కౌంటీ ఛాంపియన్‌షిప్‌లో తిలక్ వర్మ సెంచరీ,,,జట్టు కష్టాల్లో ఉన్నప్పుడు వచ్చి అద్భుత ఇన్నింగ్స్‌

తెలుగు క్రికెటర్ తిలక్ వర్మ ఇంగ్లాండ్‌ గడ్డపై అదరగొట్టాడు. రెడ్‌ బాల్ క్రికెట్‌తో తన డెబ్యూ మ్యాచ్‌లోనే సెంచరీతో చెలరేగిపోయాడు. అదేంటి..? తిలక్ వర్మ భారత టెస్టు జట్టులో లేడు కదా? ఇంగ్లాండ్‌లో రెడ్ బాల్ క్రికెట్‌లో సెంచరీ చేయడం ఏంటి? అనుకుంటున్నారా? అవును.. తిలక్ వర్మ భారత టెస్టు జట్టులో లేడు. కానీ, ఇంగ్లాండ్‌లోనే రెడ్‌బాల్ క్రికెట్‌లోనే సెంచరీ చేశాడు. అక్కడ జరుగుతున్న కౌంటీ ఛాంపియన్‌ షిప్‌ మ్యాచ్‌లో అతడు ఈ ఫీట్ సాధించాడు. హ్యాంప్‌షైర్ తరఫున బరిలోకి దిగిన 22 ఏళ్ల తిలక్ తన అరంగేట్ర మ్యాచ్‌లోనే మూడంకెల మార్కును అందుకున్నాడు.

టీమిండియా టీ20 జట్టులో సభ్యుడిగా ఉన్న తిలక్ వర్మ.. సుదీర్ఘ ఫార్మాట్‌లోనూ భారత్ తరఫున ఆడాలని కలలు కంటున్నాడు. అందుకోసం ఇంగ్లాండ్‌లో కౌంటీ క్రికెట్ ఆడాలని డిసైడ్ అయ్యాడు. కౌంటీ ఛాంపియన్‌షిప్‌ డివిజన్‌ వన్‌-2025లో ఆడేందుకు ఇటీవలే హ్యాంప్‌షైర్‌తో ఒప్పందం చేసుకున్నాడు. దీంతో ఎసెక్స్‌తో రెండు రోజుల క్రితం ప్రారంభమైన మ్యాచ్‌లో బరిలోకి దిగాడు.

ఈ మ్యాచ్‌లో తన జట్టు హ్యాంప్‌షైర్‌ 34/2తో కష్టాల్లో ఉన్నప్పుడు తిలక్ వర్మ క్రీజులోకి వచ్చాడు. టీ20 స్పెషలిస్ట్ ప్లేయర్ అయిన అతడు.. ఎంతో సంయమనంతో బ్యాటింగ్‌ చేశాడు. అసలైన టెస్టు క్రికెట్‌ను రుచి చూపిస్తూ 239 బంతుల్లో మూడంకెల మార్కు అందుకున్నాడు. ఇందులో 11 ఫోర్లు, 3 సిక్స్‌లు ఉన్నాయి. సెంచరీ చేసిన కాసేపటికే అతడు ఔట్ అయ్యాడు.

ఇక ఈ మ్యాచ్ విషయానికి వస్తే.. తొలుత బ్యాటింగ్‌ చేసిన ఎసెక్స్‌ తొలి ఇన్నింగ్స్‌లో 296 పరుగులకు ఆలౌట్‌ అయింది. అనంతరం హ్యాప్ షైర్ 453 పరుగులు చేసి పది వికెట్లు కోల్పోయింది. ఇక 157 పరుగుల లోటుతో రెండో ఇన్నింగ్స్ ప్రారంభించిన ఎసెక్స్‌ 30 ఓవర్లు ముగిసే సమయానికి 72 పరుగులకు మూడు వికెట్లు కోల్పోయింది. ప్రస్తుతం మూడో రోజు మూడో సెషన్‌ ఆట కొనసాగుతోంది. ఇదిలా ఉండగా.. తొలి టెస్టులో భారత మిడిలార్డర్ వైఫల్యం కావడంతో రెండో టెస్టులోకి తిలక్ వర్మను తీసుకోవాలని అభిమానులు డిమాండ్ చేస్తున్నారు.