోజనం


భోజనానికి ముందు ఒక గ్లాసు గోరువెచ్చని నీరు తాగండి. ఆ తర్వాత దోసకాయ, క్యారెట్, ముల్లంగితో కూడిన సలాడ్ ఒక గిన్నె తినండి. ఓ అరగంట తర్వాత ప్రధాన భోజనంలో 100 గ్రాముల బ్రౌన్ రైస్, పప్పులు, ఆకుపచ్చ కూరగాయలు (బంగాళదుంపలు లేకుండా), కొవ్వు రహిత పెరుగు ఉండేలా చూసుకోండి. మీరు నాన్ వెజ్ తింటే, వారానికి రెండుసార్లు 100 గ్రాముల గ్రిల్డ్ చికెన్ లేదా ఫిష్ తినండి. గుడ్డులోని తెల్లసొన కూడా బెస్ట్ ఆప్షన్.


సాయంత్రం


సాయంత్రం పూట నిమ్మకాయ, తేనె కలిపిన గ్రీన్ టీని త్రాగాలి. గ్రీన్‌ టీతో పాటు కాల్చిన పప్పు, మఖానా లేదా ఉడికించిన మొక్కజొన్న తినండి. గ్రీన్‌టీలో పోషకాలు పుష్కలంగా ఉంటాయి. ఇవి ఆరోగ్యాన్ని అందిస్తాయి. ఇందులోని కెటాచిన్లు ఆక్సీకరణ ఒత్తిడిని తగ్గిస్తాయి. సాయంత్రం గ్రీన్ టీ తాగితే ఫ్యాట్ బర్నింగ్ ప్రాసెస్ స్పీడ్ అవుతుంది. ఇక, సాయంత్రం పూట కూడా కొన్ని వ్యాయామాల్ని భాగం చేసుకోండి. వాకింగ్, సైక్లింగ్, స్విమ్మింగ్ వంటి వ్యాయామాలు చేయవచ్చు.


రాత్రి భోజనం


రాత్రి 7:30 గంటల ప్రాంతంలో రాత్రి భోజనం తేలికగా ఉండేలా ప్లాన్ చేసుకోండి. రాత్రి ఎనిమిది గంటలకు ముందు తినడం చాలా మంచిది. ఇందులో మిల్లెట్స్‌ పిండితో చేసిన రోటీ, మిక్స్‌డ్ వెజిటబుల్ సూప్, గంజి, ఖిచ్డీ లేదా క్వినోవా ఉప్మా తినవచ్చు. అన్నం తినకపోవడమే మేలు. ఇక, నిద్రపోయేముందు క్రీమ్ లేకుండా గోరు వెచ్చని పాలు తాగండి. కావాలంటే పసుపు కలుపుకుని తాగవచ్చు. పసుపులో యాంటీ ఇన్ఫ్లమేటరీ గుణాలు ఉంటాయి. శరీరంలోని వాపును కంట్రోల్ చేస్తుంది.


అదనపు చిట్కాలు


* రోజంతా కనీసం మూడు నుంచి నాలుగు లీటర్ల నీరు తాగండి.


* జంక్ ఫుడ్, వేయించిన ఆహారాలు, ప్రాసెస్ ఫుడ్స్, స్పైసీ ఫుడ్స్‌కి దూరంగా ఉండండి.


* రోజంతా ఎక్కువ మోతాదులో తినకండి. తక్కువ మోతాదులో స్వల్పంగా తినండి.


* ఒత్తిడిని తగ్గించుకోవడం కోసం ధ్యానం, ప్రాణాయామం వంటి వ్యాయామాలు చేయండి.


* రోజూ రెగ్యులర్‌గా వాకింగ్ చేయండి. రోజు రోజుకి నడక వేగం పెంచేలా ప్లాన్ చేసుకోండి.


* రోజూ 7 నుంచి 8 గంటలు కనీసం నిద్రపోవాలని గుర్తించుకోండి.






SURYAA NEWS, synonym with professional journalism, started basically to serve the Telugu language readers. And apart from that we have our own e-portal domains viz,. https://www.suryaa.com/ and https://epaper.suryaa.com