బిగ్ బాష్ లీగ్‌లో పాకిస్తాన్ ప్లేయర్‌కి అవమానం.. రిజ్వాన్‌ పరాభవంపై క్రమాన్ అక్మల్ ఫైర్

పాకిస్తాన్ స్టార్ బ్యాటర్ మొహమ్మద్ రిజ్వాన్‌కు బిగ్‌ బాష్ లీగ్‌లో జరిగిన అవమానం ఇప్పుడు క్రికెట్ వర్గాల్లో చర్చనీయాంశమైంది. ఆస్ట్రేలియాలో జరుగుతున్న బిగ్ బాష్ లీగ్ మ్యాచ్‌లో మెల్‌బోర్న్ రెనిగేడ్స్ యాజమాన్యం తీసుకున్న నిర్ణయం ఇప్పుడు పాకిస్తాన్ క్రికెట్ వర్గాల్లో పెద్ద చర్చకు దారి తీసింది. సిడ్నీ థండర్‌తో జరిగిన మ్యాచ్‌లో రిజ్వాన్‌ను మధ్యలోనే రిటైర్డ్ అవుట్ చేయడం తీవ్ర వివాదంగా మారింది.

 ఆ మ్యాచ్‌లో రిజ్వాన్ 23 బంతుల్లో 26 పరుగులు మాత్రమే చేశాడు. అతని స్ట్రయిక్ రేట్ తక్కువగా ఉందని భావించిన రెనిగేడ్స్ కెప్టెన్ విల్ సదర్లాండ్, రిజ్వాన్‌ను క్రీజ్ విడిచి వెళ్లాలని సూచించాడు. సాధారణంగా అరుదుగా కనిపించే ఈ వ్యూహాత్మక నిర్ణయం, రిజ్వాన్ స్థాయి ఆటగాడికి అవమానకరంగా ఉందని చాలా మంది అభిప్రాయపడుతున్నారు.

ఈ ఘటనపై పాకిస్థాన్ క్రికెట్ వర్గాల్లో తీవ్ర స్పందన వచ్చింది. ముఖ్యంగా సోషల్ మీడియాలో అభిమానులు, మాజీ క్రికెటర్లు ఈ నిర్ణయాన్ని తప్పుబట్టారు. కొందరు అయితే నిరసనగా రిజ్వాన్ బీబీఎల్‌ను మధ్యలోనే వదిలి పాకిస్తాన్‌కు తిరిగి రావాలని కూడా చెబుతున్నారు.

ఈ అంశంపై జీటీవీ స్పోర్ట్స్ చర్చలో పాల్గొన్న పాకిస్తాన్ మాజీ వికెట్‌ కీపర్ కమ్రాన్ అక్మల్, కీలక వ్యాఖ్యలు చేశాడు. షో హోస్ట్ మాట్లాడుతూ “రిజ్వాన్, బాబర్ స్ట్రయిక్ రేట్ గురించి మీరు ఎన్నోసార్లు మాట్లాడారు. ఇప్పుడు రిజ్వాన్‌కు జరిగింది ప్రపంచవ్యాప్తంగా ఎగతాళికి కారణమైంది. కొందరు అతను లీగ్ వదిలి ఇంటికి రావాలని కూడా అంటున్నారు” అని అన్నాడు.

దీనికి స్పందించిన కమ్రాన్ అక్మల్ “ఇలాంటి విషయం జరగకూడదు. రిజ్వాన్ మన దేశానికి అగ్రశ్రేణి ఆటగాడు, ఆల్రెడీ ప్రూవ్డ్ పర్ఫార్మర్. కానీ ఆధునిక లీగ్‌లు ఎంత వేగంగా ఆడుతున్నాయో కూడా అర్థం చేసుకోవాలి. ఇప్పుడు ప్రతి దేశం మోడ్రన్ క్రికెట్‌ను అనుసరిస్తోంది. ఆ స్టయిల్‌కు తగ్గట్టు ఆటగాళ్లు మారాల్సిందే. ఆస్ట్రేలియాలో క్రికెట్‌ను ఒక ప్రత్యేక కోణంలో చూస్తారు. ఐపీఎల్, ఐఎల్‌టిఎం20 లీగ్‌ల్లో కూడా ఇలాంటి వ్యూహాత్మక నిర్ణయాలు చూశాం” అని అన్నాడు.

తాజాగా ఐపీఎల్ 2025 సీజన్‌లో ముంబై ఇండియన్స్ ఆటగాడు తిలక్ వర్మను కూడా రిటైర్డ్ అవుట్ చేసిన ఘటనను అక్మల్ ప్రస్తావించాడు. “తిలక్ వర్మలాంటి కీలక ఆటగాడినే డగౌట్‌కు పిలిచారు. ఇవన్నీ మ్యాచ్ పరిస్థితుల ఆధారంగా తీసుకునే నిర్ణయాలే. కానీ రిజ్వాన్ తన భవిష్యత్తు గురించి ఆలోచించాలి” అని సూచించాడు.