వరల్డ్ నంబర్ వన్ బౌలర్‌గా దీప్తి శర్మ,,,రెండో స్థానానికి స్మృతి మంధాన

టీమిండియా ఆల్ రౌండర్ దీప్తి శర్మ అరుదైన ఘనత సాధించింది. తన కెరీర్‌లో తొలిసారిగా ఐసీసీ మహిళల టి20 బౌలింగ్ ర్యాంకింగ్స్‌లో అగ్రస్థానానికి చేరుకుంది. ఇక దక్షిణాఫ్రికా కెప్టెన్ లారా వోల్వార్డ్ వన్డే బ్యాటర్లలో నంబర్ 1 స్థానాన్ని తిరిగి పొందింది. కాగా, ఇటీవల విశాఖపట్నంలో శ్రీలంకతో జరిగిన తొలి టీ20లో.. నాలుగు ఓవర్లలో 20 పరుగులు ఇచ్చి 1 వికెట్ తీనింది. దీంతో దీప్తి ఐదు రేటింగ్ పాయింట్లు సంపాదించి.. ఆగస్టు నుంచి అగ్రస్థానంలో ఉన్న ఆస్ట్రేలియా ప్లేయర్ అన్నాబెల్ సదర్లాండ్‌ను అధిగమించింది. ప్రస్తుతం ఒక పాయింట్‌తో అగ్రస్థానంలో ఉంది.

తాజాగా అప్డేట్ చేసిన ర్యాంకింగ్స్‌లో భారత స్టార్ట్ బ్యాటర్ స్మృతి మంధానకు నిరాశ ఎదురైంది. మొదటి స్థానం నుంచి రెండో ప్లేస్‌కు పడిపోయింది. స్వదేశంలో ఐర్లాండ్‌తో జరిగిన సిరీస్‌ తర్వాత దక్షిణాఫ్రికా కెప్టెన్ వోల్వార్డ్ తిరిగి అగ్రస్థానానికి చేరుకుంది. చివరి రెండు మ్యాచ్‌లలో సెంచరీలు బాదింది. దీంతో దక్షిణాఫ్రికా 3-0తో సిరీస్ క్లీన్ స్వీప్ చేసింది. ఈ పరుగుల పరంపర ప్రోటీస్ కెప్టెన్‌ను టాప్ రేటింగ్‌కు తీసుకెళ్లింది. దీంతో మంధాన రెండో స్థానానికి పడిపోయింది.

కాగా, శ్రీలంకతో జరిగిన మ్యాచ్ తర్వాత అరుంధతి రెడ్డి ఐదు స్థానాలు ఎగబాకి 36వ స్థానానికి చేరుకుంది. ఇక టీ20 బ్యాటింగ్ ర్యాంకింగ్స్‌లో.. ఐదు స్థానాలు ఎగబాకి 9వ స్థానానికి చేరింది.

శ్రీలంకపై ఆమె అజేయ అర్ధ సెంచరీ చేసింది. కాగా, టీ20 బ్యాటర్లో స్మృతి మంధాన మూడవ స్థానంలో ఉంది. ఇక షఫాలి వర్మ10వ ప్లేస్‌లో ఉంది.

మరోవైపు, దక్షిణాఫ్రికాకు చెందిన సునే లూయస్ వన్డే బ్యాటింగ్ ర్యాంకింగ్స్‌లో ఏడు స్థానాలు ఎగబాకి 34వ స్థానానికి చేరుకుంది. వన్డే ఆల్ రౌండర్లలో 11 స్థానాలు ఎగబాకి 22వ స్థానానికి చేరుకుంది. ఇక దక్షిణాఫ్రికాతో సిరీస్ కోల్పోయినా.. ఐర్లాండ్ ప్లేయర్ అర్లీన్ కెల్లీ.. వన్డే బౌలింగ్ ర్యాంకింగ్‌లో ఐదు స్థానాలు ఎగబాకి 27వ స్థానానికి చేరుకుంది. బ్యాటర్లు గాబీ లూయిస్, అమీ హంటర్ వరుసగా 18వ, 28వ స్థానానికి చేరుకున్నారు.

కాగా, మహిళల టీమ్ ర్యాకింగ్స్‌లో.. ప్రస్తుతం వన్డే, టీ20ల్లో ఆస్ట్రేలియా, ఇంగ్లాండ్, భారత్ వరుసగా మొదటి మూడు స్థానాల్లో ఉన్నాయి. ఇక వన్డేల్లో న్యూజిలాండ్ నాలుగో స్థానంలో ఉండగా.. టీ20ల్లో సౌతాఫ్రికా నాలుగో స్థానంలో నిలిచింది. మొత్తంగా ఈ ఐదేశాలు టాప్-5లో నిలిచాయి.