మూడుచోట్ల పేలుడు పదార్థాలు పెట్టామంటూ..ఢిల్లీ హైకోర్టుకు బాంబు బెదిరింపులు

దేశ రాజధాని ఢిల్లీలో మరోసారి బాంబు బెదిరింపులు తీవ్ర కలకలం సృష్టించాయి. ఈమధ్య కాలంలోనే నగరంలోని అనేక పాఠశాలలకు వరుసగా బాంబు బెదిరింపులు వచ్చిన ఉదంతం మరువకముందే.. తాజాగా ఢిల్లీ హైకోర్టుకు కూడా ఇదే తరహా బెదిరింపులు వచ్చాయి. ఈ ఘటనతో పోలీసులు, భద్రతా బలగాలు ఒక్కసారిగా అప్రమత్తం అయ్యాయి. కోర్టు ప్రాంగణంలో భయానక వాతావరణం నెలకొంది.

ఢిల్లీ పోలీసు వర్గాల నుంచి అందిన సమాచారం ప్రకారం.. శుక్రవారం రోజు ఉదయం ఢిల్లీ హైకోర్టుకు ఒక ఈ-మెయిల్ వచ్చింది. ఆ మెయిల్‌లో "మేము కోర్టు ప్రాంగణంలో మూడు బాంబులు అమర్చాం. మరికాసేపట్లో అవి పేలతాయి" అని బెదిరించారు. అంతేకాకుండా మధ్యాహ్నం 2 గంటలలోపు కోర్టును ఖాళీ చేయాలని అందులో స్పష్టంగా పేర్కొన్నారు. అయితే ఏయే ప్రదేశాల్లో పేలుడు పదార్థాలు పెట్టారనేది మాత్రం ఆ మెయిల్‌లో తెలియజేయలేదు. ఈ బెదిరింపు మెయిల్‌తో అప్రమత్తమైన అధికారులు వెంటనే ఉన్నతాధికారులకు సమాచారం అందించారు.

దీంతో పోలీసు, బాంబ్ స్క్వాడ్‌, డాగ్ స్క్వాడ్ బృందాలు ఘటనా స్థలానికి చేరుకున్నాయి. ముందు జాగ్రత్త చర్యగా.. కోర్టులో ఉన్న న్యాయమూర్తులు, న్యాయవాదులు, సిబ్బంది, సందర్శకులను తక్షణమే భవనం నుంచి బయటకు పంపించారు. ప్రాంగణమంతా ఒక్కసారిగా ఖాళీ అయ్యింది. నిమిషాల వ్యవధిలోనే కోర్టు బయట భారీ ఎత్తున భద్రతా సిబ్బంది మోహరించారు. కోర్టు ప్రాంగణంలోకి ఎవరినీ అనుమతించలేదు. మరోవైపు బాంబ్ డిటెక్షన్ అండ్ డిస్పోజల్ స్క్వాడ్ బృందాలు కలిసి కోర్టు భవనం లోపల, బయట క్షుణ్ణంగా తనిఖీలు చేపట్టాయి. సుమారు గంట చేసిన ఈ తనిఖీల్లో ఎలాంటి పేలుడు పదార్థాలు గానీ, అనుమానాస్పద వస్తువులు గానీ లభించలేదు. దీంతో అది తప్పుడు బెదిరింపు అని తేలింది. అయినప్పటికీ.. భద్రతా పరమైన ప్రమాణాల దృష్ట్యా పోలీసులు పూర్తి స్థాయిలో తనిఖీలు కొనసాగించారు.

ఈ బాంబు బెదిరింపుతో కోర్టు కార్యకలాపాలు పూర్తిగా నిలిచిపోయాయి. పలు ముఖ్యమైన విచారణలు, కేసుల వాదనలు వాయిదా పడ్డాయి. కోర్టు ప్రాంగణం బయట పెద్ద సంఖ్యలో న్యాయవాదులు, కక్షిదారులు వేచి ఉండాల్సి వచ్చింది. ఈ ఘటనపై కేసు నమోదు చేసుకున్న పోలీసులు, ఈ బెదిరింపు మెయిల్ ఎక్కడ నుంచి వచ్చిందనే దానిపై దర్యాప్తు చేపట్టారు. ఈ-మెయిల్ పంపిన వ్యక్తిని గుర్తించేందుకు సైబర్ నిపుణుల సహాయం తీసుకుంటున్నారు. గతంలో పాఠశాలలకు వచ్చిన బెదిరింపులతో దీనికి ఏమైనా సంబంధం ఉందా అనే కోణంలో కూడా పోలీసులు విచారణ జరుపుతున్నారు. ఈ ఘటన రాజధానిలో భద్రతపై మరోసారి ఆందోళనలను పెంచింది. ముఖ్యంగా హైకోర్టు వంటి కీలకమైన భవనాలకు ఇలాంటి బెదిరింపులు రావడం తీవ్రమైన విషయమని నిపుణులు పేర్కొన్నారు.