వయస్సు మీద పడటాన్ని ఆలస్యం చేసే వ్యాయామాలు

సాధారణంగా ఫిట్‌నెస్‌ అనగానే అందరూ బరువు తగ్గడం గురించి ఆలోచిస్తారు. అయితే మన చర్మం ఆరోగ్యంగా ఉండాలన్నా, వయసు పెరిగినా ముఖంలో ఆ మెరుపు తగ్గకుండా ఉండాలన్నా మనం చేసే వ్యాయామం చాలా కీలకం. వయస్సు పెరిగినా అలా కనిపించకుండా ఉండేందుకు, అలాగే ఆరోగ్యం కోసం కొన్ని వ్యాయామాలు చాలా మంచి ఫలితాలనిస్తాయి. అసలు ఏ వ్యాయామం ఎంతవరకు ఉపయోగపడుతుందో చెబుతూ ప్రముఖ డెర్మటాలజిస్ట్ డాక్టర్ ప్రియాంక రెడ్డి సోషల్ మీడియా వేదికగా ఒక వీడియో పోస్ట్ చేశారు. ఏ వ్యాయామానికి ఎంత రేటింగ్ ఇచ్చారో, ఎందుకు ఇచ్చారో ఇప్పుడు చూద్దాం.

స్ట్రెంత్ ట్రైనింగ్ మంచిది

డాక్టర్ ప్రియాంక రెడ్డి స్ట్రెంత్ ట్రైనింగ్‌కు 10/10 రేటింగ్ ఇచ్చారు. కండరాలు పెరిగినప్పుడు అది చర్మం సాగకుండా చూస్తుందని, ఎముకల బలానికి ఇది ఎంతో అవసరమని ఆమె పేర్కొన్నారు. యాంటీ ఏజింగ్ ప్రయోజనాలు పొందాలనుకునే వారు కచ్చితంగా వెయిట్ లిఫ్టింగ్ లేదా రెసిస్టెన్స్ ట్రైనింగ్ చేయాలని ఆమె సూచించారు.

దీని తర్వాత పైలేట్స్, ఫంక్షనల్ ట్రైనింగ్ రెండింటికీ 9 పాయింట్ల చొప్పున రేటింగ్ ఇచ్చారు. ఇవి శరీరాన్ని ఫ్లెక్సిబుల్‌గా ఉంచడమే కాకుండా కోర్ స్ట్రెంత్‌ను పెంచుతాయి.

నడక, యోగాకు ఎంతంటే?

​ప్రతిరోజూ చేసే వాకింగ్‌కు ఆమె 7 పాయింట్లు ఇచ్చారు. ఇది గుండె ఆరోగ్యానికి మంచిదే అయినప్పటికీ, కేవలం నడక వల్ల మాత్రమే యాంటీ ఏజింగ్ ప్రయోజనాలు పూర్తిస్థాయిలో లభించవని స్పష్టం చేశారు. అలాగే మానసిక ప్రశాంతత, శారీరక ప్రయోజనాల కోసం చేసే యోగాకు 8, స్విమ్మింగ్‌కు 8 రేటింగ్ ఇచ్చారు. ఈ రెండూ శరీరంలోని ఒత్తిడిని తగ్గించి హార్మోన్ల సమతుల్యతను కాపాడుతాయని డాక్టర్ అభిప్రాయపడ్డారు.

దేనికి ఎంత రేటింగ్?

యానిమల్ ఫ్లో: 8

హై ఇంటెన్సిటీ ఇంటర్వెల్ ట్రైనింగ్ (HIIT): 6-7

సైక్లింగ్: 6

రన్నింగ్: 4

జుంబా: 4

స్ట్రెచింగ్: 3

అధిక కార్డియోతో జాగ్రత్త!

కేవలం కార్డియో చేసే వారికి ఆమె మైనస్ రేటింగ్ ఇచ్చారు. ఎక్కువ సమయం కార్డియో చేయడం వల్ల ముఖంలోని కొవ్వు కరిగిపోయి, చర్మం త్వరగా ముడతలు పడే అవకాశం ఉంటుందని, దీనినే 'రన్నర్స్ ఫేస్' అంటారని ఆమె వివరించారు.

వ్యాయామం అనేది అన్ని రకాల కండరాలకు ప్రయోజనం చేకూరే విధంగా ఉండాలని ముఖ్యంగా యాంటీ ఏజింగ్ కోసం స్ట్రెంత్ ట్రైనింగ్‌ను నిర్లక్ష్యం చేయకూడదని ఆమె స్పష్టంగా చెప్పారు.

జీవనశైలి కూడా ముఖ్యమే

ఆరోగ్యకరమైన జీవనశైలితో పాటు సరైన వ్యాయామం ఎంచుకోవడం ద్వారా యవ్వనాన్ని కాపాడుకోవచ్చని డాక్టర్ వివరించారు. మీరు కూడా మీ వయసును బట్టి, శరీర అవసరాలను బట్టి డాక్టర్ సూచించిన ఈ రేటింగ్స్‌ను పరిగణనలోకి తీసుకొని మీ వర్కవుట్ ప్లాన్ సిద్ధం చేసుకోండి.