అంకుల్ అంకులు అంటూనే..స్కామర్‌ను తెలివితో దెబ్బ కొట్టిన టీనేజర్..

ఈమధ్య కాలంలో డిజిటల్ స్కామ్‌లు ఎక్కువ అయ్యాయి. ప్రేమ, పెళ్లళ్ల పేరులతో పాటు డిజిటల్ అరెస్టులు, ఫోన్ కాల్స్, మెసేజీల్లో లింకులు పంపుతూ.. అమాయక ప్రజల నుంచి డబ్బులు కొట్టేసేందుకు చాలానే ప్రయత్నాలు చేస్తున్నారు. ఇందులో ఇరుక్కుని ఎంతో మంది మోసపోగా.. కొందరు కొందరు మాత్రం తెలివిగా తప్పించుకుంటున్నారు. ఇటీవలే ఓ యువకుడు స్కామర్‌కు భయపడుతున్నట్లు నటించి అతడి నుంచే డబ్బులు కొట్టయేగా.. అచ్చంగా ఇలాంటి ఘటనే జరిగింది మరో చోట. ముఖ్యంగా ఓ అమ్మాయి తనను మోసం చేసేందుకు వ్యక్తి ఫోన్ చేసినట్లు గుర్తించి.. అతడితో మాట్లాడుతూ ఓ ఆట ఆడుకుంది. అంకుల్ అంకుల్ అంటూ.. అతడు చెప్పినట్లుగా చేస్తూనే చుక్కలు చూపించింది. ఆ పూర్తి వివరాలు మీకోసం.

నేను మీ నాన్న స్నేహితుడిని అని చెబుతూ.. సదరు యువతికి ఓ స్కామర్ ఫోన్ చేశాడు. మీ నాన్న మీ ఖాతాకు 12 వేలు పంపించమన్నారని అందుకే తాను ఫోన్ చేసినట్లు వివరించాడు. అయితే సదరు యువతి కూడా సరే అంకుల్ అని చెప్పగా.. రూ.10 వేలు వేశాను చూసుకో అన్నాడు. అయితే ముందుగా రూ.10 మాత్రమే పంపినట్లు ఫేక్ ట్రాన్సాక్షన్ మెసేజీని ఫోన్ ద్వారా పంపాడు. అయితే తన బ్యాంకు నుంచి కాకుండా వేరే ఫోన్ నెంబర్ నుంచి ఈ మెసేజీ రావడాన్ని యువతి గుర్తించింది. అది స్కామర్ పనే అని తెలుసుకుంది. అలా అని ఫోన్ కట్ చేయకుండా అతడు చెప్పిందంటూ వింటూనే.. చేస్తూ వీడియో రికార్డు చేసింది.

ముఖ్యంగా స్కామర్ ముందు 10 రూపాయలు, ఆపై 10 వేల రూపాయలు పంపినట్లు మెసేజీలు పంపించాడు. మరో రెండు వేలు పంపిస్తున్నాని చెప్పి రూ.20 వేలు పంపినట్లుగా సందేశం పంపాడు. అయితే మొత్తం రూ.30 వేల ట్రాన్సాక్షన్ అయిందని.. కానీ మీ నాన్న మీ ఖాతాకు 12 వేలు మాత్రమే వేయాలని చెప్పారని గుర్తు చేశాడు. మిగతా 18 వేల రూపాయలు తనవి తనకు పంపమని కోరాడు. ఇదంతా వింటున్న యువతి ఓకే అంకుల్, ఓకే అంకుల్ అంటూ.. ఆయన ఫార్వాడ్ చేసిన మెసేజీనే కాపీ చేసి అందులో 20 వద్ద 18 నంబర్‌ను మార్చింది. దాన్ని అతడికి పంపింది. అంకుల్ డబ్బులు పంపించాను వచ్చాయా చూస్కోండని తెలిపింది.

అయితే తాను చేసిన మోసమే తనకు జరగ్గా.. స్కామర్ షాక్ అయ్యాడు. తనకంటే తెలివైన అమ్మాయని గుర్తించి వెంటనే ఫోన్ కట్ చేశాడు. ఆపై యువతి కడుపుబ్బా నవ్వుకుని తాను తీసిన వీడియోను సోషల్ మీడియాలో పెట్టింది. దీంతో క్షణాల్లోనే ఇది వైరల్ కాగా.. అమ్మాయి తెలివిని అంతా మెచ్చుకుంటున్నారు. మంచి పని చేశావు.. ఇలా తెలివిగా ఉంటేనే మోసాలు జరగవంటూ కామెంట్లు చేస్తున్నారు. కొందరు నెటిజెన్లు అయితే బ్యూటీ విత్ బ్రెయిన్ ఉన్న గర్ల్ అంటూ తమ మనసులోని భావాలను కామెంట్ల రూపంలో వెల్లడిస్తున్నారు. ఇటీవలే ఓ యువకుడు కూడా ఇలాగే చేసి స్కామర్ నుంచి రూ.10 వేలు కొట్టాశాడని పలువురు కామెంట్లలో గుర్తు చేశారు.