సముద్రంలో ముంచిన ‘గూగుల్ మ్యాప్‌’.. కారుతో సహా ఐదుగురు

ప్రియురాలితో సవాల్ చేసి.. గూగుల్ మ్యాప్స్‌ను నమ్ముకుని కారు నడిపి ప్రమాదంలో పడ్డాడు. మద్యం మత్తులో ఉన్న యువకులు గూగుల్ మ్యాప్ నమ్ముకుని వాహనం నడిపారు. అయితే, చివరకు అది వారిని సముద్రంలోకి తీసుకెళ్లింది. కానీ, స్థానికులు ప్రమాదాన్ని పసిగట్టి వెంటనే స్పందించడంతో వారు ప్రాణాలతో బయటపడ్డారు. లేదంటే సముద్రంలో కొట్టుకుపోయేవారు. అలల్లో కొట్టుకుపోతున్న కారును ట్రాక్టర్‌ సాయంతో బయటకు లాగి, ఐదుగురు ప్రాణాలు కాపాడారు. గూగుల్ మ్యాప్‌తో ప్రయాణించి, ప్రమాదంలో చిక్కుకుని త్రుటిలో వారు తప్పించుకున్న ఈ ఘటన తమిళనాడులోని కడలూరు తీరంలో చోటుచేసుకుంది. కొత్త ప్రదేశాలకు వెళ్లేటప్పుడు సులభంగా గమ్యానికి చేరుకోడానికి గూగుల్ మ్యాప్‌లను నమ్ముకుంటాం.

వివరాల్లోకి వెళ్తే.. చెన్నైకి చెందిన ముగ్గురు అబ్బాయిలు, ఇద్దరు అమ్మాయిలు కారులో విహార యాత్రకు వచ్చారు. గురువారం ఉదయం కడలూరులోని సోతికుప్పం సమీపంలోని తీరం వెంబడి గూగుల్ మ్యాప్స్ సహాయంతో కారులో ప్రయాణించారు. మద్యం మత్తులో ఉన్నవారు కారును సముద్రంలోకి నడిపారు. ఆ వాహనం సముద్రంలోకి వెళ్లడం గమనించిన స్థానిక మత్స్యకారులు తక్షణమే స్పందించారు. సముద్రంలో దూకి కారులో చిక్కుకున్న ఐదుగుర్ని ముందు బయటకు తీసుకొచ్చారు. అనంతరం కారును కూడా ట్రాక్టర్‌తోపైకి లాగి ఒడ్డుకు తీసుకొచ్చారు. ఈ ఘటనకు సంబంధించిన వీడియోలు ప్రస్తుతం వైరల్ అవుతున్నాయి.

తాగిన మత్తులో తన ప్రియురాలు, స్నేహితులు ఛాలెంజ్‌కు రెచ్చిపోయిన ఓ యువకుడు వల్లే ఇదంతా జరిగింది. అతడు బెట్టింగు కాసి గూగుల్ మ్యాప్స్‌తో కారును సముద్రంలోకి నడిపాడు. ఘటనపై పోలీసులకు సమాచారం అందడంతో వారు అక్కడకు చేరుకుని ఐదుగుర్ని అదుపులోకి తీసుకున్నారు. గతంలో కేరళ సహా అనే చోట్ల ఇలాంటి ఘటనలు చోటుచేసుకున్నాయి. కేరళకు చెందిన యువ వైద్యులు.. గూగుల్ మ్యాప్‌ను నమ్ముకుని ప్రాణాలు కోల్పోయారు. ఇటీవల రాజస్థాన్‌లోని ఓ కుటుంబం గూగుల్ మ్యాప్స్‌ పెట్టుకుని వాహనం నడిపి ప్రమాదంలో పడింది. ఈ ఘటనలో ఐదుగురు మృతిచెందగా.. నలుగుర్ని స్థానికులు, పోలీసులు కాపాడారు. ఆగస్టు 22న భిల్వారాలోని సవాయిభోజ్‌ ఆలయంలో జరిగిన ఆధ్యాత్మిక కార్యక్రమానికి వాహనంలో వెళ్లిన కుటుంబంలోని 9 మంది .. అర్ధరాత్రి అక్కడ నుంచి తిరుగుపయనమయ్యారు. ఆ సమయంలో భారీగా వర్షం కురుస్తుండటంతో రూట్ మ్యాప్‌ కోసం గూగుల్‌ నమ్ముకున్నారు. కానీ, చివరకు అది రెండేళ్లుగా మూసివేసిన బనాసీ నది వంతెనపైకి తీసుకెళ్లింది. కాజ్‌వే‌పైకి వెళ్లిన సమయంలో ఒక్కసారిగా వరద పోటెత్తడంతో వాహనం కొట్టుకుపోయింది. ఆ నదిపై ఉన్న మాతృకుండియా డ్యామ్ గేట్లు ఆ సమయంలో తెరవడంతో ప్రమాదం ముంచుకొచ్చింది.