బ్యాటింగ్‌లోనే కాదు.. బౌలింగ్‌లోనూ తగ్గేదేలే

2025 మొత్తం వైభవ్ సూర్యవంశీ నామసంవత్సరంగా మారిపోతోంది. ఐపీఎల్‌లో అరంగేట్రం, అతి పిన్న వయస్కుడిగా ఐపీఎల్ సెంచరీ సహా ఎన్నో రికార్డులను ఈ 14 ఏళ్ల కుర్రాడు సాధించాడు. ప్రస్తుతం ఇండియా యువ జట్టు ఇంగ్లాండ్‌లో పర్యటిస్తోంది. ఇందులో సభ్యుడిగా ఉన్న వైభవ్.. రికార్డుల మోత మోగిస్తున్నాడు. యూత్ వన్డే సిరీస్‌లో టీ20 తరహాలో రెచ్చిపోయి.. ప్రత్యర్థి బౌలర్లకు పట్టపగలే చుక్కలు చూపించాడు. తాజాగా టెస్ట్ మ్యాచ్‌లోనూ అతడి హవా కొనసాగుతోంది.

యూత్ టెస్ట్‌లో భాగంగా యువ భారత్‌.. ఇంగ్లాండ్‌తో టెస్ట్ మ్యాచ్ ఆడుతోంది. ఈ మ్యాచ్‌ తొలి ఇన్నింగ్స్‌లో 14 పరుగుల మాత్రమే చేసి ఔట్ అయ్యాడు వైభవ్. కానీ రెండో ఇన్నింగ్స్‌లో మాత్రం మెరుపు హాఫ్ సెంచరీ(56)తో రాణించాడు. టెస్ట్‌లలో హాఫ్ సెంచరీ అనేది మంచి ఆటే. కానీ వైభవ్ సూర్యవంశీ స్థాయికి మాత్రం ఇది తక్కువే. ఎందుకంటే అతడు 14 ఏళ్ల వయసులోనే సెంచరీల మీద సెంచరీలు కొడుతున్నాడు. దీంతో ఫ్యాన్స్‌కు వైభవ్.. స్థాయికి తగ్గ ప్రదర్శన చేయలేదని భావిస్తున్నారు.

ఈ మ్యాచ్‌లో తన బ్యాటింగ్‌ పట్ల నిరాశపడ్డ ఫ్యాన్స్‌ను వైభవ్.. తన బౌలింగ్‌తో కుషీ చేశాడు. లెఫ్టార్మ్ స్పిన్నర్ అయిన వైభవ్ సూర్యవంశీ ఈ మ్యాచ్‌ తొలి ఇన్నింగ్స్‌లో రెండు వికెట్లు తీశాడు. అద్భుతమైన ప్రదర్శన కనబర్చిన ఇంగ్లాండ్ కెప్టెన్ హంజా షేక్(84)తో పాటు థామస్ రెవ్(34)ను పెవిలియన్‌కు పంపించాడు. ఈ క్రమంలోనే భారత్ తరఫున అండర్ 19 యూత్‌ టెస్ట్ క్రికెట్ చరిత్రలో వికెట్ తీసిన అత్యంత పిన్నవయస్కుడిగా నిలిచాడు. 14 ఏళ్ల 107 రోజుల వయసులోనే వైభవ్ సూర్యవంశీ ఈ ఫీట్ సాధించాడు. అంతకుముందు భారత అండర్ 19 క్రికెటర్ మనిషీ 15 ఏళ్ల వయసులో తొలి వికెట్ తీశాడు.

ఇక యూత్ టెస్ట్ మ్యాచ్‌లో భారత్ మెరుగైన ప్రదర్శన చేస్తోంది. తొలి ఇన్నింగ్స్‌లో 504 పరుగులు చేసిన యువ భారత్.. ఆ తర్వాత ఇంగ్లాండ్ టీమ్‌ను 439 పరుగులకే ఆలౌట్ చేసింది. ఇక రెండో ఇన్నింగ్స్‌లో నాలుగో రోజు లంచ్ బ్రేక్ సమయానికి 209/8 పరుగులు చేసింది. ప్రస్తుతం భారత్ లీడ్‌ 310 పరుగులకు చేరింది.