ఉగ్రవాదులతో పాటు వారి వెనుకున్న శక్తులనూ వదిలిపెట్టమ‌ని హెచ్చరిక‌

ఐక్యరాజ్యసమితి  వేదికగా పాకిస్థాన్‌కు భారత్ గట్టిగా బదులిచ్చింది. తాము భారత్‌పై యుద్ధంలో గెలిచామంటూ పాక్ ప్రధాని షెహబాజ్ షరీఫ్ చేసిన వ్యాఖ్యలను ఎద్దేవా చేసింది. ధ్వంసమైన రన్‌వేలు, కాలిపోయిన సైనిక హ్యాంగర్లే విజయానికి సంకేతాలుగా కనిపిస్తే, ఆ విజయాన్ని పాకిస్థాన్ ఆస్వాదించవచ్చని భారత్ వ్యంగ్యంగా వ్యాఖ్యానించింది. అణు బెదిరింపులకు భయపడేది లేదని, ఉగ్రవాదులను, వారిని ప్రోత్సహిస్తున్న శక్తులను వదిలిపెట్టబోమని హెచ్చరించింది.ఐరాస సర్వసభ్య సమావేశంలో పాక్ ప్రధాని ప్రసంగానికి ‘రైట్ ఆఫ్ రిప్లై’ కింద భారత్ తరఫున ఫస్ట్ సెక్రటరీ పేతల్ గహ్లోత్ బదులిచ్చారు. ఉగ్రవాదాన్ని ప్రోత్సహించడమే పాకిస్థాన్ విదేశాంగ విధానంలో కీలకమని ఆమె ఆరోపించారు. "మే 9వ తేదీ వరకు భారత్‌పై మరిన్ని దాడులు చేస్తామని పాకిస్థాన్ బెదిరించింది. కానీ మే 10వ తేదీన మా దాడులతో వారి వైమానిక స్థావరాలు ధ్వంసమైన తర్వాత పోరాటాన్ని ఆపాలని పాక్ మిలిటరీయే మమ్మల్ని నేరుగా వేడుకుంది. ఈ విధ్వంసానికి సంబంధించిన చిత్రాలు బహిరంగంగానే అందుబాటులో ఉన్నాయి" అని ఆమె గుర్తుచేశారు. పాకిస్థాన్ డైరెక్టర్ జనరల్ ఆఫ్ మిలిటరీ ఆపరేషన్స్ మేజర్ జనరల్ కాషిఫ్ అబ్దుల్లా, భారత డీజీఎంఓ లెఫ్టినెంట్ జనరల్ రాజీవ్ ఘాయ్‌కు ఫోన్ చేసి కాల్పుల విరమణ కోరిన విషయాన్ని ఆమె బయటపెట్టారు.ఉగ్రవాదం విషయంలో భారత్ వైఖరి సుస్పష్టమని పేతల్ గహ్లోత్ చెప్పారు. "ఉగ్రవాదులను, వారి వెనకుండి నడిపిస్తున్న వారిని వేర్వేరుగా చూడబోం. ఇద్దరినీ బాధ్యులను చేస్తాం. అణు బ్లాక్‌మెయిల్ చాటున ఉగ్రవాదాన్ని కొనసాగించడానికి మేం అనుమతించం. అలాంటి బెదిరింపులకు భారత్ ఎప్పటికీ తలొగ్గదు" అని ఆమె స్పష్టం చేశారు. ఇటీవల జమ్మూకశ్మీర్‌లోని పహల్గామ్‌లో 26 మంది హిందూ, క్రైస్తవ పర్యాటకులపై జరిగిన దాడికి బాధ్యత వహించిన ‘ది రెసిస్టెన్స్ ఫ్రంట్ ’ అనే ఉగ్రవాద సంస్థను భద్రతా మండలిలో పాకిస్థాన్ కాపాడటానికి ప్రయత్నించిందని ఆమె ఆరోపించారు.భారత్ చేపట్టిన ‘ఆపరేషన్ సిందూర్’ను సమర్థిస్తూ, అది కేవలం పాకిస్థాన్‌లోని ఉగ్రవాద స్థావరాలను ధ్వంసం చేయడానికేనని వివరించారు. దశాబ్దాలుగా ఉగ్రవాద శిబిరాలను నడుపుతున్నామని పాక్ మంత్రులే అంగీకరించిన విషయాన్ని ఆమె ప్రస్తావించారు. ఇక కాల్పుల విరమణలో అమెరికా అధ్యక్షుడి జోక్యం ఉందన్న షరీఫ్ వాదనను కూడా ఆమె ఖండించారు. భారత్, పాకిస్థాన్ మధ్య ఏ సమస్య ఉన్నా ద్వైపాక్షికంగానే పరిష్కరించుకుంటామని, ఇందులో మూడో వ్యక్తి ప్రమేయానికి తావులేదని ఆమె స్ప‌ష్టం చేశారు.