నేనే టీమిండియా కెప్టెన్ అయితే బెన్‌స్టోక్స్ ఎపిసోడ్ వేరేలా ఉండేది: అశ్విన్‌

మాంచెస్టర్ టెస్ట్‌లో రవీంద్ర జడేజా, వాషింగ్టన్ సుందర్‌లు సెంచరీలకు చేరువైన సమయంలో డ్రా ఆఫర్ చేసిన ఇంగ్లాండ్ కెప్టెన్ బెన్ స్టోక్స్‌పై సర్వత్రా విమర్శలు వస్తున్నాయి. ఇదేనా క్రీడాస్ఫూర్తి అని పలువురు మాజీ క్రికెటర్లు, వ్యాఖ్యాతలు, ఫ్యాన్స్ కౌంటర్‌ ఇస్తున్నారు. తాజాగా ఈ జాబితాలో టీమిండియా మాజీ ప్లేయర్ రవిచంద్రన్ అశ్విన్ చేరిపోయాడు. బెన్ స్టోక్స్‌పై ఘాటు వ్యాఖ్యలు చేశాడు. మాంచెస్టర్‌ టెస్ట్‌లో తాను టీమిండియా కెప్టెన్‌గా ఉండి ఉంటే.. కథ వేరేలా ఉండేదని అన్నాడు.

“ద్వంద్వ వైఖరి అనే మాట ఎప్పుడైనా విన్నారా? దానికి మంచి ఉదాహారణ బెన్ స్టోక్స్ వ్యవహార శైలి. షేక్ హ్యాండ్‌ ఇచ్చి ఫ్రస్ట్రేషన్‌ను వ్యక్తం చేయడం చూశాం. నువ్వు (స్టోక్స్) కూడా ఈ టెస్ట్ మ్యాచ్‌ తొలి ఇన్నింగ్స్‌లో సెంచరీ చేయకుండా ఏడుస్తూ వెళ్లిపోతే సరిపోయేది. తొలి సెషన్‌ నుంచి రవీంద్ర జడేజా మీ బౌలర్లను ఆడేసుకున్నాడు. నువ్వు ఎవరికైతే బంతిని ఇచ్చావో.. వారి బౌలింగ్‌లో రన్స్‌ రాబట్టాడు. చివరికి టెస్ట్‌ డ్రాగా ముగిసింది. చాలా కష్టపడి జడేజా, సుందర్‌ భారత్‌ను కాపాడారు. ఇలాంటి సమయంలో సెంచరీ చేయొద్దు వెళ్లిపోండి అంటే పద్ధతేనా?” అని అశ్విన్ ప్రశ్నించాడు.

“బ్రదర్ స్టోక్స్‌ బ్రూక్‌ బౌలింగ్‌లో సెంచరీ చేస్తావా? అని అడుగుతావా? అక్కడ బ్రూక్‌ బౌలింగ్‌లో సెంచరీ కాదు. నువ్వు మీ జట్టు మాజీ ఆటగాళ్లు హార్మిసన్ లేదా ఫ్లింటాఫ్‌ను తీసుకొచ్చినా జడేజా మాత్రం అందుకు నో చెప్పడు. కానీ, నువ్వు హ్యారీ బ్రూక్‌కు బంతినిచ్చావు. అది నీ తప్పు. మాది (టీమిండియా) కాదు కదా. మ్యాచ్‌ను త్వరగా ముగిద్దామని ఇంగ్లాండ్‌ చెప్పిన కారణాలు వారికి బాగుంటాయేమో. కానీ, ఆ ఫ్రస్ట్రేషన్‌ను ప్రదర్శించాల్సిన అవసరం ఇక్కడ లేదు” అని అశ్విన్ వ్యాఖ్యానించాడు.

“సాధారణంగా టెస్ట్‌ మ్యాచ్‌లలో ఫలితం తేలదని భావిస్తే రెండు జట్ల కెప్టెన్‌లు నిర్ణయం తీసుకుంటారు. కానీ మాంచెస్టర్ టెస్ట్‌ ఫలితం పట్ల నేను సంతోషంగా లేను కాబట్టి మీరు కూడా ఉండకూడదని అనుకుంటే ఎలా స్టోక్స్‌? నేనేగానీ మాంచెస్టర్ టెస్ట్‌లో టీమిండియా కెప్టెన్‌గా ఉండి ఉంటే మాత్రం.. జడేజా, సుందర్ సెంచరీలు చేశాక కూడా డ్రాకు ఒప్పుకోకపోయేవాడిని. మిగిలిన 15 ఓవర్లూ ఆడేయమని మావాళ్లకు చెప్పేవాడిని. ఎవరు బౌలింగ్ వేసిన సరే” అని అశ్విన్‌.. ఇంగ్లాండ్ కెప్టెన్‌ బెన్ స్టోక్స్ వ్యవహార శైలిపై విమర్శలు గుప్పించాడు.