ఇంగ్లాండ్‌ టీమ్‌లో మార్పు.. జట్టులోకి ఏడో పేసర్‌ ఎంట్రీ

మాంచెస్టర్‌ వేదికగా జరిగిన నాలుగో టెస్ట్‌లో ఐదు సెషన్‌ల సమయం ఉన్నప్పటికీ టీమిండియాను ఆలౌట్ చేయలేకపోయిన ఇంగ్లాండ్‌ గెలుపుకు దూరమైంది. ఆ జట్టు బౌలర్లలో కెప్టెన్ బెన్ స్టోక్స్ మినహా మిగతా వారు పెద్దగా ప్రభావం చూపలేకపోయారు. దీంతో కీలకమైన ఐదో టెస్ట్‌కు ముందు ఇంగ్లాండ్ తమ జట్టులో మార్పు చేసింది. ఇప్పటికే ఆ జట్టులో ఆరుగురు పేసర్లు ఉండగా.. మరో పేసర్‌ను జట్టులోకి తీసుకుంది. ఈ మేరకు పేస్‌ ఆల్‌రౌండర్ జెమీ ఓవర్టన్‌ను జట్టులో చేర్చింది. ఈ విషయాన్ని సోమవారం ప్రకటించింది.

ఈ ఒక్క మార్పు మినహా అతిథ్య ఇంగ్లాండ్ తమ టీమ్‌లో ఎలాంటి ఛేంజెస్ చేయలేదు. 31 ఏళ్ల ఓవర్టన్ తన కెరీర్‌లో కేవలం ఒకే ఒక టెస్ట్ మ్యాచ్ ఆడాడు. 2022లో న్యూజిలాండ్‌తో జరిగిన మ్యాచ్‌లో అరంగేట్రం చేశాడు. ఈ తర్వాత మళ్లీ టెస్ట్ మ్యాచ్ ఆడలేదు. ఆ మ్యాచ్‌లో 2 వికెట్లు తీసిన అతడు.. బ్యాట్‌తో 97 రన్స్ స్కోరు చేశాడు.

నాలుగో టెస్ట్‌ సందర్భంగా ఇంగ్లాండ్ జట్టు కెప్టెన్‌ బెన్‌ స్టోక్స్‌ అసౌకర్యంగా కనిపించాడు. చివరి రోజు ఆటలో కొన్ని ఓవర్లు బౌలింగ్ చేసినా.. నొప్పితో ఇబ్బంది పడ్డాడు. ఈ నేపథ్యంలో అతడికి బ్యాకప్ ప్లేయర్‌గా జెమీ ఓవర్టన్ ‌ను ఎంపిక చేసినట్లు తెలుస్తోంది. భారత్‌తో ఐదో టెస్ట్‌ కోసం ఇంగ్లాండ్ జట్టు ఏడుగురు పేస్ బౌలర్లు.. బెన్ స్టోక్స్, జోఫ్రా ఆర్చర్, గస్‌ అట్కిన్సన్, బ్రైడన్ కార్స్, జెమీ ఓవర్టన్, జోష్ టంగ్, క్రిస్ వోక్స్‌ ఉన్నారు. ప్రస్తుతం సిరీస్‌లో ఇంగ్లాండ్ 2-1తో ఆధిక్యంలో ఉంది. ఈ సిరీస్‌ను చేజిక్కించుకోవాలంటే ఐదో మ్యాచ్‌లో ఇంగ్లాండ్ గెలవడం లేదా డ్రా చేసుకోవడం చేయాలి. ఓడిపోతే మాత్రం సిరీస్ 2-2తో సమం అవుతుంది. జులై 31 నుంచి ఈ మ్యాచ్ లండన్‌లోని కెన్నింగ్టన్ ఓవల్‌లో జరగనుంది.

ఐదో టెస్ట్‌ కోసం ఇంగ్లండ్‌ టీమ్‌:

బెన్ స్టోక్స్ (కెప్టెన్), జోఫ్రా ఆర్చర్, గస్ అట్కిన్సన్, జాకబ్ బెథెల్‌, హ్యారీ బ్రూక్, బ్రైడాన్ కార్స్, జాక్ క్రాలీ, లియామ్ డాసన్, బెన్ డకెట్, జేమీ ఓవర్టన్, ఓలీ పోప్, జో రూట్, జేమీ స్మిత్, జోష్ టంగ్, క్రిస్ వోక్స్