ఆటో డ్రైవర్ 'బిజినెస్ ఐడియా'కు బ్రేకులు.... నెలకు రూ.8 లక్షలు పాయే

ముంబైకి చెందిన ఓ ఆటో డ్రైవర్ వినూత్నంగా వ్యాపారం చేస్తూ.. ఇటీవల సోషల్ మీడియాలో సంచలనం సృష్టించిన విషయం తెలిసిందే. అతడు చాలా స్మార్ట్‌గా రూ.లక్షల్లో సంపాదిస్తున్నట్లు సోషల్ మీడియాలో వైరల్ అయింది. అతడి ఆలోచనను అందరూ బ్రిలియంట్ బిజినెస్ మోడల్ అంటూ కొనియాడారు. అయితే, ఇప్పుడు ఆ ఆటో డ్రైవర్ చిక్కుల్లో పడ్డాడు. అతడి లాకర్ సర్వీస్‌ను ముంబై పోలీసులు మూసివేశారు. అతడికి, ప్రయాణికులను దించి వెళ్లే లైసెన్స్ మాత్రమే ఉందనీ.. లాకర్ సర్వీస్ నడపడానికి కాదని చెప్పారు. ఇలా చేస్తున్న మొత్తం 13 మందికి పోలీసులు నోటీసులు జారీ చేశారు. ఆ వివరాలు.

వ్యాపారం ఇలా మొదలైంది..

ముంబైలోని బాంద్రా కుర్లా కాంప్లెక్స్ లో ఉన్న అమెరికా కాన్సులేట్‌కు వీసా అపాయింట్‌మెంట్‌ల పనిపై తరచూ వందల సంఖ్యలో జనాలు వస్తుంటారు. అలా వచ్చేవారు కాన్సులేట్ లోపలికి బ్యాగులు తీసుకెళ్లడానికి అనుమతి లేదు. దీంతో వారు తమ బ్యాగులను బయట ఉంచడానికి చాలా ఇబ్బందులు ఎదుర్కోవలసి వచ్చేది. ఈ సమస్యను గమనించిన ఓ ఆటో డ్రైవర్.. తన ఆటో అక్కడే పార్క్ చేసి కాన్సులేట్‌కు వచ్చే వారి బ్యాగులను సురక్షితంగా ఉంచే సర్వీస్‌ను ప్రారంభించాడు.

అలా కాన్సులేట్ బ్యాగ్‌లను భద్రపరచడానికి ఒక్కో బ్యాగుకు రూ.1,000 వసూలు చేస్తుండేవాడు. అలా నెలకు రూ.5 లక్షల నుంచి రూ.8 లక్షల వరకు సంపాదిస్తున్నాడని వెన్యూమాంక్ సహ వ్యవస్థాపకుడు రాహుల్ రూపాణి లింక్‌డిన్‌లో పేర్కొన్నారు. "నేను విసా అపాయింట్‌ పని మీద అమెరికా కాన్సులేట్‌కు వెళ్లినప్పుడు.. లోపలికి బ్యాగ్ అనుమతించలేదు. బ్యాగ్‌ను ఎక్కడ ఉంచాలో నాకు తెలియదు. ఈ సమయంలో నాకు అక్కడున్న ఓ ఆటో డ్రైవర్ సహాయం చేయడానికి ముందుకొచ్చాడు. కానీ రూ.1000 సర్వీస్ ఫీజుతో." అని రాహుల్ రూపాణి పోస్ట్‌లో పేర్కొన్నారు. ఈ పోస్ట్ వైరల్ కావడంతో బిలియనీర్ హర్ష్ గోయెంకా సైతం స్పందిస్తూ.. ఆటో డ్రైవర్ బిజినెస్‌ను "స్వచ్ఛమైన భారతీయ జుగాడ్"గా అభివర్ణించారు.

ఈ వ్యవహారం ముంబై పోలీసుల దృష్టికి వెళ్లడంతో డ్రైవర్‌కు చిక్కులు మొదలయ్యాయి. బీకేసీ ప్రాంతంలో భద్రతా కారణాల దృష్ట్యా పార్కింగ్ నిషేధం అని.. ఆటో డ్రైవర్లు కేవలం ప్రయాణికులను దింపి వెళ్లిపోవడానికి మాత్రమే అనుమతి ఉందని ఆ ప్రాంత పోలీస్ స్టేషన్ అధికారి ఒకరు తెలిపారు. ఆటో డ్రైవర్లకు ఇలాంటి లాకర్ సేవలు నిర్వహించడానికి, అక్కడ ఉన్న షాపుల్లో వస్తువులు స్టోర్ చేయడానికి ఎలాంటి చట్టపరమైన అనుమతి లేదని.. ఇది భద్రతకు తీవ్ర ముప్పుగా మారే అవకాశం ఉందని పోలీసులు హెచ్చరించారు. ఈ నేపథ్యంలో, ముంబై పోలీసులు ఆ ఆటో డ్రైవర్‌తో పాటు ఇలాంటి సేవలు అందిస్తున్న మరో 12 మందికి నోటీసులు జారీ చేశారు. డ్రైవర్ ప్రస్తుతం లాకర్ సేవలను నిలిపివేశాడని పోలీసులు తెలిపారు.