ఏపీలో కొత్త ఆర్వోబీ .. కేంద్రం గ్రీన్ సిగ్నల్...ట్రాఫిక్ కష్టాలకు త్వరలోనే చెక్

గుంటూరులో నిర్మిస్తున్న శంకర్ విలాస్ ఆర్వోబీ పనులు మరింత వేగం పుంజుకోనున్నాయి. భూమార్పిడి ప్రక్రియకు కేంద్రం నుంచి గ్రీన్ సిగ్నల్ వచ్చింది. ఈ విషయాన్ని కేంద్ర మంత్రి పెమ్మసాని చంద్రశేఖర్ వెల్లడించారు. గుంటూరులో భూ వినిమయ ప్రక్రియకు వేగంగా అనుమతి మంజూరు చేసినందుకు రైల్వే మంత్రి అశ్వినీ వైష్ణవ్, రైల్వే బోర్డు అధికారులకు పెమ్మసాని చంద్రశేఖర్ కృతజ్ఞతలు తెలియజేశారు. కేంద్రం నుంచి అనుమతి రావటంతో శంకర్ విలాస్ ఆర్వోబీ నిర్మాణ పనులు మరింత వేగంగా ముందుకు సాగుతాయని పెమ్మసాని చంద్రశేఖర్ వెల్లడించారు.

శంకర్ విలాస్ ఆర్వోబీ నిర్మాణంలో భాగంగా బొంగరాలబీడు వద్ద భూమార్పిడి కోసం ఏపీ ప్రభుత్వం రైల్వే బోర్డుకు ప్రతిపాదనలు పంపింది. 383.19 చదరపు అడుగుల రైల్వే బోర్డు స్థలానికి, గుంటూరు మున్సిపల్ కార్పొరేషన్‌కు చెందిన 1076.39 చదరపు అడుగుల భూమి ఇచ్చేలా ప్రతిపాదన చేశారు. దీనికి కేంద్రం నుంచి గ్రీన్ సిగ్నల్ రావటంతో పనులు జోరందుకోనున్నాయి.

మరోవైపు 98 కోట్ల రూపాయల వ్యయంతో గుంటూరులో శంకర్ విలాస్ ఆర్వోబీ నిర్మాణ పనులకు శంకుస్థాపన చేశారు. రెండేళ్లలోగా పనులు పూర్తి చేయాలని లక్ష్యంగా పెట్టుకున్నారు. 2025 సెప్టెంబర్ నెలలో శంకర్ విలాస్ పాత ఫ్లైఓవర్ కూల్చివేత పనులు ప్రారంభించారు. అయితే శంకర్ విలాస్ ఆర్వోబీ నిర్మాణానికి రైల్వే బోర్డుకు చెందిన కొంత స్థలం అవసరం కాగా.. ఇందుకు బదులుగా గుంటూరు మున్సిపల్ కార్పొరేషన్‌కు చెందిన భూమిని ఇచ్చేందుకు ప్రభుత్వం అంగీకరించింది. ఈ మేరకు రైల్వే బోర్డుకు ప్రతిపాదనలు పంపగా.. అక్కడి నుంచి గ్రీన్ సిగ్నల్ వచ్చింది

ఎన్నో ఏళ్ల కల..

మరోవైపు 1958లో శంకర్‌విలాస్‌ ఫ్లైఓవర్ నిర్మించారు. గుంటూరు తూర్పు - పశ్చిమ ప్రాంతాల మధ్య వారధిగా శంకర్ విలాస్ ఫ్లైఓవర్ పనిచేసింది. అయితే గుంటూరు శంకర్ విలాస్ ఫ్లైఓవర్ కాలక్రమంలో శిథిలావస్థకు చేరుకోవటంతో ఇబ్బందులు మొదలయ్యాయి. ఈ వంతెన మీదుగా రోజూ 50 వేల వరకూ వాహనాలు రాకపోకలు సాగిస్తుంటాయి. వంతెన కొద్దిగా దెబ్బతినటంతో ట్రాఫిక్‌ సమస్యలు మొదలయ్యాయి.ఈ నేపథ్యంలోనే శంకర్ విలాస్ వద్ద కొత్త ఆర్వోబీ నిర్మిస్తున్నారు. ఇందుకోసం 134 మంది నుంచి స్థలాలు సేకరించారు. అలాగే పాత వంతెన కూల్చివేశారు. రోడ్డుకు ఇరువైపులా వెడల్పు చేస్తున్నారు.