'రోజూ నాన్న ముందే ఏడ్చేవాడిని' ఎమోషనల్ అయిన హర్షిత్ రాణా

టీమిండియా వైట్ బాల్ క్రికెట్‌లో కీలక ఆటగాడిగా రాణిస్తున్న హర్షిత్ రాణా కెరీర్ ఆరంభంలో ఎన్నో ఇబ్బందులు ఎదుర్కొన్నాడు. ప్రస్తుతం ఓడీఐల్లో అద్భుత ప్రదర్శనలతో ప్రశంసలు అందుకుంటున్న ఈ యువ ఆల్‌రౌండర్, తన కెరీర్ ఆరంభంలో ఎదుర్కొన్న కష్టాలను తాజాగా గుర్తు చేసుకున్నాడు. మెన్స్ లాకర్ రూమ్ పాడ్‌కాస్ట్‌లో మాట్లాడుతూ సెలక్షన్ రాకుండా గడిచిన రోజుల గురించి హర్షిత్ ఎమోషనల్ అయ్యాడు.

“ఇప్పుడు ఫెయిల్యూర్‌ను ఎలా హ్యాండిల్ చేయాలో నాకు తెలుసు. ఎందుకంటే, సెలక్షన్ రాకుండా గడిచిన చాలా సంవత్సరాలు నేను చూశాను. ట్రయల్స్‌కు వెళ్లేవాడిని.. పేరు రాకపోతే ఇంటికి వచ్చి రోజూ నాన్న ముందే ఏడ్చేవాడిని” అని హర్షిత్ భావోద్వేగానికి గురయ్యాడు. “ఇప్పుడు ఫెయిల్యూర్ అనేది నాకు భయంగా అనిపించదు. ఏదైనా వచ్చినా ఎదుర్కోగలను. ఒక దశలో నేను పూర్తిగా వదిలేయాలని కూడా అనుకున్నాను” అని అన్నాడు.

అయితే ఆ క్షణాల్లో తండ్రే తనకు అండగా నిలిచాడని హర్షిత్ స్పష్టం చేశాడు. “నేను వదిలేయాలని అనుకున్నప్పుడు కూడా నాన్న నన్ను ప్రోత్సహించాడు. అదే నన్ను ఇక్కడివరకు తీసుకొచ్చింది” అని చెప్పుకొచ్చాడు. హర్షిత్ రాణా ముఖ్యంగా వన్డే ఫార్మాట్‌లో టీమిండియాకు కీలక బౌలర్‌గా మారాడు. తన తొలి 13 వన్డేల్లోనే 23 వికెట్లు తీసి, 2025 సంవత్సరంలో భారత్ తరఫున అత్యధిక వికెట్లు సాధించిన బౌలర్‌గా నిలిచాడు. బౌలింగ్‌తో పాటు, లోయర్ ఆర్డర్‌లో బ్యాట్‌తో కూడా అవసరమైన రన్స్ చేయగల సామర్థ్యాన్ని చూపించాడు.

ఇప్పుడు ఈ యువ ఆటగాడికి మరో పెద్ద అవకాశం దక్కింది. స్వదేశంలో జరగనున్న టీ20 వరల్డ్‌కప్ 2026 కోసం ఎంపికైన 15 మంది జట్టులో హర్షిత్‌కు చోటు దక్కింది. ఇప్పటికే ఛాంపియన్స్ ట్రోఫీ 2025 విజయంలో భాగమైన హర్షిత్, ఏడాదిలోనే రెండు ఐసీసీ ట్రోఫీలు గెలిచే అవకాశానికి దగ్గరగా ఉన్నాడు. ఇప్పటివరకు ఆరు టీ20 మ్యాచ్‌ల్లో ఏడు వికెట్లు తీసిన హర్షిత్, పెద్ద టోర్నీలోనూ తన ముద్ర వేయాలని చూస్తున్నాడు.