బెన్ స్టోక్స్ వ్యూహం.. సాయి సుదర్శన్ డకౌట్

ఐపీఎల్ హీరో సాయి సుదర్శన్ ఇంగ్లండ్‌ కెప్టెన్ బెన్ స్టోక్స్ వ్యూహానికి బోల్తా కొట్టాడు. డ్రీమ్ మ్యాచ్‌లో డకౌట్‌గా వెనుదిరిగాడు. స్టోక్స్ ప్లాన్ చేసి మరీ వికెట్ తీశాడు. ఇంగ్లండ్ వేదికగా జరుగుతున్న టెండూల్కర్ - అండర్సన్ ట్రోఫీ మొదటి టెస్టులో టీమిండియా వరుసగా రెండు వికెట్లు కోల్పోయింది. లంచ్ బ్రేక్‌కి ముందు టీమిండియా వరుసగా కేఎల్ రాహుల్, సాయి సుదర్శన్ వికెట్లు కోల్పోయింది.

సాయి సుదర్శన్ టెస్టుల్లో అడుగుపెట్టిన తొలి మ్యాచ్‌లోనే డకౌట్‌గా వెనుదిరిగాడు. ఇంగ్లండ్‌తో టెస్టు సిరీస్‌లో భాగంగా హెడింగ్లీలో జరుగుతున్న మొదటి మ్యాచ్‌తో సాయి సుదర్శన్ టెస్టుల్లో ఎంట్రీ ఇచ్చాడు. ఫస్ట్ టెస్టు మ్యాచ్, అదీ ఇంగ్లండ్‌లో కావడంతో తడబడిన సాయి సుదర్శన్ బెన్ స్టోక్స్ ప్లాన్‌కి వికెట్ సమర్పించుకున్నాడు. కేవలం నాలుగు బంతులే ఆడి పరుగులేమీ చేయకుండా పెవిలియన్ బాట పట్టాడు.

కేఎల్ రాహుల్ అవుటైన తర్వాత సాయి సుదర్శన్ ఫస్ట్ డౌన్‌లో క్రీజులోకి వచ్చాడు. లంచ్ బ్రేక్‌‌కి ఒక్క ఓవర్‌ ముందు క్రీజులోకి రావడంతో.. ఇంగ్లండ్ కెప్టెన్ బెన్ స్టోక్స్ సాయిని ఎలాగైనా అవుట్ చేయాలని నిర్ణయించుకున్నాడు. 25వ ఓవర్ చివరి బంతికి స్ట్రయికింగ్‌లో రాగానే స్లిప్‌తో పాటు లెగ్ వికెట్ అవతల కూడా ఇద్దరు ఫీల్డర్స్‌ను పెట్టాడు. 25వ ఓవర్‌లో చివరి బంతిని బ్రైడన్ కార్స్ లెగ్ వికెట్ మీదుగా వేయగా అది డాట్ అయింది.

26వ ఓవర్‌‌లో బంతిని అందుకున్న బెన్ స్టోక్స్ పక్కా ప్లాన్‌తో ఫీల్డింగ్ సెట్ చేశాడు. సాయి సుదర్శన్‌ లెగ్ వికెట్ టార్గెట్ చేస్తూనే బౌలింగ్ వేశాడు. మొదటి బంతిని జైస్వాల్ సింగిల్ తీయగా.. రెండో బంతికి సాయి స్ట్రయికింగ్‌కి వచ్చాడు. రెండో బంతిని మిడ్ వికెట్ మీదుగా వేయగా అది ఎడ్జ్ తీసుకుని స్లిప్‌లోకి వెళ్లింది. మూడో బంతిని లెగ్ వికెట్ మీదుగా వేయగా ప్యాడ్ తగిలి కీపర్ చేతులోకి వెళ్లింది. నాలుగో బంతిని లెగ్ వికెట్ బయటకు వేయగా సాయి సుదర్శన్ బ్యాట్ టచ్ అయ్యి నేరుగా కీపర్ చేతిలో పడింది.

బెన్ స్టోక్స్ ప్లాన్ చేసి మరీ సాయి సుదర్శన్‌ని పెవిలియన్‌కు పంపాడు. దాంతో సుదర్శన్ డెబ్యూ మ్యాచ్‌లోనే డకౌట్‌గా వెనుదిరగాల్సి వచ్చింది. లంచ్ సమయానికి టీమిండియా 25.4 ఓవర్లలో రెండు వికెట్ల నష్టానికి 92 పరుగులు చేసింది. కేఎల్ రాహుల్ 42, సాయి సుదర్శన్ 0 పరుగులు చేసి అవుటవ్వగా.. యశస్వి జైస్వాల్ 42 పరుగులతో క్రీజులో ఉన్నాడు.