'విద్యాధికారిని బెల్ట్‌తో కొట్టిన హెడ్ మాస్టర్'.. తనను వేధించడం వల్లే అలా చేశాడన్న మంత్రి

ఉత్తరప్రదేశ్‌లోని సీతాపూర్ జిల్లాలో ఒక హెడ్‌మాస్టర్, విద్యాశాఖ అధికారిపై బెల్టుతో దాడి చేసిన కేసు ట్విస్ట్ ఇచ్చింది. ఈ దాడిపై స్పందించిన యూపీ సాంకేతిక విద్యాశాఖ మంత్రి ఆశీష్ పటేల్.. కీలక విషయాలు వెల్లడించారు. ఈ దాడి అత్యంత దురదృష్టకరమని చెప్పిన మంత్రి.. సదరు కేసుపై పూర్తిస్థాయిలో విచారణ జరిపిస్తున్నట్లు వెల్లడించారు.

సీతాపూర్‌లోని నడ్వా ప్రాథమిక పాఠశాల హెడ్‌మాస్టర్‌ బ్రిజేంద్ర వర్మ, బేసిక్ ఎడ్యుకేషన్ ఆఫీసర్ అఖిలేష్ ప్రతాప్ సింగ్‌పై బెల్టుతో దాడి చేసిన ఘటన దేశవ్యాప్తంగా చర్చనీయాంశంగా మారింది. ఈ దాడికి సంబంధించిన వీడియో వైరల్ అయింది. కేవలం 20 సెకన్ల వీడియో క్లిప్ ఆధారంగా ఆ ఉపాధ్యాయుడిని నిందించడం సరికాదని మంత్రి ఆశీష్ పటేల్ తన అధికారిక 'ఎక్స్' ఖాతాలో పోస్టు పెట్టారు. చిన్న వీడియో చూసి ఒకేవైపు ఆలోచించి ఉపాధ్యాయుడిదే తప్పు అని తేల్చడం తప్పు అని పేర్కొన్నారు. దాడికి పాల్పడ్డ హెడ్‌మాస్టర్‌.. కష్టపడి పనిచేసే, నిజాయితీపరుడైన ఉపాధ్యాయుడు అని మంత్రి చెప్పుకొచ్చారు.

మంత్రి తన పోస్ట్‌లో, "సీతాపూర్‌లో ఉపాధ్యాయుడు-అధికారి మధ్య జరిగిన ఘటన చాలా బాధాకరం. కష్టపడి పనిచేసే, నిజాయితీపరుడైన బ్రిజేంద్ర వర్మకు తీవ్రమైన వేధింపులు ఎదురయ్యాయి. అందుకే ఆయన తన సహనం కోల్పోయి ఇలా ప్రవర్తించారు. కేవలం ఒక చిన్న వీడియో ఆధారంగా ఉపాధ్యాయుడిని నిందించడం అన్యాయం" అని రాసుకొచ్చారు.

బేసిక్ ఎడ్యుకేషన్ ఆఫీసర్ కార్యాలయంలోకి ఉపాధ్యాయుడు ప్రవేశించినప్పటి నుంచి బయటికి వెళ్లేవరకు ఉన్న సీసీటీవీ ఫుటేజీని పరిశీలించి, దోషులపై కఠిన చర్యలు తీసుకోవాలని మంత్రి డిమాండ్ చేశారు. "ఆ ఉపాధ్యాయుడు ఈ చర్యకు పాల్పడటానికి దారితీసిన పరిస్థితులు ఏమిటో బయటపడాలి. అసలు నిజం ఏమిటో తేలాలి" అని ఆయన అన్నారు. ఈ విషయమై తాను బేసిక్ ఎడ్యుకేషన్ మంత్రి సందీప్ సింగ్‌తో మాట్లాడానని, ఆయన నిష్పక్షపాతంగా విచారణ జరిపి దోషులపై కఠిన చర్యలు తీసుకుంటామని హామీ ఇచ్చినట్లు పటేల్ తెలిపారు.

ఈ కేసు వివరాల్లోకి వెళ్తే, నడ్వా ప్రాథమిక పాఠశాల హెడ్‌మాస్టర్ బ్రిజేంద్ర వర్మ తనతో పనిచేస్తున్న ఉపాధ్యాయురాలిని వేధిస్తున్నారని ఫిర్యాదు అందింది. దీంతో అధికారి అఖిలేష్ ప్రతాప్ సింగ్ హెడ్‌మాస్టర్‌ను తన కార్యాలయానికి పిలిపించారు. ఇద్దరు ఉపాధ్యాయులు ముఖాముఖీగా ఉన్నప్పుడు, అక్కడ ఉన్న వారందరూ బ్రిజేంద్ర వర్మనే తప్పు చేశారని చెప్పడంతో ఆయన ఒక్కసారిగా ఆగ్రహానికి లోనై తన బెల్ట్‌తో అధికారిపై దాడి చేశారు. ఈ ఘటన తర్వాత హెడ్‌మాస్టర్‌ను పోలీసులు అదుపులోకి తీసుకున్నారు. ఆయనను అధికారులు తక్షణమే సస్పెండ్ చేశారు. అయితే, ఇప్పుడు మంత్రి ప్రకటనతో ఈ కేసులో కొత్త కోణం వెలుగులోకి వచ్చింది.