టీ20 వరల్డ్‌కప్‌కి ఆస్ట్రేలియా ఓపెనర్స్ ఫిక్స్

ఐసీసీ టీ20 వరల్డ్ కప్ ఫీవర్ అప్పుడే మొదలయ్యింది. వచ్చే ఏడాది జరగనున్న పొట్టి కప్ కోసం జట్లన్నీ ఇప్పటి నుంచే సిద్ధమవుతున్నాయి. ఆసియా దేశాలన్నీ ఆసియా కప్‌తో బిజీగా ఉంటే.. మిగతా దేశాలు కూడా టీ20 సిరీస్‌లతో బిజీ అవుతున్నాయి. ఆస్ట్రేలియా జట్టు అయితే ఏకంగా తమ ఓపెనర్లు ఎవరు, ఏంటీ అనేది కూడా డిక్లేర్ చేసేసింది.

ఐసీసీ టీ20 వరల్డ్‌కప్ 2026 కోసం మిచెల్ మార్ష్ , ట్రావిస్ హెడ్‌లు ఓపెనర్లుగా బరిలోకి దిగుతున్నారు. ఈ విషయాన్ని మార్షే నేరుగా మీడియాతో చెప్పాడు. సౌతాఫ్రికాతో టీ20 సిరీస్ నేపథ్యంలో అతను ప్రెస్ కాన్ఫరెన్స్‌లో పాల్గొన్నాడు. ఇప్పటి వరకు ఈ ఇద్దరూ టీ20ల్లో ఓపెనింగ్ అయితే చేయలేదు. కానీ వన్డేల్లో మాత్రం ఈ జోడీ అద్భుత భాగస్వామ్యం కనబరిచారు. ఈ ఇద్దరూ కేవలం 5 ఇన్నింగ్స్‌లలో 70.50 యావరేజ్‌తో 282 పరుగులు జోడించారు. అన్ని ఫార్మాట్లలో కలిపి 14 ఇన్నింగ్స్‌లలో 504 పరుగులు చేశారు.

డేవిడ్ వార్నర్ రిటైర్డ్ అయిన తర్వాత ఆస్ట్రేలియా మ్యాట్ షార్ట్, గ్లెన్ మ్యాక్స్‌వెల్, జేక్ ఫ్రేజర్ మెక్‌గర్క్‌ను ఓపెనర్లుగా పరీక్షించింది. కానీ ఈ ప్రయోగాలన్నీ విఫలమవ్వడంతో మార్ష్ - హెడ్ జోడీతో వరల్డ్‌కప్‌ బరిలో దిగాలని నిర్ణయించుకుంది. ఐసీసీ టీ20 వరల్డ్‌కప్ నెంబర్ 3లో ఆడి ఫైనల్‌‌లో మ్యాన్ ఆఫ్ ది మ్యాచ్ అవార్డు గెలుచుకున్న మార్ష్.. ఇప్పుడు ఓపెనర్‌ పాత్ర పోషించడానికి సిద్ధమయ్యాడు. వెస్టిండీస్‌తో ఇటీవల జరిగిన 5-0 సిరీస్‌లోనూ ఓపెనర్‌గా ఆడినప్పటికీ పెద్దగా ప్రభావం చూపలేదు.

వెస్టిండీస్‌పై జరిగిన టీ20 సిరీస్‌లో టిమ్ డేవిడ్ కీలక పాత్ర పోషించాడు. కేవలం 37 బంతుల్లోనే సెంచరీ చేసి ఆసీస్‌కు అద్భుత విజయాన్ని అందించాడు. ఐపీఎల్ 2025లోనూ ఆర్సీబీ తరఫున ఎన్నో కీలక ఇన్నింగ్స్‌లు ఆడాడు. టిమ్ డేవిడ్ ఇప్పుడు ఆస్ట్రేలియా జట్టు కీ ప్లేయర్‌గా మారాడంటూ మార్ష్ అన్నాడు.

సౌతాఫ్రికాతో మూడు మ్యాచ్‌ల టీ20 సిరీస్ ఆడేందుకు ఆస్ట్రేలియా సిద్ధమైంది. ఆగస్టు 10 నుంచి 16 వరకు సఫారీ గడ్డపై ఆసీస్ పర్యటించనుంది. తొలి టీ20 ఆగస్టు 10న జరగనుంది. టీ20 వరల్డ్‌కప్‌ను దృష్టిలో ఉంచుకుని ఆస్ట్రేలియా తమ స్క్వాడ్‌ను ప్రకటించింది.

ఆస్ట్రేలియా స్క్వాడ్

మిచెల్ మార్ష్ (కెప్టెన్), సీన్ అబాట్, టిమ్ డేవిడ్, ద్వార్షుయీస్, నాథన్ ఎలిస్, కామెరూన్ గ్రీన్, జోష్ హేజెల్‌వుడ్, ట్రావిస్ హెడ్ , జోష్ ఇంగ్లిష్, మ్యాట్ క్యూనమన్, గ్లెన్ మ్యాక్స్‌వెల్, మిచెల్ ఓవెన్, మ్యాథ్యూ షార్ట్, ఆడమ్ జంపా.