ఇన్‌స్టాగ్రామ్‌లో ఫేమ్ మహిళా కానిస్టేబుల్ అమన్‌దీప్ కౌర్ కారులో హెరాయిన్,,,అరెస్ట్

ఆ మహిళా పోలీస్ తన అందంతో, రీల్స్‌తో సోషల్ మీడియాలో తెగ ఫేమస్ అయిపోయింది. ఇక ఆమెకు ఇన్‌స్టా క్వీన్ అనే పేరు కూడా ఉంది. నిత్యం తన వీడియోలతో ఫ్యాన్స్‌ను అల్లాడిస్తూ ఉంటుంది. అయితే ఒకరోజు కారులో ప్రయాణిస్తూ పోలీసులకు అడ్డంగా దొరికిపోయింది. ఇటీవల ఆమె తన కారులో ప్రయాణిస్తూ పోలీసులకు రెడ్ హ్యాండెడ్‌గా పట్టుబడింది. ఆ మహిళా కానిస్టేబుల్ అమన్‌దీప్ కౌర్ కారులో హెరాయిన్ అనే మత్తు పదార్థం దొరకడంతో పోలీసులు ఆమెను అరెస్ట్ చేసి కస్టడీలోకి తీసుకున్నారు. ఆ తర్వాత ఆమె డ్రగ్స్ రవాణా చేస్తోందని గుర్తించి.. ఉద్యోగం నుంచి తొలగించారు. పంజాబ్‌లో మాదక ద్రవ్యాలకు వ్యతిరేకంగా భగవంత్ మాన్ నేతృత్వంలోని ఆమ్ ఆద్మీ పార్టీ ప్రభుత్వం యుధ్ నషేయన్ విరుధ్ అనే కార్యక్రమాన్ని చేపట్టి డ్రగ్స్ వినియోగం, అక్రమ రవాణాపై ఉక్కుపాదం మోపుతోంది.

ఇన్‌స్టాగ్రామ్ ఫేమ్, పంజాబ్ లేడీ కానిస్టేబుల్ అమన్‌దీప్ కౌర్ 17.71 గ్రాముల నిషేధిత హెరాయిన్ డ్రగ్‌తో పట్టుబడడంతో ఆమెను పంజాబ్ పోలీసులు బుధవారం అరెస్ట్ చేశారు. ఆ గురువారం ఆమెను పంజాబ్ ప్రభుత్వం విధుల నుంచి తొలగించింది. బటిండాలోని బాదల్ ఫ్లై ఓవర్ సమీపంలో పోలీసులు, యాంటీ నార్కోటిక్స్ టాస్క్‌ఫోర్స్‌ చేపట్టిన జాయింట్ ఆపరేషన్‌లో అమన్‌దీప్ కౌర్‌‌ డ్రగ్స్‌తో పట్టుబడినట్లు డీఎస్పీ హర్బన్స్ సింగ్ తెలిపారు. థార్ ఎస్‌యూవీ కారులో వచ్చిన అమన్‌దీప్ కౌర్ వద్ద డ్రగ్స్ దొరికాయని.. ఆమెతోపాటు జస్వంత్ సింగ్ అనే వ్యక్తి కూడ ఉన్నట్లు వెల్లడించారు.

ఇక సోషల్ మీడియాలో అమన్‌దీప్ కౌర్‌కు చాలా ఫాలోయింగ్ ఉంది. పోలీస్_కౌర్‌దీప్‌ పేరుతో ఆమె ఇన్‌స్టాలో రీల్స్ చేస్తూ ఉంటుంది. పోలీస్ యూనిఫాం, ఫ్యాన్సీ వాచ్, కళ్లజోడు పెట్టుకుని పంజాబీ సాంగ్స్‌కు డ్యాన్స్ చేస్తూ రీల్స్ చేస్తుంటుంది. ఆమెకు ఇన్‌స్టాలో 37 వేల మంది ఫాలోవర్లు ఉన్నారు. అంతకుముందు యూనిఫాంలో మోడలింగ్ చేస్తున్నట్లు చూపించే కంటెంట్ పోస్ట్ చేయవద్దని పోలీస్ డిపార్ట్‌మెంట్ అమన్‌దీప్ కౌర్‌ను ఆదేశించినట్లు తెలుస్తోంది.

ఇక అమన్‌దీప్ కౌర్ లైఫ్ స్టైల్ గురించి గుర్మీత్ కౌర్ అనే మహిళ తీవ్ర ఆరోపణలు చేసింది. అమన్‌దీప్ కౌర్‌కు రూ. 2 కోట్ల విలువైన ఇళ్లు, 2 కార్లు, రూ.లక్షల విలువైన వాచ్ ఉన్నాయని తెలిపింది. తన భర్త, అంబులెన్స్ డ్రైవర్ అయిన బల్విందర్ సింగ్‌తో అమన్‌దీప్ కౌర్ రిలేషన్‌లో ఉందని గుర్మీత్ సింగ్ ఫేస్‌బుక్‌లో ఒక వీడియోను పోస్ట్ చేసింది. అమన్‌దీప్ కౌర్, బల్విందర్ సింగ్ కలిసి డ్రగ్స్ అమ్మేందుకు అంబులెన్స్‌ను ఉపయోగించినట్లు ఆమె తీవ్ర ఆరోపణలు చేసింది. ప్రస్తుతం అమన్‌దీప్ కౌర్ పట్టుబడటంతో విచారణ ప్రారంభించిన పోలీసులు.. ఆమె వద్దకు డ్రగ్స్ ఎలా వచ్చాయనే దానిపై దర్యాప్తు చేస్తున్నారు.