టీమిండియా భవిష్యత్ పేస్ దళంపై బీసీసీఐ ప్రత్యేక దృష్టి

భారత క్రికెట్‌లో జస్‌ప్రీత్ బుమ్రా, మహమ్మద్ సిరాజ్, మహమ్మద్ షమీలకు వారసులుగా నిలిచే తర్వాతి తరం ఫాస్ట్ బౌలర్లను సిద్ధం చేసేందుకు బీసీసీఐ నడుం బిగించింది. ఈ దిశగా కీలక అడుగు వేస్తూ, దేశవాళీ సీజన్ ప్రారంభానికి ముందు యువ పేసర్ల కోసం బెంగళూరులో ఒక ప్రత్యేక శిక్షణా శిబిరాన్ని నిర్వహించింది.బెంగళూరులోని బీసీసీఐ సెంటర్ ఆఫ్ ఎక్సలెన్స్  వేదికగా జరిగిన ఈ ఫాస్ట్ బౌలింగ్ డెవలప్‌మెంట్ క్యాంపులో మొత్తం 22 మంది బౌలర్లు పాల్గొన్నారు. వీరిలో ప్రత్యేకంగా గుర్తించిన 14 మంది పేసర్లతో పాటు, అండర్-19 జట్టుకు చెందిన 8 మంది యువ ఆటగాళ్లు ఉన్నారు. జాతీయ క్రికెట్ అకాడమీ ఫాస్ట్ బౌలింగ్ కోచ్ ట్రాయ్ కూలే మార్గదర్శకత్వంలో ఈ శిబిరం జరిగింది. బౌలర్ల ఫిట్‌నెస్‌ను అంచనా వేయడంతో పాటు, వారి నైపుణ్యాలు, వ్యూహాత్మక పరిజ్ఞానాన్ని మెరుగుపరచడంపై ప్రధానంగా దృష్టి సారించినట్లు బీసీసీఐ తన 'ఎక్స్' ఖాతాలో పోస్ట్ చేసిన వీడియోలో పేర్కొంది.ఇటీవల ఇంగ్లండ్ పర్యటనలో టెస్టు అరంగేట్రం చేసిన అన్షుల్ కాంబోజ్‌తో పాటు, ఐపీఎల్‌లో సత్తా చాటిన హర్షిత్ రాణా ఈ శిబిరంలో కఠోర సాధన చేస్తూ కనిపించారు. వీరితో పాటు సిమర్‌జీత్ సింగ్, తుషార్ దేశ్‌పాండే, సూర్యాంశ్ షెడ్గే వంటి పలువురు యువ ఆటగాళ్లు ఈ క్యాంపులో పాల్గొన్నారు. ఆసక్తికరంగా, శ్రేయస్ అయ్యర్, సుయాశ్ శర్మ కూడా సీఓఈలో ఫిట్‌నెస్ పరీక్షల కోసం హాజరయ్యారు. విజయ్‌కుమార్ వైశాఖ్, ఖలీల్ అహ్మద్, యశ్ ఠాకూర్, రాజ్ బావా కూడా ఈ క్యాంపులో భాగమైనట్లు సమాచారం.ఆగస్టు 28 నుంచి దులీప్ ట్రోఫీతో దేశవాళీ 2025/26 సీజన్ ప్రారంభం కానుంది. ఈ నేపథ్యంలో, భవిష్యత్తులో అంతర్జాతీయ టోర్నమెంట్లలో సీనియర్ బౌలర్లపై భారం తగ్గించేలా బలమైన పేస్ దళాన్ని తయారు చేయడమే లక్ష్యంగా బీసీసీఐ ఈ కార్యక్రమాన్ని చేపట్టింది.