అరెస్టు భయంతో సుదీర్ఘ మార్గంలో నెతన్యాహు ప్రయాణం

ఐక్యరాజ్య సమితి సర్వప్రతినిధి సభ సమావేశాల నిమిత్తం ఇజ్రాయెల్ ప్రధాని బెంజమిన్ నెతన్యాహు అమెరికా వెళ్లారు. అయితే సాధారణ వాయు మార్గంలో కాకుండా అసాధారణ మార్గంలో ప్రయాణించి అందరినీ ఆశ్చర్యానికి గురి చేశారు. ముఖ్యంగా యుద్ధ నేరాల ఆరోపణల నేపథ్యంలో తనపై జారీ అయిన అరెస్టు వారెంట్‌ల నుంచి తప్పించుకోవడానికే ఆయన ఈ నిర్దిష్టమైన, సుదీర్ఘమైన మార్గాన్ని ఎంచుకున్నట్లు అంతర్జాతీయ పరిశీలకులు భావిస్తున్నారు. ఈ కారణంగానే ఆయన ప్రయాణంలో యూరప్ గగనతలంపై ఎక్కువ భాగం ప్రయాణించకుండా జాగ్రత్త పడినట్లు అంచనా వేస్తున్నారు.

ఇజ్రాయెల్ ప్రధాన మంత్రి అధికారిక జెట్ "వింగ్స్ ఆఫ్ జియోన్" గురువారం ఐక్యరాజ్య సమితి జనరల్ అసెంబ్లీకి వెళ్తున్నప్పుడు.. సాధారణంగా తీసుకునే మార్గానికి విరుద్ధంగా యూరప్ గగనతలాన్ని దాటేస్తూ ఒక వంపు మార్గం గుండా వెళ్లింది. ఫ్లైట్ ట్రాకింగ్ డేటా ఈ అసాధారణ మార్గాన్ని స్పష్టంగా చూపించింది. ముఖ్యంగా గ్రీస్, ఇటలీ శివారు ప్రాంతాల పైనుంచి మధ్యధరా సముద్రం దాటి అక్కడి నుంచి జీబ్రాల్టర్ జలసంధి మీదుగా అట్లాంటిక్ గగనతలంలోకి వెళ్లినట్లు తేలింది. దీనివల్ల ప్రయాణ దూరంతో పాటు సమయం కూడా పెరిగినట్లు విమానయాన నిపుణులు పేర్కొన్నారు.

సాధారణం కంటే 373 మైళ్లు (600 కిలో మీటర్లు) ఎక్కువ దూరం ప్రయాణించి నెతన్యాహు అమెరికా వెళ్లినట్లు చెప్పారు. ఈ విషయం కాస్తా వెలుగులోకి రావడంతో అంతా షాక్ అవుతున్నారు. అరెస్టు భయంతోనే ఇలా చేశారని అంటున్నారు. గతేడాది నవంబర్‌లో అంతర్జాతీయ క్రిమినల్ కోర్ట్ (ICC) ఇజ్రాయెల్‌పై తీవ్ర ఆరోపణలు చేస్తూ... నెతన్యాహు, అతని మాజీ రక్షణ మంత్రి యోవ్ గాలంట్‌పై యుద్ధ నేరాలు, గాజాలో మానవత్వంపై నేరాలకు పాల్పడ్డారనే ఆరోపణలపై అరెస్టు వారెంట్‌లు జారీ చేసింది. ఈ ఆరోపణలను ఇజ్రాయెల్ బలంగా ఖండిస్తున్నప్పటికీ.. ఐసీసీ సభ్య దేశాలు ఆ వారెంట్‌లను అమలు చేయాల్సిన బాధ్యత ఉంటుంది. ఈ నేపథ్యంలోనే యూరప్‌లోని ఐసీసీ సభ్య దేశాలు బహిరంగంగానే నెతన్యాహు తమ గడ్డపైకి వస్తే అరెస్టు చేస్తామని ప్రకటించాయి. ఈ పరిస్థితిని నివారించేందుకే నెతన్యాహు విమానం జాగ్రత్తగా మార్గాన్ని ఎంచుకున్నట్లు తెలుస్తోంది.

విమానం మార్గాన్ని మార్చడానికి ఎలాంటి అధికారిక వివరణ ఇవ్వనప్పటికీ.. ఫ్రాన్స్ గగనతలాన్ని ఉపయోగించడానికి ఇజ్రాయెల్ అనుమతి కోరినట్లు ఒక ఫ్రెంచ్ దౌత్య వర్గం ధృవీకరించినట్లు 'టైమ్స్ ఆఫ్ ఇజ్రాయెల్' తెలిపింది. అనుమతి మంజూరు అయినప్పటికీ.. ఇజ్రాయెల్ ప్రతినిధి బృందం ఆ మార్గాన్ని ఉపయోగించకూడదని నిర్ణయించుకుంది. "వారు మరొక మార్గాన్ని ఎంచుకున్నారు, అందుకు గల కారణం మాకు తెలియదు" అని ఫ్రెంచ్ అధికారి వ్యాఖ్యానించారు. నెతన్యాహు శుక్రవారం ఐక్యరాజ్యసమితి జనరల్ అసెంబ్లీలో ప్రసంగించనున్నారు. ఆ తర్వాత వచ్చే వారం అమెరికా అధ్యక్షుడు డొనాల్డ్ ట్రంప్‌తో సమావేశం కోసం వాషింగ్టన్‌కు వెళ్లనున్నారు.