ఎండాకాలంలో ఇంటిని చల్లగా ఉంచే మొక్కలు

వేసవి రాబోతుంది. ఇప్పటికే ఎండలు మండిపోతున్నాయి. కొన్ని రోజుల్లో మండే ఎండలు, వేడి వాతావరణంగా కారణంగా ఇంటి లోపల ఉండటం కష్టమవుతుంది. చాలా మంది వేసవిలో ఇంటిని చల్లగా ఉంచడం కోసం కూలర్లు, ఏసీల్ని వాడతారు. అయితే, ఎల్లప్పుడూ ఏసీ, కూలర్‌లో ఉండటం ఆరోగ్యానికి హానికరం. అంతేకాకుండా కరెంట్ బిల్లుతో జేబుకి చిల్లు పడుతుంది. ఈ బాధల్ని తప్పించుకోని ఇంటిని చల్లగా ఉంచడం కోసం కొన్ని మొక్కలను పెంచితే సరిపోతుంది.

వేసవిలో కొన్ని మొక్కలను ఇంట్లో పెంచుకోవడం వల్ల లోపలి వాతావరణం చల్లగా మారుతుంది. ఈ మొక్కలు పర్యావరణాన్ని చల్లగా ఉంచడమే కాకుండా గాలి నాణ్యతను మెరుగుపరుస్తాయి. అంటే గాలి శుద్ధి చేసి.. ఆక్సిజన్‌ను మెరుగుపరుస్తాయి. వేసవిలో ఈ మొక్కలను పెంచుకోవడం ద్వారా ఇల్లు చల్లగా మారుతుంది. వేసవిలో ఇల్లు చల్లగా ఉండాలంటే ఎలాంటి మొక్కల్ని పెంచుకోవాలో ఇక్కడ తెలుసుకుందాం.

మనీప్లాంట్

ఈ రోజుల్లో మనీ ప్లాంట్ ప్రతి ఇంట్లో కనిపిస్తుంది. కొందరు దీనిని గుమ్మం ముందు పెంచుకుంటారు. మరికొందరు ఇంటి లోపల మనీప్లాంట్ పెంచుకుంటారు. ఇది ఇంటికి ఆకర్షణ తీసుకువస్తుంది. మనీప్లాంట్ ఇంటికి అందాన్ని తీసుకురావడమే కాదు.. చల్లగా మారుస్తుంది. మనీ ప్లాంట్ గాలిలోని మలినాల్ని ఫిల్టర్ చేసే సామర్థ్యాన్ని కలిగి ఉంటుంది. ఇంట్లో దీన్ని పెంచుకోవడం ద్వారా స్వచ్చమైన, తాజా గాలిని పీల్చుకోవచ్చు. అంతేకాకుండా ఇంటి వాతావరణాన్ని చల్లగా మారుస్తుంది.

స్నేక్‌ప్లాంట్

స్నేక్ ప్లాంట్‌ను ఇంట్లో పెంచుకోవచ్చు. ఈ మొక్కను పెంచుకుంటే బోలెడు ప్రయోజనాలు ఉన్నాయి. ఇది ఇంటికి అందాన్ని ఇవ్వడమే కాదు.. అనేక ఆరోగ్య ప్రయోజనాలు కూడా ఇస్తుంది. స్నేక్ ప్లాంట్ పగటి పూట గాలిని శుద్ధి చేసి.. రాత్రి సమయాల్లో ఆక్సిజన్ విడుదల చేస్తుంది. గాలిలోని టాక్సిన్లు తొలగిపోతాయి. అంతేకాకుండా ఇంటిని చల్లగా మారుస్తుంది. ఈ మొక్క ఇంట్లో పెంచుకోవడం వల్ల ఒత్తిడి తగ్గుతుంది. హాయిగా నిద్ర పడుతుందని నిపుణులు చెబుతున్నారు.

కలబంద

చాలా మంది తమ ఇళ్లలో కలబంద మొక్కను నాటుతారు. దీని ఆకుల నుంచి తీసిన జెల్ ను ముఖం, జుట్టు సంరక్షణ కోసం ఉపయోగిస్తారు. ఆరోగ్యం కోసం చాలా మంది కలబంద రసం కూడా తాగుతుంటారు. ఇలా ఆరోగ్యానికి ఎంతో మేలు చేసే కలబంద మొక్క, ఇంటి ఉష్ణోగ్రతను కూడా చల్లబరుస్తుంది. ఇది గాలిలోని టాక్సిన్లను తొలగించి శుద్ది చేస్తుంది. వేసవిలో ఈ మొక్కను ఇంట్లో పెంచుకోవడం బెస్ట్ ఆప్షన్ అంటున్నారు నిపుణులు.

అరెకా తాటి చెట్టు

అరేకా తాటి చెట్టు అత్యంత ప్రజాదరణ పొందిన లివింగ్ రూమ్ మొక్కలలో ఒకటి. ఈ మొక్క గాలిని చల్లగా, తేమగా ఉంచడంలో సహాయపడుతుంది. సమ్మర్‌లో ఈ మొక్క ఇంట్లో ఉండే ఎండల నుంచి ఉపశమనాన్ని అందిస్తుంది. ఇంటి వాతావరణాన్ని చల్లబరుస్తుంది. అంతేకాకుండా ఇంట్లోని గాలి నాణ్యతను మెరుగుపరుస్తుంది. గాలిలోని మలినాలను తొలగించి స్వచ్ఛమైన ఆక్సిజన్‌ను అందిస్తుంది.

రబ్బరు మొక్క

వేసవిలో పర్యావరణాన్ని చల్లగా, శుభ్రంగా ఉంచడంలో రబ్బరు మొక్క సాయపడుతుంది. ఈ మొక్క వేసవిలో తేమను తగ్గిస్తుంది. రబ్బరు మొక్కకు నీరు కూడా పెద్దగా అవసరం లేదు. తక్కువ నీటితో ఇది బతికేస్తుంది. అయితే, ఈ మొక్కను మంచి నేలలో, తక్కువ వెలుతురు పడే ప్రదేశంలో పెంచాలి.

ఫెర్న్ మొక్క

వేసవిలో ఇంటిని సహజంగా చల్లగా ఉంచడానికి మీరు ఫెర్న్ మొక్కలను కూడా నాటవచ్చు. ఇది గాలిలో తేమను నిలుపుకోవడంలో సహాయపడుతుంది. దీంతో, ఇంటిని చల్లగా ఉంచుతుంది. అంతేకాకుండా, పర్యావరణాన్ని శుభ్రంగా ఉంచుతుంది. గాలిలో టాక్సిన్స్‌ను తొలగించి స్వచ్చమైన ఆక్సిజన్‌ను అందిస్తుంది. అంతేకాకుండా ఇంటి అందమైన ఆకర్షణను తీసుకువస్తుంది.

స్పైడర్ ప్లాంట్

ఈ మొక్క కూడా ఇంటికి ఆకర్షణీయమైన రూపాన్ని తెస్తుంది. ఈ మొక్కను ఇండోర్‌లో పెంచుకోవచ్చు. ఈ మొక్క ఇంట్లో ఉంచడం వల్ల గాలిలోని మలినాలు తొలగిపోతాయి. దీంతో.. గాలి స్వచ్ఛత పెరుగుతుంది. వీటి సంరక్షణ చాలా ఈజీ. ఇంట్లో సులభంగా పెంచుకోవచ్చు. వీటికి కూడా తక్కువ నీరు అవసరం. చిన్న చిన్న కుండీల్లో కూడా పెంచుకోవచ్చు. ఈ మొక్కల వల్ల ఇంటి వాతావరణం చల్లగా మారుతుంది. ఎండల నుంచి ఉపశమనాన్ని అందిస్తుంది.