ఐసీసీ టెస్ట్ ర్యాంకింగ్స్‌లో సిరాజ్ జోరు,,కెరీర్ బెస్ట్ ర్యాంక్ కైవసం

వెస్టిండీస్‌తో జరిగిన తొలి టెస్టులో ఏడు వికెట్లతో సత్తాచాటిన టీమిండియా స్టార్ పేసర్ మహమ్మద్ సిరాజ్.. ఐసీసీ టెస్టు బౌలర్ల ర్యాంకింగ్స్‌లో అదరగొట్టాడు. ఇటీవలి కాలంలో రెడ్‌బాల్ క్రికెట్‌లో సూపర్‌ ఫామ్‌ కనబరుస్తున్న ఈ హైదరాబాదీ బౌలర్‌లో కెరీర్‌లో అత్యుత్తమ రేటింగ్‌ సాధించాడు. తాజాగా మూడు స్థానాలు ఎగబాకి.. కెరీర్ బెస్ట్ అయిన 12వ ర్యాంక్‌కు చేరుకున్నాడు. అతడు ఇదే జోరు కొనసాగిస్తే.. త్వరలోనే టాప్‌-10లోకి వచ్చే అవకాశం ఉంది.

టాప్‌ ప్లేస్ బుమ్రాకే..

టెస్టు బౌలర్ల ర్యాంకింగ్స్‌లో భారత ప్రధాన పేసర్ జస్‌ప్రీత్ బుమ్రా అగ్రస్థానంలో నిలిచాడు. కొన్ని రోజులుగా ఇదే ప్లేసులో ఉన్న బుమ్రా.. తాజాగా తన స్థానాన్ని నిలబెట్టుకున్నాడు. ఇక జస్‌ప్రీత్ తర్వాతి స్థానాల్లో దక్షిణాఫ్రికా పేసర్ కగిసో రబాడ, న్యూజిలాండ్‌కు చెందిన మ్యాట్‌ హెన్రీ, ఆస్ట్రేలియా కెప్టెన్‌ ప్యాట్‌ కమిన్స్‌, ఆస్ట్రేలియా పేసర్‌ జోష్‌ హాజిల్‌వుడ్‌ ఉన్నారు. వీరంతా టాప్‌-5లో చోటు దక్కించుకున్నారు. ఆ తర్వాతి స్థానాల్లో నొమన్‌ అలీ, స్కాట్‌ బోలాండ్‌, నాథన్‌ లియోన్‌, మార్కో యాన్సెన్‌, మిచెల్‌ స్టార్క్‌, గస్‌ అట్కిన్సన్‌ ఉన్నారు. ఇపుడు జేడన్‌ సీల్స్‌, ప్రభాత్‌ జయసూర్య, షమాన్‌ జోసెఫ్‌లను వెనక్కి నెట్టిన సిరాజ్.. 12వ ప్లేసుకు చేరుకున్నాడు. అతడి ఖాతాలో 718 రేటింగ్‌ పాయింట్లు ఉన్నాయి.

ఇటీవల ఇంగ్లాండ్‌తో ఐదు టెస్ట్ మ్యాచ్‌ల సిరీస్‌లో సిరాజ్ అదిరే ప్రదర్శన చేశాడు. ఐదు మ్యాచ్‌లు ఆడి.. ఏకంగా 23 వికెట్లు పడగొట్టాడు. అహ్మదాబాద్‌లో వెస్టిండీస్‌తో తొలి టెస్టులోనూ ఫామ్‌ కొనసాగించాడు. రెండు ఇన్నింగ్స్‌లో కలిపి ఏడు వికెట్లు కూల్చాడు. దీంతో కెరీర్‌ బెస్ట్‌ రేటింగ్‌ పాయింట్లు సాధించాడు.

బ్యాటర్లలో రూట్‌దే అగ్రస్థానం..

ఐసీసీ టెస్టు బ్యాటర్ల ర్యాంకింగ్స్‌లో ఇంగ్లాండ్‌కు చెందిన జో రూట్ కొనసాగుతున్నాడు. టీమిండియా యువ ఓపెనర్‌ యశస్వి జైశ్వాల్‌ రెండు స్థానాలు కోల్పోయి.. టాప్‌-5లో చోటు కోల్పోయాడు. అతడు ప్రస్తుతం ఏడో స్థానానికి పడిపోయాడు. రిషభ్‌ పంత్‌ మాత్రం తన ఎనిమిదో స్థానాన్ని నిలబెట్టుకున్నాడు.

ఆల్‌రౌండర్లలో జడ్డూ భాయ్ హవా..

టెస్టు ఆల్‌రౌండర్ల ర్యాంకింగ్స్‌లో రవీంద్ర జడేజా అగ్రస్థానంలో ఉన్నాడు. వెస్టిండీస్‌తో తొలి టెస్టులో అతడు.. శతకంతో పాటు నాలుగు వికెట్లు తీసి.. ప్లేయర్ ఆఫ్ ది మ్యాచ్‌గా నిలిచాడు. వాషింగ్టన్‌ సుందర్‌ నాలుగు స్థానాలు ఎగబాకి పదకొండో ప్లేసుకు చేరుకున్నాడు.