క్రికెట్ బోర్డునే కోర్టుకు,,,పంతం నెగ్గించుకున్న సౌతాఫ్రికా స్పిన్నర్ తబ్రేజ్ షంషి

చాలా క్రికెట్ దేశాల్లో బోర్డు ఎంత చెబితే అంతే. బోర్డు ఏ రూల్స్ విధిస్తే ఆ నిబంధనలు పాటించాల్సిందే. ధిక్కరిస్తే జట్టులో చోటు లభించకుండా నిషేధాజ్ఞలు విధిస్తారు. కానీ ఈ దక్షిణాఫ్రికా లెఫ్ట్ ఆర్మ్ స్పిన్నర్ తబ్రేజ్‌ షంషి మాత్రం అందుకు విరుద్ధంగా.. తన సొంత క్రికెట్ బోర్డుపైనే కోర్టులో కేసు వేశాడు. తనకు అంతర్జాతీయ టోర్నీల్లో అడటానికి అనుమతి ఇవ్వడం లేదని ఆరోపణలు చేశాడు. ఈ న్యాయ పోరాటంలో చివరికి బోర్డుపైనే విజయం సాధించాడు. ఈ మేరకు తాజాగా జోహన్నెస్‌బర్గ్ హైకోర్టు సంచలన తీర్పు ఇచ్చింది. తబ్రేజ్‌ వాదనలతో ఏకీభవించింది. అనంతరం క్రికెట్ సౌతాఫ్రికాను (CSA) మందలించి.. తబ్రేజ్‌కు అనుమతులు ఇవ్వాల్సిందిగా ఆదేశాలు జారీ చేసింది.

ఇదీ వివాదం..

మనకు ఇండియన్ ప్రీమియర్ లీగ్ (ఐపీఎల్) ఉన్నట్లే సౌతాఫ్రికాలో ఎస్ఏ20 పేరుతో టీ20 లీగ్ నిర్వహిస్తున్న సంగతి తెలిసిందే. అయితే అందులో భారత్‌కు చెందిన సన్‌రైజర్స్ హైదరాబాద్, ముంబయి ఇండియన్స్‌ వంటి ఫ్రాంచైజీలకు జట్లు కూడా ఆడుతున్నాయి. ఈ ఏస్ఏ20లో తబ్రేజ్ షంషిని ఎంఐ కేప్‌టౌన్‌ ఫ్రాంఛైజీ 5 లక్షల ర్యాండ్ల (సౌతాఫ్రికా కరెన్సీ)కు వేలంలో కొనుగోలు చేసింది. అయితే ఈ ఒప్పందంపై సంతకం చేసేందుకు తబ్రేజ్ షంషి నో చెప్పాడు. అంతేకాకుండా.. ILT20, BBL వంటి ఇతర లీగ్‌లలో ఆడేందుకు ఒప్పందాలు కుదుర్చుకున్నాడు. అయితే ఇలా బయట లీగ్‌ల్లో ఆడాలంటే.. సౌతాఫ్రికా క్రికెట్ బోర్డు అనుమతి తప్పనిసరిగా ఉండాలి. తబ్రేజ్‌కు ఆ అనుమతి ఇవ్వడానికి బోర్డు నిరాకరించింది. దీంతో షంషి కోర్టును ఆశ్రయించాడు.

సౌతాఫ్రికా క్రికెట్ (CSA)కు వ్యతిరేకంగా కోర్టులో పిటిషన్ దాఖలు చేశాడు తబ్రేజ్ షంషి. తనను ఇతర లీగ్‌ల్లో ఆడేందుకు బోర్డు అనుమతి ఇవ్వడం లేదని ఆరోపించాడు. మరోవైపు, బోర్డు నిబంధనల ప్రకారం.. ఎస్ఏ20 వేలంలో కొనుగోలు చేసిన ఏ ఆటగాడైనా తప్పనిసరిగా లీగ్‌లో ఆడాలని.. అయితే షంషి ఈ నిబంధనను ఉల్లంఘించాలని క్రికెట్ సౌతాఫ్రికా ఆరోపించింది. అందుకే నో అబ్జెక్షన్ సర్టిఫికెట్ ఇవ్వకూడదని నిర్ణయించుకున్నామని కోర్టుకు నివేదించింది.

ఈ పిటీషన్‌పై విచారణ జరిపిన కోర్టు.. ఇరు పక్షాల వాదనలు విన్నది. అనంతరం తబ్రేజ్ షంషికి అనుకూలంగా తీర్పు వెలువరించింది. క్రికెట్‌ సౌతాఫ్రికా వాదనను తోసి పుచ్చిన కోర్టు.. క్రీడాకారుడి జీవనోపాధిని అడ్డుకోకూడదని బోర్డును మందలించింది. షంషి 2024 అక్టోబర్‌లోనే బోర్డు సెంట్రల్ కాంట్రాక్ట్ నుంచి తప్పుకున్నాడని.. ప్రపంచవ్యాప్తంగా టీ20 లీగ్‌ల్లో ఆడేందుకే ఈ నిర్ణయం తీసుకున్నాడని పేర్కొంది. అందుకే షంషి విదేశీ లీగ్‌ల్లో పాల్గొంనేందుకు వీలుగా.. సౌతాఫ్రికా క్రికెట్ బోర్డు నిరభ్యంతర పత్రం ఇవ్వాలని ఆదేశాలు జారీ చేసింది. కాగా, తబ్రేజ్ షంషి భారత సంతతికి చెందిన ముస్లిం కుటుంబలో జన్మించాడు.