AIతో గుడ్లు పగలగొట్టి స్విగ్గీని మోసం చేసిన యువకుడు.. నెటిజన్ల ఆగ్రహం!

ఆన్‌లైన్ షాపింగ్, క్విక్ కామర్స్ ప్లాట్‌ఫామ్‌లలో డ్యామేజ్డ్ ప్రొడక్ట్ వస్తే రీఫండ్ ఇవ్వడం సాధారణమైపోయింది. కానీ ఈ సదుపాయాన్ని దుర్వినియోగం చేస్తూ కొందరు మోసాలకు పాల్పడుతున్నారు. తాజాగా స్విగ్గీ ఇన్‌స్టామార్ట్ నుంచి గుడ్ల ట్రే ఆర్డర్ చేసిన ఓ వ్యక్తి, నిజంగా ఏమీ డ్యామేజ్ కాకపోయినా పూర్తి రీఫండ్ పొందడం సోషల్ మీడియాలో తీవ్ర చర్చనీయాంశమైంది. ఇదంతా ఓ చిన్న AI టూల్ సాయంతోనే సాధ్యమైంది.
ఆ వ్యక్తి ముందు స్విగ్గీ నుంచి వచ్చిన గుడ్ల ట్రే ఫోటో తీసుకున్నాడు. ఆ తర్వాత గూగుల్ యొక్క జెమిని నానో AI యాప్‌ను ఉపయోగించి, అదే ఫోటోలో గుడ్లు ఒక్కొక్కటిగా పగిలిపోయినట్టు ఎడిట్ చేశాడు. ఆ ఫేక్ ఫోటోను “ప్రూఫ్”గా కస్టమర్ కేర్‌కు పంపించి, వెంటనే పూర్తి మొత్తం రీఫండ్ పొందేశాడు. ఈ విషయం తెలిసిన వెంటనే సోషల్ మీడియాలో స్క్రీన్‌షాట్లు వైరల్ అయ్యాయి.
ఈ ఘటనపై నెటిజన్లు తీవ్ర ఆగ్రహం వ్యక్తం చేస్తున్నారు. “నిజంగా డ్యామేజ్ అయిన వాళ్లకు కూడా ఇకపై కంపెనీలు నమ్మకం కోల్పోతాయి” అంటూ ఒకరు కామెంట్ చేశారు. మరో నెటిజన్ “చిన్న మోసం అని అనొచ్చు… కానీ ఇలాంటివే పెద్ద మోసాలకు దారి తీస్తాయి” అని హెచ్చరించారు. చాలా మంది ఈ వ్యక్తి చేష్టలను తప్పుపట్టారు.
AI టూల్స్ ఇప్పుడు చాలా సులువుగా అందుబాటులో ఉంటున్నాయి. కానీ వాటిని సరైన ఉద్దేశంతో కాకుండా మోసాలకు వాడితే, నిజంగా అవసరం ఉన్న కస్టమర్లే నష్టపోతారు. స్విగ్గీ వంటి కంపెనీలు ఇకపై ఇలాంటి ఫేక్ ఫోటోలను గుర్తించేందుకు మరింత కఠినమైన వెరిఫికేషన్ ప్రక్రియ తీసుకొచ్చే అవకాశం ఉంది. ఈ ఘటన మరోసారి డిజిటల్ యుగంలో నిజాయితీ ఎంత ముఖ్యమో గుర్తు చేస్తోంది.