కాంట్రాక్టుల విధానంలో కీలక మార్పులు తీసుకురానున్న బీసీసీఐ

ఆటగాళ్ల సెంట్రల్ కాంట్రాక్టుల విధానంలో కీలక మార్పులు తీసుకురావడానికి బీసీసీఐ సిద్ధమవుతున్నట్టు తెలుస్తోంది. కొత్త విధానం అమల్లోకి వస్తే, టీమిండియా సీనియర్ స్టార్లు విరాట్ కోహ్లీ, రోహిత్ శర్మ గ్రేడ్ 'బీ'కి పరిమితమయ్యే అవకాశం ఉందని బీసీసీఐ వర్గాల స‌మాచారం.అజిత్ అగార్కర్ నేతృత్వంలోని సెలక్షన్ కమిటీ, ప్రస్తుత కాంట్రాక్టుల నిర్మాణంలో మార్పులు చేయాలని బోర్డుకు ప్రతిపాదించింది. దీని ప్రకారం అత్యధిక పారితోషికం ఉండే 'ఏ+' (రూ.7 కోట్లు) కేటగిరీని పూర్తిగా రద్దు చేయాలని సూచించింది. దాని స్థానంలో ఏ, బీ, సీ అనే మూడు గ్రేడ్లను మాత్రమే కొనసాగించాలని ప్రతిపాదనలో పేర్కొంది. ప్రస్తుతం విరాట్ కోహ్లీ, రోహిత్ శర్మ కేవలం వన్డే ఫార్మాట్‌కు మాత్రమే ఆడుతున్నందున ఈ కొత్త విధానం ఆమోదం పొందితే వారిని గ్రేడ్ బీలో చేర్చే అవకాశాలున్నాయని సమాచారం.ప్రస్తుత కాంట్రాక్టుల విధానంలో గ్రేడ్ 'ఏ+' ఆటగాళ్లకు రూ.7 కోట్లు, గ్రేడ్ 'ఏ' వారికి రూ.5 కోట్లు, గ్రేడ్ 'బీ' వారికి రూ.3 కోట్లు, గ్రేడ్ 'సీ' వారికి రూ.1 కోటి చొప్పున బీసీసీఐ వార్షిక పారితోషికం చెల్లిస్తోంది. 2024-25 జాబితాలో రోహిత్, విరాట్‌లతో పాటు జడేజా, బుమ్రా 'ఏ+' కేటగిరీలో ఉన్నారు.మహ్మద్ సిరాజ్, కేఎల్ రాహుల్, శుభ్‌మన్ గిల్, హార్దిక్ పాండ్యా, మహ్మద్ షమీ, రిషబ్ పంత్ గ్రేడ్ ఏలో ఉన్నారు.టీ20 కెప్టెన్ సూర్యకుమార్ యాదవ్, అక్షర్ పటేల్, కుల్దీప్ యాదవ్, యశస్వి జైస్వాల్, శ్రేయాస్ అయ్యర్ గ్రేడ్ బీలో ఉన్నారు.గ్రేడ్ సీలో రింకూ సింగ్, తిలక్ వర్మ, రుతురాజ్ గైక్వాడ్, శివమ్ దూబే, రవి బిష్ణోయ్, వాషింగ్టన్ సుందర్, ముఖేశ్ కుమార్, సంజు శాంసన్, అర్ష్‌దీప్ సింగ్, ప్రసిద్ధ్ కృష్ణ, రజత్ పాటిదార్, ధ్రువ్ జురెల్, సర్ఫరాజ్ ఖాన్, నితీశ్‌ కుమార్ రెడ్డి, ఇషాన్ కిషన్, అభిషేక్ శర్మ, ఆకాశ్ దీప్‌, వ‌రుణ్ చ‌క్ర‌వ‌ర్తి, హ‌ర్షిత్ రాణా ఉన్నారు.