చైనీయులతో శారీరక సంబంధాలు పెట్టుకోవద్దు..: అమెరికా సూచన

అమెరికా, చైనా దేశాల మధ్య అన్ని రంగాల్లో పోటీ ఉంటుంది. ఒకరి కంటే మరొకరు దూకుడుగా వ్యవహరిస్తూ ముందుకెళ్తుంటారు. అందుకే తమ రహస్యాలను మరొకరికి చేరకుండా గట్టి చర్యలు తీసుకుంటూ ఉంటారు. ముఖ్యంగా ప్రభుత్వం తరఫున పని చేస్తున్న వారు మరింత జాగ్రత్తగా ఉంటూ తమ రహస్యాలను కాపాడుకునేందుకు కృషి చేయాల్సి ఉంటుంది. అయితే ఇదే విషయాన్ని మరోసారి గుర్తు చేసుకున్న అమెరికా.. చైనాలో ఉన్న తమ ఉద్యోగులకు కీలక హెచ్చరికలు జారీ చేసింది. ఉద్యోగులతో పాటు వారి కుటుంబ సభ్యులు కూడా చైనీయులతో ప్రేమ, శారీరక సంబంధాలు పెట్టుకోవద్దని స్పష్టం చేసింది. ఆ పూర్తి వివరాలు మీకోసం.

చైనాలో.. అమెరికా తరఫున పని చేస్తున్న ప్రభుత్వ సిబ్బంది, కాంట్రాక్ట్ ఉద్యోగులు సహా వారి కుటుంబ సభ్యులు.. చైనా పౌరులతో ఎలాంటి ప్రేమ, లైంగిక సంబంధాలు కల్గి ఉండకూడదని అమెరికా సర్కారు తేల్చి చెప్పింది. ఇలాంటి సంబంధాలపై తాము నిషేధం విధిస్తున్నట్లు ప్రకటించింది. అగ్రరాజ్యం అమెరికా అధ్యక్షుడిగా ట్రంప్ రెండోసారి పదవీ బాధ్యతలు స్వీకరించడానికి కొన్ని రోజుల ముందే ఈ ఆంక్షలపై కాస్త ఒత్తిడి పెంచినట్లు తెలుస్తోంది. గతంలో చైనీయులతో బంధంపై సర్కారు అంత సీరియస్‌గా లేదని కానీ ఇప్పుడు పరిస్థితులు మారాయని కొందరు అధికారులు చెబుతున్నారు.

ముఖ్యంగా చైనాలోని బీజింగ్, గ్వాంగ్‌జౌ, షైంగై, షెన్యాంగ్, వుహాన్‌లోని కాన్సులేట్లలో పని చేస్తున్న అమెరికా సిబ్బంది చైనా పౌరులతో ప్రేమ, శారీరక సంబంధం పెట్టుకోవడానికి పూర్తిగా వీళ్లేదని తేల్చి చెప్పినట్లు వివరిస్తున్నారు. అయితే గతంలోనే చైనా పౌరులతో సంబంధాలు కగ్లి ఉన్న యూఎస్ సిబ్బందికి మాత్రం మినహాయింపు ఇస్తుందన్నారు. అయితే తాము దీని కోసం ముందుగానే దరఖాస్తు చేసుకోవాల్సి ఉంటుందని తెలిపారు. పొరపాటున మినహాయింపులు తిరస్కరించబడితే వారు చైనీయులతో తమ బంధాన్ని ముగించాల్సి ఉంటుందని, అది కుదరని పక్షంలో తమ పదవులను వదులుకోవాల్సి ఉంటుందని వెల్లడిస్తున్నారు.

జనవరిలో ఈ నిబంధనలపై ఒత్తిడి పెరిగే వరకు చైనాలోని అమెరికా సిబ్బంది.. అక్కడి పౌరులతో సన్నిహిత సంబంధాలు ఏర్పరుచుకుంటే వారి పర్యవేక్షకులకు నివేదించాల్సి ఉండేది. కానీ లైంగిక, శృంగార సంబంధాలపై స్పష్టమైన నిషేధం విధించలేదు. మరి అమెరికా ఇప్పుడు తీసుకున్న ఈ నిర్ణయంతో సదరు ఉద్యోగులపై ఎలాంటి ప్రభావం పడబోతుందో చూడాలి.