ఢిల్లీ నూతన మేయర్‌గా బీజేపీకి చెందిన రాజా ఇక్బాల్ సింగ్ శుక్రవారం ఎన్నికయ్యారు

ఢిల్లీ నూతన మేయర్‌గా బీజేపీకి చెందిన రాజా ఇక్బాల్ సింగ్ శుక్రవారం ఎన్నికయ్యారు. మున్సిపల్ కార్పొరేషన్ ఆఫ్ ఢిల్లీ ఎంసీడీ లో జరిగిన ఎన్నికల్లో ఆయన భారీ మెజారిటీతో గెలుపొందారు. ఈ ఎన్నికల్లో మొత్తం 142 ఓట్లు పోలవగా, రాజా ఇక్బాల్ సింగ్‌కు 133 ఓట్లు రాగా, కాంగ్రెస్ అభ్యర్థి మన్‌దీప్‌కు కేవలం 8 ఓట్లు మాత్రమే లభించాయి. ఒక ఓటు చెల్లనిదిగా అధికారులు ప్రకటించారు.అయితే, బీజేపీ ఫిరాయింపులను ప్రోత్సహిస్తోందని ఆరోపిస్తూ ఆమ్ ఆద్మీ పార్టీ ఈ మేయర్ ఎన్నికను బహిష్కరించింది. ఈ విజయంతో, రెండేళ్ల విరామం తర్వాత ఎంసీడీపై బీజేపీ తిరిగి పట్టు సాధించినట్లయింది.గత ఏడాది నవంబర్‌లో జరిగిన మేయర్ ఎన్నికల్లో ఆమ్ ఆద్మీ పార్టీ అభ్యర్థి మహేశ్ కుమార్ ఖించి కేవలం 3 ఓట్ల తేడాతో గెలుపొందారు. ప్రస్తుతం ఎంసీడీలోని మొత్తం 250 సీట్లలో బీజేపీ బలం 117 కాగా, ఆమ్ ఆద్మీ పార్టీ బలం 113గా ఉంది. కొంతమంది కౌన్సిలర్లు ఢిల్లీ అసెంబ్లీకి, ఒకరు లోక్‌సభకు ఎన్నిక కావడంతో 12 సీట్లు ఖాళీగా ఉన్నాయి.మేయర్ ఎన్నికల ఎలక్టోరల్ కాలేజీలో ప్రస్తుతం ఉన్న 238 మంది కౌన్సిలర్లు, 10 మంది ఎంపీలు ఏడుగురు లోక్‌సభ, ముగ్గురు రాజ్యసభ 14 మంది ఎమ్మెల్యేలు సభ్యులుగా ఉంటారు. ఢిల్లీ అసెంబ్లీ స్పీకర్ విజేందర్ గుప్తా 11 మంది బీజేపీ, ముగ్గురు ఆమ్ ఆద్మీ పార్టీ ఎమ్మెల్యేలను ఎలెక్టర్లుగా నామినేట్ చేశారు. గత మూడేళ్లలో బీజేపీ బలం 104 నుంచి 117కు పెరగగా, ఆమ్ ఆద్మీ పార్టీ బలం 134 నుంచి 113కు తగ్గింది. పలువురు కౌన్సిలర్లు ఎమ్మెల్యేలు, ఎంపీలుగా గెలుపొందాక 12 సీట్లు ఖాళీగా ఉన్నాయి.విజయం అనంతరం రాజా ఇక్బాల్ సింగ్ మాట్లాడుతూ, "ఢిల్లీ పారిశుద్ధ్య వ్యవస్థను మెరుగుపరచడం, చెత్త గుట్టలను తొలగించడం, నీటి ముంపు సమస్యను పరిష్కరించడం, ప్రజలకు అన్ని మౌలిక, అత్యవసర సౌకర్యాలు కల్పించడం ప్రధాన లక్ష్యంగా ఉంటుంది. పూర్తి అంకితభావంతో, కష్టపడి పనిచేస్తాం" అని తెలిపారు.