ఇంగ్లాండ్‌తో టెస్ట్ సిరీస్‌లో కుల్దీప్ యాదవ్ కీలకమన్న వెంకటపతిరాజు

భారత క్రికెట్ జట్టు త్వరలో ఇంగ్లాండ్‌లో కీలకమైన టెస్ట్ సిరీస్‌ ఆడనుంది. రవిచంద్రన్ అశ్విన్ వంటి అనుభవజ్ఞుడైన స్పిన్నర్ రిటైర్మెంట్ ప్రకటించిన నేపథ్యంలో, జట్టు స్పిన్ విభాగంపై అందరి దృష్టి నెలకొంది. ఈ క్రమంలో, మణికట్టు స్పిన్నర్ కుల్దీప్ యాదవ్, సీనియర్ ఆల్‌రౌండర్ రవీంద్ర జడేజాలపైనే ప్రధాన భారం పడనుంది. ఈ నేపథ్యంలో భారత మాజీ ఎడమచేతి వాటం స్పిన్నర్ వెంకటపతి రాజు ఓ క్రీడా ఛానెల్‌కు ఇచ్చిన ప్రత్యేక ఇంటర్వ్యూలో పలు ఆసక్తికర విషయాలు పంచుకున్నాడు.ఏడేళ్లుగా అంతర్జాతీయ క్రికెట్‌లో ఉన్నప్పటికీ కుల్దీప్ యాదవ్ కేవలం 13 టెస్టులు మాత్రమే ఆడటం ఆశ్చర్యం కలిగిస్తుంది. ఫామ్ లేమి, గాయాలు, ఇతర స్పిన్నర్ల పోటీ వంటి కారణాలతో అతను టెస్టు జట్టులో స్థిరమైన స్థానం సంపాదించుకోలేకపోయాడు. 2018లో లార్డ్స్‌లో జరిగిన టెస్టులో కుల్దీప్ విఫలమయ్యాడు. అయితే, ఈసారి కుల్దీప్ ఇంగ్లాండ్ సిరీస్‌లో "సర్ ప్రైజ్ మ్యాచ్ విన్నర్"గా నిలుస్తాడని వెంకటపతి రాజు విశ్వాసం వ్యక్తం చేశాడు. "కొత్త బ్యాటర్లకు కుల్దీప్‌ను అర్థం చేసుకోవడం కష్టం. అతను పరిమిత ఓవర్ల క్రికెట్‌లో బాగా ఆడాడు, ఇప్పుడు టెస్టుల్లో కూడా ఆ సత్తా చాటాలి" అని రాజు రవిచంద్రన్ అశ్విన్, రోహిత్ శర్మ, విరాట్ కోహ్లీ రిటైర్మెంట్, మహమ్మద్ షమీ గాయం కారణంగా జట్టులో లేకపోవడంతో, ప్రస్తుతం జట్టులో అత్యంత అనుభవజ్ఞుడైన ఆటగాడు రవీంద్ర జడేజానే. అతని అనుభవం, ముఖ్యంగా బ్యాటింగ్‌లో జట్టుకు చాలా కీలకమని రాజు అభిప్రాయపడ్డారు. "కుల్దీప్ గురించి మాట్లాడుతున్నప్పుడు జడేజాను మర్చిపోకూడదు. అతను ఫిట్‌గా ఉన్నాడు, బ్యాటింగ్ కూడా చేయగలడు. గతంలో అతన్ని రెండో ఇన్నింగ్స్ బౌలర్‌గానే చూశారు, కానీ అతను మ్యాచ్ మధ్యలో ఆటను నియంత్రించగలడు. అతని అనుభవం జట్టుకు ఉపయోగపడుతుంది," అని రాజు వివరించారు. వాషింగ్టన్ సుందర్‌తో అతనికి పోటీ ఉండొచ్చని కూడా రాజు సూచించారు.ఇంగ్లాండ్‌లో ప్రస్తుతం పొడి వాతావరణం నెలకొందని, రాబోయే రోజుల్లో ఉష్ణోగ్రతలు పెరిగే అవకాశం ఉందని వార్తలు వస్తున్నాయి. ఇది స్పిన్నర్లకు అనుకూలించే అంశం. "మొదట్లో పేసర్లకు, బ్యాటర్లకు అనుకూలించినా, మూడో, నాలుగో రోజు నుంచి పిచ్‌పై పగుళ్లు ఏర్పడి పొడిగా మారుతుంది. అప్పుడు స్పిన్నర్ల పాత్ర కీలకం అవుతుంది. ముఖ్యంగా రెండో ఇన్నింగ్స్‌లో కుల్దీప్, జడేజాల భాగస్వామ్యం మ్యాచ్‌లను మలుపు తిప్పగలదు," అని వెంకటపతి రాజు విశ్లేషించారు. డ్యూక్స్ బంతితో బౌలింగ్ చేయడానికి భారత స్పిన్నర్లు తమ లెంగ్త్, పేస్‌ను పరిస్థితులకు తగ్గట్టు మార్చుకోవాలని, ఓపిక చాలా ముఖ్యమని ఆయన సూచించారు.