సిక్సులతో విరుచుకుపడ్డ వైభవ్ సూర్యవంశీ..,,,మళ్లీ సెంచరీ బాదిన టీనేజ్ సెన్సేషన్

ఇటీవల విజయ్ హజారే ట్రోఫీ 2025-26, అండర్ 19 ఆసియా కప్‌లో అద్భుత ప్రదర్శన చేసిన టీనేజ్ సెన్సేషన్ వైభవ్ సూర్యవంశీ.. దక్షిణాఫ్రికాతో జరుగుతున్న అండర్ 19 వన్డేలో కూడా కొనసాగిస్తున్నాడు. దక్షిణాఫ్రికాతో మూడు యూత్ వన్డే సిరీస్‌లో భాగంగా బెనోని వేదికగా జరిగిన మూడో మ్యాచ్‌లో మరో సెంచరీ బాదాడు. 74 బంతుల్లో 9 ఫోర్లు, 10 సిక్సులతో 127 పరుగులు చేశాడు. మరో ఓపెనర్ అరోన్ జార్జ్‌తో కలిసి 227 పరుగులు భాగస్వామ్యం నెలకొల్పాడు. అంతకుముందు జరిగిన రెండో యూత్ వన్డేలో.. కేవలం 15 బంతుల్లోనే హాఫ్ సెంచరీ బాది.. యూత్ వన్డే చరిత్రలో అత్యంత వేగంగా అర్ధ శకతం సాధించిన ప్లేయర్‌గా నిలిచాడు వైభవ్ సూర్యవంశీ.

 భారత యువ సంచలనం వైభవ్‌ సూర్యవంశీ ఫార్మాట్‌ అనే తేడా లేకుండా చెలరేగిపోతున్నాడు. ఆయుశ్ మాత్రే దూరమవడంతో దక్షిణాఫ్రికా సిరీస్‌లో భారత్ జట్టు కెప్టెన్‌గా వ్యవహరిస్తున్నాడు. కాగా, బుధవారం (జనవరి 7) జరిగిన మ్యాచ్‌లో టాస్ ఓడి బ్యాటింగ్‌కు దిగిన టీమిండియాకు.. ఓపెనర్లు ఆరోన్ జార్జ్ (118), వైభవ్ సూర్యవంశీ (127) మంచి స్టార్ట్ ఇచ్చారు. సౌతాఫ్రికా బౌలర్లను ఒక ఆట ఆడుకున్నారు. జార్జ్ ఫోర్లతో పరుగుల వరద పారించగా.. వైభవ్ సూర్యవంశీ సిక్సులతో విరుచుకుపడ్డాడు. ఫోర్ల కంటే ఎక్కువగా సిక్సులే బాదాడు ఈ చిచ్చరపిడుగు.

ఓపెనర్లు ఇద్దరు పెవిలియన్ చేరడంతో.. బరిలోకి దిగిన వేదాంత్ త్రివేది (34) కాస్త నిలకడగా ఆడాడు. ఈ క్రమంలో మైకెల్ బౌలింగ్‌లో క్యాచ్ ఇచ్చి డగౌట్‌కు చేరాడు. ఆ తర్వాత వచ్చిన హర్వన్ష్ పనగరియా (2) రనౌట్ అయ్యాడు. 40 ఓవర్లలే నాలుగు వికెట్లు కోల్పోయి 304 పరుగులు చేసింది టీమ్ఇండియా. ఈ సిరీస్‌లో ఇప్పటికే 2-0 తేడాతో భారత్ అధిక్యంలో ఉంది. కాగా, ఈ సిరీస్ అటు దక్షిణాఫ్రికాతో పాటు భారత్‌కు.. త్వరలో జరగబోయే సన్నాహకంగా ఉపయోగపడుతున్నాయి. జింబాబ్వే, నమీబియా వేదికగా జనవరి 15 నుంచి అండర్ 19 వరల్డ్ కప్ ప్రారంభం కానుంది.

మరోవైపు, ఇటీవలి కాలంలో వైభవ్‌ సూర్యవంశీ ప్రతి రెండు, మూడు ఇన్నింగ్స్‌లకు ఒక సుడిగాలి అర్ధ శతకం లేదా సెంచరీ నమోదు చేస్తున్నాడు. ఇప్పటికే ఈ యువ సంచనలం పలు రికార్డులు బద్దలుకొట్టాడు. ఇటీవల కాలంలో వైభవ్ సూర్యవంశీ సృష్టించిన రికార్డులు ఇవే.

వైభవ్ సూర్యవంశీ రికార్డులు ఇవే..

అతి పిన్న వయస్కుడైన ఐపీఎల్ ప్లేయర్

(14 ఏళ్ల వయసులో)సెంచరీ చేసిన అతి పిన్న వయస్కుడు. (పురుషుల లిస్ట్-ఏ క్రికెట్‌, ఐపీఎల్)

లిస్ట్-ఏ క్రికెట్‌లో అత్యంత వేగవంతమైన 150

టీ20 సెంచరీ చేసిన అతి పిన్న వయస్కుడు

యూత్ క్రికెట్‌లో అత్యంత వేగంగా సెంచరీ చేసిన భారతీయుడు (టెస్టుల్లో 58 బంతుల్లో, వన్డేల్లో 52 బంతుల్లో)

అండర్ 19లో సెంచరీ చేసిన అతి పిన్న కెప్టెన్