దీపావళి బహుమతి! రైతుల ఖాతాల్లోకి రానున్న పీఎం కిసాన్ డబ్బులు

దేశవ్యాప్తంగా ఉన్న రైతులకు కేంద్ర ప్రభుత్వం మరోసారి శుభవార్త అందించింది. ప్రధాన్ మంత్రి కిసాన్ సమ్మాన్ నిధి (PM Kisan Yojana) పథకం కింద 21వ విడత నిధులను విడుదల చేయడానికి మోదీ ప్రభుత్వం సిద్ధమవుతోంది. ఇప్పటికే కొన్ని ప్రకృతి విపత్తు ప్రభావిత రాష్ట్రాల్లో రైతుల ఖాతాల్లో పీఎం కిసాన్ నిధులు జమ అయ్యాయి. ఇక మిగిలిన రాష్ట్రాల రైతుల ఖాతాల్లో కూడా దీపావళి పండుగ నాటికి ఈ నిధులు జమ అయ్యే అవకాశం ఉన్నట్లు సమాచారం అందుతోంది.ప్రతి సంవత్సరం రైతుల అకౌంట్లలో మొత్తం రూ.6,000 రూపాయలను మూడు విడతలుగా ప్రభుత్వం జమ చేస్తుంది. ఈ ఏడాది ఇప్పటికే రెండు విడతల రూపంలో రూ.4,000 రైతుల ఖాతాల్లో చేరగా, మిగిలిన రూ.2,000ను త్వరలో జమ చేయడానికి కేంద్రం ఏర్పాట్లు చేస్తోంది.పీఎం కిసాన్ యోజన పథకాన్ని వ్యవసాయం మరియు రైతు సంక్షేమ మంత్రిత్వ శాఖ సంయుక్తంగా ప్రారంభించింది. ఈ పథకం ప్రధాన ఉద్దేశం దేశంలోని రైతులకు నేరుగా ఆర్థిక సహాయం అందించడం. గతంలో 20వ విడత నిధులను ప్రధానమంత్రి నరేంద్ర మోదీ 2025 ఆగస్టు 2న వారణాసి నుండి విడుదల చేశారు. ప్రస్తుతం ఈ పథకం దేశవ్యాప్తంగా ఉన్న అన్ని అర్హులైన రైతులకు వర్తిస్తుంది.ఈ పథకం కింద నిధులు పూర్తిగా Direct Benefit Transfer (DBT) విధానంలో రైతుల బ్యాంక్ అకౌంట్లలో నేరుగా జమ అవుతాయి. ఈ డబ్బు రుణం లేదా సబ్సిడీ కాదు; ఇది కేంద్రం నుంచి అందించే ప్రత్యక్ష ఆర్థిక సహాయం. రైతులు ఈ మొత్తాన్ని వ్యవసాయ అవసరాలకైనా, లేదా వ్యక్తిగత అవసరాలకైనా వినియోగించుకోవచ్చు.అయితే, పీఎం కిసాన్ యోజన నిధులు ఆదాయ పన్ను చెల్లించే వారు, ప్రభుత్వ ఉద్యోగులు, అలాగే అధిక ఆదాయం కలిగిన రైతులకు వర్తించవు. ఈ వర్గాల వారు పథకానికి అర్హులు కారు.రైతులు తమ ఖాతాల్లో పీఎం కిసాన్ నిధులు జమ అయ్యాయా లేదా అని తెలుసుకోవడానికి అధికారిక వెబ్‌సైట్ pmkisan.gov.in ను సందర్శించాలి. హోమ్‌పేజ్‌లో ఉన్న “Farmers Corner” విభాగంలో “Beneficiary Status” అనే ఎంపికపై క్లిక్ చేసి, తమ ఆధార్ నంబర్ లేదా బ్యాంక్ అకౌంట్ నంబర్ నమోదు చేయాలి. వివరాలు సమర్పించిన తర్వాత డబ్బులు జమ అయ్యాయా లేదా అనే సమాచారాన్ని సులభంగా తెలుసుకోవచ్చు.