రోజూ ఏ వ్యాయామాలు చేస్తే బరువు తగ్గుతారో తెలుసా

ఈ రోజుల్లో చాలా మంది అధిక బరువు, ఊబకాయం సమస్యలతో బాధపడుతున్నారు. దీంతో బరువు తగ్గడానికి నానా ప్రయత్నాలు చేస్తున్నారు. అయితే, బరువు తగ్గడం ఒక సవాలుతో కూడిన లక్ష్యం కావచ్చు. కానీ క్రమం తప్పకుండా వ్యాయామం, ఆరోగ్యకరమైన ఆహారంతో దీనిని సులభంగా సాధించవచ్చంటున్నారు నిపుణులు. బరువు తగ్గడంలో వ్యాయామం ముఖ్యమైన పాత్ర పోషిస్తుంది. చాలా మంది బరువు తగ్గడానికి వ్యాయామాలు చేస్తుంటారు. అయితే, ఏ వ్యాయామాలు చేస్తే బరువు తగ్గుతారో చాలా మందికి క్లారిటీ లేదు. బరువు తగ్గడంలో ఏ వ్యాయామాలు కీలక పాత్ర పోషిస్తాయి, ఎంత సేపు చేయాలో ఇక్కడ తెలుసుకుందాం.

బరువు తగ్గడానికి సాయం చేసే వ్యాయామాలు

జంపింగ్ జాక్స్

జంపింగ్ జాక్స్ అనేవి మొత్తం శరీరాన్ని ఉత్తేజపరిచే సరళమైన కార్డియో వ్యాయామం. ఇది హృదయ స్పందన రేటును పెంచుతుంది. కేలరీలను బర్న్ చేయడానికి సహాయపడుతుంది. 10-15 నిమిషాలు జంపింగ్ జాక్స్ చేయడం వల్ల 100-150 కేలరీలు బర్న్ అవుతాయి.

పుష్-అప్స్, స్క్వాట్స్

పుష్-అప్‌లు, స్క్వాట్‌లు బరువు తగ్గడానికి బెస్ట్ వ్యాయామాలు. ఇవి కండరాలను బలోపేతం చేస్తాయి. జీవక్రియను పెంచుతాయి. బలమైన కండరాలు ఎక్కువ కేలరీలను బర్న్ చేస్తాయి. బరువు తగ్గడంలో ఈ వ్యాయామాలు సాయపడతాయి. ఇంట్లోనే సులభంగా ఈ వ్యాయామాలు చేసుకోవచ్చు.

సైక్లింగ్

సైక్లింగ్ సరదా మాత్రమే కాదు. గుండె ఆరోగ్యానికి సైక్లింగ్ బెస్ట్ వ్యాయామం. ఇది మన శారీరక ఆరోగ్యాన్ని మెరుగుపరచడమే కాకుండా చాలా యంగ్ గా ఉంచుతుంది. ఇది మన చేతులు, కాళ్ళు రెండూ ఒకే సమయంలో పనిచేసేలా చేస్తాయి. ఇది గుండె, కండరాలు, కీళ్ల మొత్తం ఆరోగ్యాన్ని మెరుగుపరచడంలో సహాయపడుతుంది. ఒత్తిడి సమస్యల్ని తగ్గించి.. మానసిక ఆరోగ్యాన్ని మెరుగుపరుస్తుందని నిపుణులు చెబుతున్నారు. రోజూ కనీసం 20 నుంచి 30 నిమిషాల పాటు సైకిల్ తొక్కితే బరువు తగ్గుతారు. 30 నిమిషాలు సైక్లింగ్ చేయడం వల్ల 200-300 కేలరీలు బర్న్ అవుతాయి.

స్విమ్మింగ్

స్మిమ్మింగ్ అనేది బరువు తగ్గడానికి, కండరాలను బలోపేతం చేయడానికి సహాయపడే వ్యాయామం. 30 నిమిషాలు ఈత కొట్టడం వల్ల 250-400 కేలరీలు బర్న్ అవుతాయి. ఇది ఒత్తిడిని తగ్గించడంలో చాలా బాగా ఉపయోగపడుతుంది. రోజూ స్విమ్మింగ్ చేయడం ద్వారా మరింత చురుకుగా మారవచ్చు. ఈ స్విమ్మింగ్ వ్యాయామం పరధ్యానాన్ని నివారించడానికి సహాయపడుతుంది. రోజూ స్విమ్మింగ్ చేయడం వల్ల గుండె ఆరోగ్యం మెరుగుపడుతుంది.

వాకింగ్

​బరువు తగ్గడానికి వాకింగ్ బెస్ట్ ఆప్షన్ అంటున్నారు నిపుణులు. కేలరీలను బర్న్ చేయడానికి ఇది ఒక గొప్ప మార్గం. 30 నిమిషాలు వాకింగ్ చేయడం వల్ల దాదాపు 100 నుంచి 200 కేలరీలు బర్న్ అవుతాయి. రోజుకు కనీసం గంట సేపు అయినా వాకింగ్ చేయాలంటున్నారు నిపుణులు. బరువు తగ్గడంలో నడక వేగం కూడా కంపల్సరీ. మీరు మొదట వాకింగ్ చేసేటప్పుడు నిదానంగా నడిచినా.. రోజు రోజుకి నడక వేగం పెంచండి.

బరువు తగ్గాలనుకునేవారు ఎంత సేపు వ్యాయామం చేయాలి?

బరువు తగ్గాలనుకునేవారు రోజూ 60 నుంచి 90 నిమిషాల పాటు వ్యాయామం చేయాలి. ఇందులో ఏరోబిక్, వాకింగ్ వంటి వ్యాయామాలు ఉండేలా చూసుకోవాలి. వ్యాయామంతో పాటు సమతుల్య ఆహారం, తగినంత నిద్ర కూడా అవసరం. అధిక వ్యాయామం చేయాలనుకునేవారు, ఏదైనా ఆరోగ్య సమస్యలతో బాధపడుతున్నవారు ట్రైనర్ లేదా వైద్యుడిని సంప్రదించి సలహాలు తీసుకోవాలి.