సునీతా విలియమ్స్‌కు అదనపు జీతం నా జేబులోంచి చెల్లిస్తా..: ట్రంప్

సుదీర్ఘ కాలం పాటు అంతర్జాతీయ అంతరిక్షంలో చిక్కుకుపోయిన వ్యోమగాములు సునీతా విలియమ్స్, బుచ్ విల్‌మోర్‌లకు ఓవర్ టైం చేసినందుకు కేవలం 4 డాలర్లు మాత్రమే వస్తాయని తెలుసుకుని అమెరికా అధ్యక్షుడు ట్రంప్ షాక్ అయ్యారు. ఇంత తక్కువ మొత్తంలో ఇవ్వడం ఏంటంటూనే.. వారికి ఓవర్ టైం చేసినందుకు జీతం చెల్లించని విషయం తనకు తెలియదని వివరించారు. అయితే అదనపు జీతం చెల్లించాల్సి వస్తే.. తన జేబులోంచే తీసి సునీతా విలియమ్స్, బుచ్ విల్‌మోర్‌లకు జీతం ఇస్తానని చెప్పారు. ఆ పూర్తి వివరాలు మీకోసం.

8 రోజుల పర్యటన నిమిత్తం అంతర్జాతీయ అంతరిక్ష కేంద్రానికి వెళ్లిన సునీతా విలియమ్స్, బుచ్ విల్‌మోర్‌లు వెళ్లిన వ్యోమనౌకలో సాంకేతిక సమస్యలు తలెత్తడంతో 9 నెలల పాటు అక్కడే చిక్కుపోయారు. అయితే క్రూ9 మిషన్‌లో భాగంగా మార్చి 19వ తేదీ తెల్లవారుజామున 3.27 గంటలకు అమెరికాలోని ఫ్లోరిడా తీరంలో క్షేమంగా ల్యాండ్ అయ్యారు. అక్కడి నుంచి వీరిని నేరుగా ఆస్పత్రికి తీసుకెళ్లి చికిత్స అందిస్తున్నారు. ఇదంతా బాగానే ఉండగా.. ఎక్కువ కాలం అంతరిక్షంలో ఉన్నందుకు గాను వీరికి ఏమైనా అదనపు చెల్లింపులు చేస్తారా అంటూ అంతా అనుమానాలు వ్యక్తం చేశారు.

ఈక్రమంలోనే ఓ మాజీ వ్యోమగామి స్పందించి.. జీత భత్యాల గురించి వివరించారు. నాసా ఉద్యోగులు కూడా అమెరికా ప్రభుత్వ ఉద్యోగులు పొందే జీత భత్యాలనే పొందుతారని.. వ్యోమగాములకు జనరల్ షెడ్యూల్ జీఎస్-13 నుంచి జీఎస్-15 కింద చెల్లింపులు చేస్తారని తెలిపారు. ముఖ్యంగా సునీతా విలియమ్స్, బుచ్ విల్‌మోర్‌లు అత్యధిక గ్రేడ్ జీఎస్-15 గ్రేడ్ పే జీతం అందుకుంటున్నారని వెల్లడించారు. అంటే వీరిద్దరికీ ఏడాదికి లక్షా 24 వేల 133 డాలర్ల నుంచి లక్షా 62 వేల 372 డాలర్ల (భారత కరెన్సీ ప్రకారం రూ.1.08 కోట్ల నుంచి రూ.1.41 కోట్లు) వరకు ఉంటుందని పేర్కొన్నారు.

అయితే ఎక్కువ రోజులు అంతరిక్షంలోనే ఉన్నా, ఓవర్ టైమ్ చేసినా అదనపు చెల్లింపులు ఉండవని తెలిపారు. కానీ అనూహ్య పరిణామాలు చోటు చేసుకుని ఇలా చిక్కుకపోయినప్పుడు మాత్రం రోజుకు 4 డాలర్లు చెల్లిస్తారని వెల్లడించారు. ఈ లెక్కన సునీతా విలియమ్స్, బుచ్ విల్‌మోర్‌లకు అదనంగా 1430 డాలర్లు మాత్రమే వస్తాయని చెప్పగా.. ప్రజలంతా షాక్ అయ్యారు. ముఖ్యంగా ఇదే విషయాన్ని ఓ మీడియా ప్రతినిధి.. అమెరికా అధ్యక్షుడు డొనాల్డ్ ట్రంప్ వద్ద ప్రస్తావించారు. అందుకు ట్రంప్ కూడా షాక్ అయ్యారు.

తనకు నిజంగా ఈ విషయం తెలియదంటూనే.. మరీ ఇంత తక్కువ ఇస్తారా అని ఆశ్చర్యం వ్యక్తం చేశారు. ఒకవేళ వ్యోమగాములకు అదనపు జీతం చెల్లించాల్సి వస్తే తన సొంత డబ్బులను ఇస్తానని హామీ ఇచ్చారు. అంతేకాకుండా వారిని తిరిగి తీసుకు వచ్చినందుకు ఎలాన్ మస్క్‌కు కృతజ్ఞతలు తెలిపారు.