ప్రపంచంలో పొడవైన హైస్పీడ్ రైలు నెట్‌వర్క్‌ ఉన్న దేశాలు

ప్రపంచంలోని చాలా దేశాల్లో ప్రజా రవాణాకు రైళ్లు ఉపయోగపడుతున్నాయి. తక్కువ ధరతో.. ఎక్కువ దూరం, సుఖవంతమైన ప్రయాణం కోసం ప్రయాణికులు రైళ్లను ఆశ్రయిస్తూ ఉంటారు. విమానాల్లో వెళ్లే స్థోమత లేని సామాన్యులు.. ఎంత దూరం ప్రయాణించాలన్నా రైళ్లు ఎక్కుతూ ఉంటారు. ఈ నేపథ్యంలోనే ఆయా దేశాల్లో ప్రభుత్వాలు.. రైల్వే నెట్‌వర్క్‌లను దేశవ్యాప్తంగా విస్తరిస్తూ ఉంటాయి. అంతేకాకుండా ఇప్పటికే ఉన్న మార్గాల్లో హైస్పీడ్ రైళ్లను ప్రవేశపెడుతూ ఉంటాయి. హైస్పీడ్ రైళ్లు తీసుకురావడం వల్ల తక్కువ సమయంలోనే ఎక్కువ దూరంలో ఉన్న గమ్యస్థానాలకు ప్రయాణికులను చేర్చే వీలు ఉంటుంది. ఈ నేపథ్యంలోనే చాలా దేశాలు.. రైల్వేలను మరింత ఆధునీకరించి.. అత్యాధునిక సౌకర్యాలను ప్రయాణికులకు అందిస్తున్నాయి.

ఇక రైల్వే ప్రయాణికులకు మరింత వేగవంతమైన, సౌకర్యవంతమైన, పర్యావరణ అనుకూల ప్రయాణాలను అందించేందుకు ప్రపంచ దేశాల ప్రభుత్వాలు చర్యలు చేపడుతున్నాయి. ఇందులో భాగంగానే హైస్పీడ్ నెట్‌వర్క్‌లను వేగంగా విస్తరిస్తున్నాయి. ఈ హైస్పీడ్ రైల్వే వ్యవస్థలలో భాగంగా దాదాపు 65 కిలోమీటర్ల మేర విస్తరించి చైనా ప్రపంచ దేశాలకు అందనంత ఎత్తులో నిలిచింది. అన్ని దేశాల్లో ఉన్న హైస్పీడ్ నెట్‌వర్క్‌లు మొత్తం కలిపినా.. చైనాకు దగ్గర్లో కూడా లేకుండా ఉండటం గమనార్హం. ఇక స్పెయిన్, జపాన్, ఫ్రాన్స్, జర్మనీలు ఆ తర్వాత టాప్-5 స్థానాల్లో నిలిచాయి.

చైనా - 64,775 కిలోమీటర్లు

చైనా హై స్పీడ్ రైల్వే నెట్‌వర్క్ ప్రపంచంలోని మిగిలిన దేశాలన్నింటి కంటే చాలా పెద్దది. మొత్తంగా 64,775 కిలోమీటర్ల హై స్పీడ్ లైన్లను చైనా నిర్మించింది. ఇక 40 వేల కిలోమీటర్ల కంటే ఎక్కువ మార్గం ప్రస్తుతం ప్రయాణికులకు సేవలు అందిస్తోంది. వీటికి అదనంగా 13 వేల కిలోమీటర్లకు పైగా నిర్మాణం జరుగుతోంది. ఇక భవిష్యత్‌లో 11 వేల కిలోమీటర్లకు పైగా నెట్‌వర్క్‌ను విస్తరించేందుకు ప్రణాళికలు సిద్ధం చేశారు.

స్పెయిన్ – 5,579 కిలోమీటర్లు

స్పెయిన్‌కు చెందిన స్పానిష్ హైస్పీడ్ నెట్‌వర్క్ ప్రపంచంలోనే రెండో అతిపెద్ద హై స్పీడ్ రైలు నెట్‌వర్క్‌గా నిలిచింది. మొత్తంగా 5579 కిలోమీటర్ల మేర స్పానిష్ హైస్పీడ్ నెట్‌వర్క్ విస్తరించి ఉంది. మాడ్రిడ్ నుంచి సెవిల్.. బార్సిలోనా, వాలెన్సియా వంటి ప్రధాన నగరాలకు ఈ నెట్‌వర్క్ మార్గాలు విస్తరించి ఉన్నాయి. ఇక ఈ స్పానిష్ హైస్పీడ్ రైళ్లు అత్యంత సమయపాలన కలిగి ఉంటాయి. ఇవి స్పెయిన్‌లోని పర్యాటక ప్రాంతాలను సందర్శించేవారికి చాలా సౌకర్యవంతంగా ఉంటాయి.

జపాన్ – 3,677 కిలోమీటర్లు

జపాన్ షింకన్‌సెన్ లేదా జపాన్ బుల్లెట్ రైలు ప్రపంచంలోని అత్యంత అధునాతన నెట్‌వర్క్‌లలో ఒకటిగా గుర్తింపు పొందింది. 1964లో ప్రారంభమైన జపాన్ షింకన్‌సెన్.. ప్రయాణికులకు అత్యంత భద్రతకు ప్రాధాన్యం ఇస్తుంది. ఇప్పటివరకు 3677 కిలోమీటర్ల మేర జపాన్ హైస్పీడ్ రైల్వే నెట్‌వర్క్ విస్తరించి ఉండగా.. అందులో 3,081 కిలోమీటర్ల మార్గం ఆపరేషన్‌లో ఉంది. జపాన్ షింకన్‌సెన్ రైళ్లు ఎల్లప్పుడూ సమయానికి నడుస్తాయి. ఈ రైళ్లు 30 సెకన్లు ఆలస్యంగా నడిచినా.. అది ఆ దేశవ్యాప్తంగా తీవ్ర చర్చనీయాంశంగా మారుతుంది.

ఫ్రాన్స్ – 4,460 కిలోమీటర్లు

ఆధునిక హై స్పీడ్ రైలు వ్యవస్థకు మార్గదర్శిగా ఫ్రాన్స్ హైస్పీడ్ రైల్వే నెట్‌వర్క్‌ నిలిచింది. ప్రపంచంలోనే అత్యంత ప్రసిద్ధి చెందిన నెట్‌వర్క్‌లలో ఒకటిగా ఫ్రాన్స్‌ సేవలు అందిస్తోంది. ఫ్రాన్స్‌లో 4,400 కిలోమీటర్లకు పైగా హైస్పీడ్ రైల్వే నెట్‌వర్క్ విస్తరించి ఉండగా.. అందులో 2,735 కిలోమీటర్లు ప్రస్తుతం ఆపరేషన్‌లో ఉంది. ఈ ఫ్రాన్స్ హైస్పీడ్ రైల్వే నెట్‌వర్క్ రాజధాని పారిస్‌ నగరాన్ని ఫ్రెంచ్ ప్రధాన నగరాలతో పాటు అనేక అంతర్జాతీయ గమ్యస్థానాలను కలుపుతుంది. దశాబ్దాలుగా వేగం, కచ్చితత్వం, ఇంజనీరింగ్ నైపుణ్యానికి ప్రతీకగా నిలిచింది.

జర్మనీ – 2,009 కిలోమీటర్లు

జర్మనీ ఇంటర్‌సిటీ ఎక్స్‌ప్రెస్ నెట్‌వర్క్ ప్రపంచంలో ఐదో హైస్పీడ్ రైల్వే నెట్‌వర్క్ కలిగి ఉంది. ఈ జపాన్ ఇంటర్‌సిటీ ఎక్స్‌ప్రెస్ నెట్‌వర్క్ 2 వేల కిలోమీటర్ల కంటే ఎక్కువ హై-స్పీడ్ ట్రాక్‌లను కలిగి ఉంది. జర్మనీలోని బెర్లిన్, మ్యూనిచ్, ఫ్రాంక్‌ఫర్ట్, కొలోన్ వంటి ప్రధాన నగరాలను కలుపుతూ ఈ హైస్పీడ్ రైల్ నెట్‌వర్క్‌ విస్తరించి ఉంది. జపాన్ హైస్పీడ్ రైల్వే నెట్‌వర్క్ సరళీకృత డిజైన్, అధునాతన టెక్నాలజీ, ప్రయాణికులకు అందించే సౌకర్యాలపై ప్రశంసలు వెల్లువెత్తుతున్నాయి. అయితే ఎంతో చరిత్ర ఉన్న భారతీయ రైల్వేలు కూడా హైస్పీడ్ నెట్‌వర్క్‌ను దేశంలో విస్తరిస్తున్నప్పటికీ.. ఈ టాప్-5 దేశాల్లో మాత్రం చోటు దక్కించుకోలేకపోయింది.