మైనర్ బాలుడితో మంత్రి వివాహేతర సంబంధం.. 30 ఏళ్ల క్రితం చేసిన తప్పుతో పదవిలోంచి ఔట్

ఆమె ఓ మహిళా మంత్రి. ప్రస్తుతం ఆమెకు 58 సంవత్సరాలు కాగా.. 30 ఏళ్ల క్రితం ఓ 16 ఏళ్ల బాలుడితో వివాహేతర సంబంధం పెట్టుకున్నారు. 28 సంవత్సరాల వయసులో ఉండగా.. మైనర్ బాలుడితో పెట్టుకున్న సంబంధం కారణంగా ఓ బిడ్డకు జన్మను కూడా ఇచ్చారు. అయితే ఇంతకాలం పాటు ఆ బిడ్డకు కన్నతండ్రి ఎవరో చెప్పకుండా పెంచారు. కనీసం అతడిని కలవనీయకుండా, మాట్లాడనీయకుండా చేయగా.. సదరు వ్యక్తి కోర్టుకు వెళ్లాడు. అయినా లాభం లేకపోయింది. కానీ ఇటీవలే ఆ వ్యక్తి బంధువు విషయాన్ని మీడియా ముందుకు తేగా మంత్రి కూడా తన నేరాన్ని ఒప్పుకోవాల్సి వచ్చింది. 30 ఏళ్ల క్రితం చేసిన ఈ ఒక్క తప్పు వల్ల.. ప్రస్తుతం ఆమె తన మంత్రి పదవికి రాజీనామా చేశారు. ఇందుకు సంబంధించిన పూర్తి వివరాలు మీకోసం.

58 ఏళ్ల వయసు కల్గిన ఆస్టిల్డర్ లోవా థోర్సోడొట్టిర్ ప్రస్తుతం ఐస్‌లాండ్ విద్యా, శిశు సంక్షేమశాఖ మంత్రిగా కొనసాగుతున్నారు. అయితే ఈమెకు 28 ఏళ్ల వయసు ఉండగా.. ఓ మతపరమైన వర్గానికి కౌన్సిలర్‌గా పని చేశారు. అదే సమయంలో అక్కడే ఉండే ఓ 16 ఏళ్ల బాలుడు ఆస్ముండ్సన్‌తో ఆస్టిల్డర్ లోవా థోర్సోడొట్టిర్ వివాహేతర సంబంధం పెట్టుకున్నారు. అతడి కంటే వయసులో చాలా పెద్దవారే అయినప్పటికీ.. కొన్నేళ్ల పాటు ఆ బంధాన్ని కొనసాగించారు. ఫలితంగా ఆమె గర్భం దాల్చారు.

అప్పుడు కూడా వారిద్దరూ కలిసే ఉండగా.. బిడ్డ పుట్టాడు. ఆపై ఏడాది కాలం పాటు ఒకే చోట ఉన్న వీరిద్దరూ ఆ తర్వాత విడిపోయారు. ముఖ్యంగా ఆస్టిల్డర్ లోవా థోర్సోడొట్టిర్.. ఆ తర్వాత కొంత కాలం నుంచి తన బిడ్డను చూడనివ్వకుండా ఇబ్బందులు పెట్టిందని ఆస్ముండ్సన్ ఆరోపించారు. బిడ్డ పుట్టిన ఏడాది దాకా వాళ్లతోనే కలిసి ఉన్నానని.. కానీ ఆ తర్వాతే ఆస్టిల్డర్ నన్ను దూరం పెట్టడం ప్రారంభించిందని చెప్పారు. బిడ్డ కోసం 18 ఏళ్ల పాటు న్యాయ పోరాటం కూడా చేశానని.. కుమారుడి సంరక్షణ కోసం డబ్బులు కూడా చెల్లించానని వివరించారు. అయినప్పటికీ తన బిడ్డను కలిసేందుకు తాను చేసిన ప్రయత్నాలన్నీ విఫలం అయ్యాయన్నారు.

కానీ ఆ తర్వాతే ఆస్ముండ్సన్ బంధువు ఒకరు ఆ దేశ ప్రధాన మంత్రికి ఈ విషయం గురించి వివరించారు. ముఖ్యంగా మంత్రి ఆస్టిల్డర్.. మైనర్ బాలుడితో వివాహేతర సంబంధం కొనసాగించారని, అప్పుడే వారికి ఒక బిడ్డ కూడా పుట్టిందన్నారు. దీంతో ఈ విషయం కాస్తా తీవ్ర దుమారం రేపగా.. మంత్రి ఆస్టిల్డర్ స్పందించాల్సి వచ్చింది. ఈక్రమంలోనే ఆమె తన తప్పును ఒప్పుకున్నారు. ఇక అప్పటి నుంచి పెద్ద ఎత్తున విమర్శలు రాగా.. ఆమె పదవికి రాజీనామా చేశారు. ఇదంతా ఇలా ఉండగా.. ఐస్‌లాండ్ చట్టాల ప్రకారం ఒక మైనర్‌తో గురువు లేదా వారి సంరక్షకులు వివాహేతర సంబంధం పెట్టుకోవడం నేరం. ఇలా చేసిన వారికి 3 ఏళ్ల జైలు శిక్ష పడే అవకాశం ఉంది. చూడాలి మరి మంత్రి ఆస్టుల్డర్‌కు ఏ శిక్ష విధిస్తారనేది.