రాణించిన బౌలర్లు..చెన్నైలో సన్ 'రైజింగ్‌'..

ఐపీఎల్ 2025లో భాగంగా చెన్నై సూపర్ కింగ్స్‌తో జరుగుతున్న మ్యాచ్‌లో సన్‌రైజర్స్ బౌలర్లు రాణించారు. టాస్ గెలిచి బౌలింగ్ ఎంచుకున్న సన్‌రైజర్స్.. సీఎస్కేను 19.5 ఓవర్లలో 154 పరుగులకు ఆలౌట్ చేసింది. టోర్నీ ప్లే ఆఫ్స్ రేసులో నిలవాలంటే తప్పక గెలవాల్సిన మ్యాచ్‌లో సన్‌రైజర్స్ బౌలర్లు సమష్టిగా రాణించారు. హర్షల్ పటేల్ అత్యధికంగా నాలుగు వికెట్లు పడగొట్టాడు.

ఐపీఎల్‌ 2025 సీజన్‌లో ఇప్పటివరకూ ఆశించిన మేర రాణించలేకపోయిన సన్‌రైజర్స్ హైదరాబాద్… బౌలర్లు ప్లే ఆఫ్స్ రేసులో ఉండాలంటే తప్పక గెలవాల్సిన మ్యాచ్‌లో సత్తాచాటారు. చెపాక్ వేదికగా జరుగుతున్న మ్యాచ్‌లో ఆతిథ్య చెన్నై సూపర్ కింగ్స్‌ను 154 పరుగులకు ఆలౌట్ చేశారు. దీంతో సన్ రైజర్స్ హైదరాబాద్ ముందు ఊరించే లక్ష్యం నిలిచింది.

ఈ మ్యాచ్‌లో టాస్ గెలిచిన సన్‌రైజర్స్ హైదరాబాద్ కెప్టెన్ ప్యాట్ కమిన్స్.. సీఎస్కేకు బ్యాటింగ్ అప్పగించాడు. ఇక ఈ మ్యాచ్‌కు భారీ మార్పులతో బరిలోకి దిగింది సీఎస్కే. దక్షిణాఫ్రికా విధ్వంసకర ప్లేయర్ డివాల్డ్ బ్రేవిస్‌కు తుది జట్టులో చోటు కల్పించింది. అయితే మహమ్మద్ షమీ.. తొలి బంతికే సీఎస్కేకు షాక్ ఇచ్చాడు. షేక్ రషీద్‌ను ఫస్టు బాల్‌కే ఔట్ చేశాడు. అయితే మరో ఓపెనర్ ఆయుశ్ మాత్రే మాత్రం ఎదురుదాడికి దిగాడు. దీంతో సీఎస్కే స్కోరు బోర్డు పరుగులు పెట్టింది.

ఆయుశ్ మాత్రే (19 బంతుల్లో 30 రన్స్‌) ఔట్ అయ్యాక డివాల్డ్ బ్రేవిస్ (25 బంతుల్లో 42 రన్స్‌) బాధ్యతలు తీసుకున్నాడు. దీంతో 12.4 ఓవర్లు ముగిసే సరికి సీఎస్కే.. 114/4తో నిలిచింది. ఈ మ్యాచ్‌లో భారీ స్కోరు చేసేలా కనిపించింది. కానీ సన్‌రైజర్స్ బౌలర్లు బలంగా పంజుకున్నారు. శివమ్ దూబె, దీపక్‌ హుడా, మహేంద్ర సింగ్ ధోనీ విఫలమయ్యారు. దీంతో చెన్నై సూపర్ కింగ్స్ పూర్తి కోటా కూడా బ్యాటింగ్ చేయలేకపోయింది. మరో బంతి మిగిలి ఉండగానే.. 154 పరుగులకు ఆలౌట్ అయింది.

సన్‌రైజర్స్ హైదరాబాద్ బౌలర్లలో.. హర్షల్ పటేల్ అత్యధికంగా నాలుగు వికెట్లు తీశాడు. ప్యాట్ కమిన్స్, జయదేవ్ ఉనద్కత్ రెండేసి వికెట్లు తీశారు. మహమ్మద్ షమీ 1, కామిందు మెండిస్ ఒక వికెట్ తీశారు. కాగా ఈ టోర్నీలో సీఎస్కే, ఎస్‌ఆర్‌హెచ్ పేలవ ప్రదర్శన చేస్తున్నాయి. ప్రస్తుతం పాయింట్ల పట్టికలో చివరి రెండు స్థానాల్లో ఉన్నాయి. ఈ మ్యాచ్‌లో ఓడిపోయిన జట్టు దాదాపుగా ప్లే ఆఫ్స్ రేసు నుంచి నిష్క్రమిస్తుంది. గెలిస్తే మాత్రం ప్లే ఆఫ్స్ ఆశలు సజీవంగా ఉంటాయి.