‘వెరీ గుడ్‌’ ‘సంతృప్తికరం’.. భారత్, ఇంగ్లాండ్ టెస్ట్ సిరీస్‌ పిచ్‌లకు ఐసీసీ రేటింగ్స్‌

భారత్‌, ఇంగ్లాండ్ జట్ల మధ్య జరిగిన అండర్సన్ - టెండూల్కర్ ట్రోఫీ 2-2తో సమమైన విషయం తెలిసిందే. మొత్తంగా ఐదు టెస్ట్‌లు కూడా.. ఐదో రోజు వరకూ జరిగాయి. ప్రతి మ్యాచ్ కూడా ఉత్కంఠభరితంగా సాగింది. ప్రేక్షకులను చివరి వరకూ సీట్లపై కూర్చోబెట్టింది. ఈ సిరీస్‌లో ఇరు జట్లూ రెండేసి మ్యాచుల్లో గెలవగా.. ఒక టెస్టు మాత్రం డ్రాగా ముగిసింది. భారత్ నుంచి కెప్టెన్ శుభ్‌మన్ గిల్.. ఇంగ్లాండ్ నుంచి హ్యారీ బ్రూక్ ప్లేయర్‌ ఆఫ్ ది సిరీస్ అవార్డులను గెలుచుకున్నారు. అయితే ఈ సిరీస్‌కు ఉపయోగించిన పిచ్‌లపై ఐసీసీ తాజాగా రేటింగ్స్ రిలీజ్ చేసింది. మొదటి నాలుగు టెస్ట్‌ల వివరాలను పొందుపర్చింది.

హెడింగ్లే, లీడ్స్‌: వెరీ గుడ్‌..

ఈ సిరీస్‌లో తొలి టెస్ట్ లీడ్స్‌లోని హెడింగ్లేలో జరిగింది. ఈ మ్యాచ్‌లో భారత్ నిర్దేశించిన 373 పరుగుల లక్ష్యాన్ని ఇంగ్లాండ్ ఛేదించి విజయం సాధించింది. ఇక్కడి పిచ్‌కు ఐసీసీ ‘వెరీ గుడ్‌’ అని రేటింగ్‌ ఇచ్చింది. ఔట్‌ఫీల్డ్‌కు కూడా అదే రేటింగ్ ఇచ్చింది.

‘ఎడ్జ్‌బాస్టన్‌’ సంతృప్తికరం..

రెండో టెస్ట్ బర్మింగ్‌హామ్‌లోని ఎడ్జ్‌బాస్టన్‌లో జరిగింది. ఇందులో గెలిచి, భారత్ సిరీస్‌లో బోణీ కొట్టింది. బుమ్రా లేకున్నా సిరాజ్, ఆకాశ్‌ దీప్‌ అద్భుతంగా బౌలింగ్‌ చేసి జట్టును గెలిపించారు. ఈ పిచ్‌కు ‘సంతృప్తికరం’ అని.. ఔట్‌ఫీల్డ్‌కు ‘వెరీ గుడ్‌’ అని ఐసీసీ రేటింగ్ ఇచ్చింది.

లార్డ్స్‌కూ అదే రేటింగ్..

లార్డ్స్ వేదికగా జరిగిన మూడో టెస్టులో టీమిండియా 22 పరుగుల తేడాతో ఓడిపోయింది. దీంతో సిరీస్‌లో ఇంగ్లాండ్ 2-1తో ఆధిక్యంలోకి వెళ్లింది. ఈ మైదానం పిచ్‌కు ‘సంతృప్తికరం’.. ఔట్ ఫీల్డ్‌కు ‘వెరీ గుడ్‌’ అనే రేటింగ్స్ వచ్చాయి.

మాంచెస్టర్ పిచ్‌ ‘సంతృప్తికరం’..

ఈ సిరీస్‌లో భాగంగా మాంచెస్టర్‌ వేదికగా నాలుగో టెస్ట్ జరిగింది. ఇందులో చివరి ఐదు సెషన్లు ఇంగ్లాండ్ బౌలర్లను కాచుకున్న భారత బ్యాటర్లు మ్యాచ్‌ను డ్రా చేశారు. రవీంద్ర జడేజా, వాషింగ్టన్ సుందర్ అజేయ సెంచరీలతో సత్తాచాటారు. ఈ పిచ్‌కు ఐసీసీ ‘సంతృప్తికరం’.. ఔట్‌ఫీల్డ్‌కు ‘వెరీ గుడ్‌’ రేటింగ్‌ను ఇచ్చింది. ఐదో టెస్ట్‌ జరిగిన ఓవల్ పిచ్‌కు ఐసీసీ ఇంకా రేటింగ్ ఇవ్వలేదు. ఈ మ్యాచ్‌లో భారత్ ఆరు రన్స్ తేడాతో గెలిచి.. సిరీస్‌ను 2-2తో సమం చేసింది.