అపార్ట్మెంట్లో పేలిన వాషింగ్ మెషీన్, గ్యాస్ సిలిండర్
Crime | Suryaa Desk | Published : Tue, Sep 23, 2025, 09:37 PM
విశాఖపట్నంలోని ఓ అపార్ట్మెంట్లో వాషింగ్ మెషీన్, గ్యాస్ సిలిండర్ పేలిన ఘటన సోమవారం ఉదయం చోటు చేసుకుంది. అపార్ట్మెంట్లో ఒక్కసారిగా భారీ పేలుడు సంభవించడంతో చుట్టు పక్కల వారు భయభ్రాంతులకు గురయ్యారు. అయితే, అదృష్టవశాత్తూ ఈ ప్రమాదంలో ఎలాంటి ప్రాణనష్టం జరగకపోవడంతో అంతా ఊపిరి పీల్చుకున్నారు. విమాననగర్ లైన్ నెంబర్ 6లో ఉన్న సంపంగినీస్ సిగ్నేచర్స్ అపార్ట్మెంట్ మూడో ఫ్లోర్లోని ఫ్లాటులో సోమవారం ఉదయం ఈ అగ్ని ప్రమాదం జరిగింది. ఇంటిలో సభ్యులు ఎవరి పనిలో వారు ఉండగా.. ముందుగా కిచెన్లో మంటలు చెలరేగాయి. ఆ తర్వాత ఆ మంటలు బాల్కనీలో ఉన్న వాషింగ్ మెషీన్కి వ్యాపించాయి. మంటలను గమనించిన ఇంట్లోని సభ్యులు, మిగిలిన ఫ్లాట్లలో ఉన్నవారు హుటాహుటిన రంగంలోకి దిగారు. మంటలను అదుపుచేసేందుకు ప్రయత్నించారు. వాళ్లు మంటలను ఆపే ప్రయత్నం చేస్తున్న క్రమంలో బాల్కనీలో ఒక్కసారిగా భారీ పేలుడు సంభవించింది. ఈ పేలుడు ధాటికి బాల్కనీ గోడ కూలిపోయింది. కిచెన్లో చిమ్నీ సహా గాజు వస్తువులన్నీ పేలుపోయాయి. ఈ గాజు పెంకులు గుచ్చుకుని ముగ్గురికి గాయాలయ్యాయి. సమాచారం అందుకున్న మర్రిపాలెం అగ్నిమాపక సిబ్బంది.. హుటాహుటిన సంఘటనా స్థలానికి చేరుకుని మంటలను అదుపు చేశారు. గాయపడినవారిని కేజీహెచ్కు తరలించారు.
|
|