ఒకే ఒక పొడి ఉంటే చాలు, తెల్ల జుట్టు కాస్తా నల్లగా మారుతుంది

ఈ రోజుల్లో జుట్టు నెరిసిపోవడం కేవలం వృద్ధాప్యానికి సంకేతం మాత్రమే కాదు. ఇది యువతలో కూడా ఒక సాధారణ సమస్యగా మారింది. పిల్లల్లో కూడా జుట్టు తెల్లబడటం మనం గమనిస్తూనే ఉన్నాం. జుట్టు తెల్లబడటానికి అనేక కారణాలు ఉండొచ్చు. కానీ చిన్న వయసులోనే తెల్ల జుట్టు వస్తే చాలా మంది ఆందోళన చెందుతారు.

చెడు ఆహారపు అలవాట్లు, ఒత్తిడి, కాలుష్యం, రసాయన జుట్టు ఉత్పత్తులు వాడకం వల్ల జుట్టు నెరిసిపోతుంది. మార్కెట్లో అనేక కెమికల్ డైలు అందుబాటులో ఉన్నాయి. ఇవి తాత్కాలికంగా తెల్ల జుట్టును నల్లగా చేస్తాయి. కానీ అధికంగా వాడటం వల్ల జుట్టు బలహీనపడి పొడిబారుతుంది. కెమికల్ ప్రొడక్ట్స్ వాడటం వల్ల జుట్టు నిర్జీవంగా మారుతుంది.

అందుకే ఈ రోజుల్లో తెల్ల జుట్టును నల్లగా మార్చుకోవడం కోసం ప్రతి ఒక్కరూ సహజమైన ఇంటి చిట్కాల కోసం చూస్తున్నారు. అలాంటి వారి కోసం ఒక బెస్ట్ రెమిడీని ఇక్కడ చెప్పుకుందాం. ఇంట్లోనే తెల్ల జట్టును నల్లగా మార్చే రంగును చేసుకోవచ్చు. ఇంట్లోనే నేచురల్‌గా హెయిర్ డైని ఎలా చేసుకోవాలో ఇప్పుడు తెలుసుకుందాం.

 ఉసిరి జుట్టుకు సిరి

ఈ హెయిర్ డైలో ప్రధాన పాత్ర ఉసిరిదే. ఉసిరిని శతాబ్ధాలుగా జుట్టును బలంగా మార్చడానికి, రంగును పెంచడానికి ఉపయోగిస్తున్నారు. ఇందులో విటమిన్ సి, యాంటీ ఆక్సిడెంట్లు, టానిన్లు పుష్కలంగా ఉన్నాయి. ఇవి సహజంగా జుట్టును నల్లగా మారుస్తాయి.

అంతేకాకుండా జుట్టు పెరుగుదలను ప్రోత్సహిస్తాయి. చిన్న వయసులోనే జుట్టు నెరసిపోకుండా నిరోధిస్తాయి. ఉసిరి పొడితో తయారు చేసే హెయిర్ డైలో ఎలాంటి రసాయనాలు, ఘాటైన వాసన ఉండదు. దీని వల్ల ఎటువంటి సైడ్ ఎఫెక్ట్స్ ఉండవు. తయారీ విధానంపై ఓ లుక్కేద్దాం.

కావాల్సిన పదార్థాలు

​ఉసిరి పొడి - రెండు టేబుల్ స్పూన్లు

హెన్నా పౌడర్ - ఒక టేబుల్ స్పూన్ (ఆప్షనల్)

ఇండిగో పౌడర్ - ఒక టేబుల్ స్పూన్ (మెత్తటి నలుపు రంగు కోసం)

కాఫీ పౌడర్ లేదా బ్లాక్ టీ - ఒక టీ స్పూన్

కొబ్బరి నూనె లేదా ఆముదం - ఒక టీ స్పూన్

కొన్ని చుక్కల నిమ్మరసం ( ఈ పదార్థాలు మార్కెట్లో ఈజీగా లభిస్తాయి. ఇంట్లోనే కొన్ని దొరుకుతాయి)

తయారీ విధానం

​ముందుగా శుభ్రమైన గిన్నెలో ఉసిరి పొడిని కొద్దిగా గోరు వెచ్చని నీటితో కలిపి మృదువైన, మందపాటి పేస్టును తయారు చేయండి. దానిని 15-20 నిమిషాలు అలాగే ఉంచండి. ఇది టానిన్‌ల్ని విడుదల చేయడానికి అనుమతిస్తుంది. ఇది రంగు ప్రభావాన్ని పెంచుతుంది.

ఆ తర్వాత మిశ్రమానికి హెన్నా, ఇండిగో పౌడర్లను జోడించండి. నలుగు రంగు ఎక్కువగా ఉండాలనుకుంటే ఇండిగో మొత్తాన్ని కొద్దిగా పెంచుకోవచ్చు.

ఆ తర్వాత టోన్ కోసం కాఫీ పొడి లేదా ఒక టీ స్పూన్ బ్లాక్ టీ కలపండి. ఆ తర్వాత కొన్ని చుక్కల నిమ్మరసం కలపండి. ఇది సహజ రంగుల్ని సక్రియం చేయడానికి సాయపడుతుంది.

ఇక జుట్టు పొడిబారకుండా నిరోధించడానికి ఒక చెంచా కొబ్బరి నూనె లేదా ఆముదాన్ని జోడించండి. మృదువైన చిక్కటి పేస్ట్ వచ్చేవరకు అన్నింటినీ బాగా కలపండి.

చివరగా గిన్నెపై మూత పెట్టి మిశ్రమాన్ని దాదాపు 30-45 నిమిషాలు అలాగే ఉంచండి. ఇలా ఉంచడం వల్ల సహజ రంగు సమ్మేళనాలు ఎక్కువగా అభివృద్ధి చెందుతాయని నిపుణులు అంటున్నారు.

అప్లై చేసే విధానం

​జిడ్డు లేదా మురికిని తొలగించడానికి ముందుగా జుట్టును తేలికపాటి షాంపూతో వాష్ చేసుకోవాలి. ఆ తర్వాత కండిషనర్‌ను ఉపయోగించవద్దు. ఎందుకంటే ఇది రంగును గ్రహించకుండా నిరోధించవచ్చు.

జుట్టును చిన్న విభాగాలుగా విభజించండి. అవసరమైతే క్లిప్‌లు లేదా హెయిర్ టైల్ని ఉపయోగించండి.

బ్రష్ లేదా మీ వేళ్లను ఉపయోగించి, ఉసిరి డై పేస్ట్‌ను వేర్ల నుంచి చివర్ల వరకు పూయండి. తెల్ల రంగు కవర్ అయ్యేలా అప్లై చేయండి.

ఆ తర్వాత జుట్టును షవర్ క్యాప్‌తో కవర్ చేయండి. లేదా పాత టవల్‌తో చుట్టండి. ఇది వెచ్చదనాన్ని నిలుపుకోవడంలో సాయపడుతుంది.

హెయిర్ డైను 1.5 నుంచి 2 గంటల పాటు అలాగే ఉంచండి. లోతైన టోన్ కావాలంటే జుట్టుపై డైని 3 గంటల వరకు ఉంచొచ్చు.

చివరగా పేస్ట్ పూర్తిగా పోయే వరకు జుట్టును సాధారణ నీటితో కడగాలి. వెంటనే షాంపూ వాడటం మానుకోండి. రంగు పూర్తిగా సెట్ అయ్యే వరకు కనీసం 24 గంటలు వేచి ఉండండి. ఆరిన తర్వాత మెరుపు, మృదుత్వం కోసం నూనెతో తేలికగా మసాజ్ చేసుకోవచ్చు.​

ఉత్తమ ఫలితాల కోసం చిట్కాలు

ప్రతిసారీ తాజాగా తయారుచేసిన పేస్ట్‌నే వాడండి. ఒక రోజు కంటే ఎక్కువ కాలం నిల్వ చేయొద్దు.

స్థిరమైన రంగు, మెరుపు కోసం ప్రతి రెండు నుంచి మూడు వారాలకు ఒకసారి రంగు వేయండి.

మీకు పొడి జుట్టు ఉంటే, నిమ్మరసానికి బదులుగా కొన్ని చుక్కల కలబంద జెల్ లేదా పెరుగు కలపండి.

డై సెషన్ల మధ్య ఉసిరి కలిపిన కొబ్బరి నూనెతో క్రమం తప్పకుండా మసాజ్ చేసుకోండి. దీంతో సహజ రంగు ఎక్కువగా కాలం ఉంటుంది.

మీకు అలెర్జీ ఉందో లేదో నిర్ధారించుకోవడానికి ఎల్లప్పుడూ ముందుగా ప్యాచ్ టెస్ట్ చేయండి.