అందుకే సడెన్ రిటైర్మెంట్,,,, అశ్విన్‌

టీమిండియా మాజీ క్రికెటర్ రవిచంద్రన్ అశ్విన్ .. అకస్మాత్తుగా అంతర్జాతీయ క్రికెట్‌కు వీడ్కోలు పలికి అందర్నీ షాక్ చేశాడు. బోర్డర్ గవాస్కర్ ట్రోఫీ ఆడేందుకు ఆస్ట్రేలియాకు వెళ్లిన అతడు.. సిరీస్ మధ్యలోనే రిటైర్మెంట్ ప్రకటించాడు. మూడో టెస్ట్ తర్వాత మీడియా ముందుకు వచ్చి తాను అంతర్జాతీయ క్రికెట్‌ నుంచి తప్పుకుంటున్నట్లు వెల్లడించాడు. దీంతో క్రికెట్ ప్రపంచం ఒక్కసారిగా షాక్ అయింది. ఇలా విదేశీ పర్యటన కొనసాగుతుండగానే రిటైర్మెంట్ ప్రకటించడం ఏంటని చాలా మంది ఆశ్చర్యం వ్యక్తం చేశారు. అయితే తాజాగా ఓ ఇంటర్వ్యూలో మాట్లాడిన అశ్విన్.. తాను ఎందుకు అలా రిటైర్మెంట్ నిర్ణయం తీసుకోవాల్సి వచ్చిందో వెల్లడించాడు.

“నేను అదే సరైన సమయం (రిటైర్మెంట్‌కు) అని భావించా. నా వయసు కూడా ఎక్కువైందని అనిపించింది. విదేశీ పర్యటనలకు వెళ్లడం వరకు ఓకే. కానీ తుది జట్టులో చోటు లేకుండా రిజర్వ్‌ బెంచ్‌కే పరిమితం కావడం నాకు నచ్చలేదు. వాస్తవానికి నేను ఇంకాస్త ముందుగానే.. అంటే 34-35 ఏళ్లలోనే వీడ్కోలు పలకాలనుకున్నా. కుటుంబంతో వీలైనంత ఎక్కువ సమయం గడిపాలని నేను అనుకోవడం కూడా ఇందుకు కారణం” అని అశ్విన్ చెప్పుకొచ్చాడు.

కాగా రవిచంద్రన్ అశ్విన్ 2010లో టీమిండియా తరఫున అరంగేట్రం చేశాడు. బ్యాటింగ్‌, బౌలింగ్‌లోనూ సత్తాచాటి అగ్రశ్రేణి ఆల్‌రౌండర్‌గా మారాడు. భారత్‌ తరఫున 287 మ్యాచ్‌లు ఆడిన అశ్విన్.. మొత్తంగా 765 వికెట్లు తీశాడు. టెస్టుల్లో 6 సెంచరలు సహా.. 4,394 అంతర్జాతీయ పరుగులు చేశాడు. అశ్విన్ తన కెరీర్‌లో 106 టెస్టులు, 116 వన్డేలు, 65 టీ20 మ్యాచ్‌లు ఆడాడు. టెస్టుల్లో అత్యధికంగా 537 వికెట్లు తీశాడు. వన్డేల్లో 156, టీ20ల్లో 72 వికెట్లు పడగొట్టాడు. ఇక అంతర్జాతీయ క్రికెట్‌కు గుడ్‌బై చెప్పినప్పటికీ అశ్విన్.. ఐపీఎల్‌లో ఆడుతున్నాడు. చెన్నై సూపర్ కింగ్స్ జట్టు తరఫున ప్రాతినిధ్యం వహిస్తున్నాడు. సొంత రాష్ట్రం తమిళనాడులో జరుగుతున్న తమిళనాడు ప్రీమియర్‌ లీగ్‌లోనూ ఆడుతున్నాడు. ఐపీఎల్ 2026కి ముందు అశ్విన్.. సీఎస్కేను వీడనున్నట్లు ప్రచారం జరుగుతోంది.