డిజిటల్ ఇండియా సమ్మిట్‌లో వింత పరిస్థితి.. ఏఐ వేదికపై ఏరులై పారుతున్న నగదు

డిజిటల్ విప్లవానికి కేరాఫ్ అడ్రస్‌గా నిలిచే 'డిజిటల్ ఇండియా'ను మరింత ప్రోత్సహించేందుకు కేంద్ర ప్రభుత్వం ప్రతిష్టాత్మకంగా నిర్వహిస్తున్న ఏఐ (AI) సమ్మిట్‌లో అనూహ్య ఘటన చోటుచేసుకుంది. దేశవ్యాప్తంగా టెక్నాలజీ ప్రాముఖ్యతను చాటిచెబుతున్న తరుణంలో, ఈ సదస్సులో యూపీఐ (UPI) సేవలు అందుబాటులో లేకపోవడం పెద్ద ఎత్తున చర్చకు దారితీసింది. అత్యాధునిక సాంకేతికతపై చర్చలు జరుగుతున్న చోట కనీస డిజిటల్ చెల్లింపులు లేకపోవడంతో సందర్శకులు అవాక్కవుతున్నారు.
సదస్సు ప్రాంగణంలో ఏర్పాటు చేసిన ఫుడ్ స్టాల్స్ వద్ద పరిస్థితులు 'డిజిటల్ ఇండియా' నినాదానికి భిన్నంగా ఉన్నాయి. అక్కడ వ్యాపారులు ఏకంగా ‘నో యూపీఐ.. నో కార్డ్.. ఓన్లీ క్యాష్’ అంటూ బోర్డులు పెట్టడం గమనార్హం. ప్రస్తుతం చిన్న టీ కొట్టు నుండి పెద్ద షోరూమ్‌ల వరకు యూపీఐ వాడుతున్న తరుణంలో, ఒక హై-టెక్ సమ్మిట్‌లో ఇలా నగదు మాత్రమే అడగడం అక్కడికి వచ్చిన ప్రతినిధులను, సామాన్యులను విస్మయానికి గురిచేస్తోంది.
దేశమంతా క్యాష్‌లెస్‌ ఎకానమీ దిశగా అడుగులు వేస్తున్న వేళ, ఈ సదస్సుకు వచ్చిన వారు కనీసం పర్సులు కూడా వెంట తెచ్చుకోలేదు. ఫోన్ ఉంటే చాలు ఎక్కడైనా చెల్లింపులు చేయవచ్చు అనే ధీమాతో వచ్చిన వారు, ఫుడ్ స్టాల్స్ వద్ద తిండి తిన్న తర్వాత నగదు చెల్లించలేక తీవ్ర ఇబ్బందులు పడ్డారు. జేబులో చిల్లర లేక, ఆన్‌లైన్ పేమెంట్లకు అవకాశం లేక చాలా మంది ఆహారం తీసుకోకుండానే వెనుదిరగాల్సిన పరిస్థితి ఏర్పడింది.
ఒకవైపు ప్రభుత్వం 'నో క్యాష్.. ఓన్లీ డిజిటల్' అంటూ విస్తృతంగా ప్రచారం నిర్వహిస్తుంటే, స్వయంగా కేంద్రం ఆధ్వర్యంలో జరుగుతున్న సదస్సులోనే సీన్ రివర్స్ అవ్వడంపై సోషల్ మీడియాలో విమర్శలు వ్యక్తమవుతున్నాయి. సాంకేతిక శిఖరాగ్ర సదస్సులో ప్రాథమిక డిజిటల్ మౌలిక సదుపాయాలు లేకపోవడం నిర్వహణ లోపమేనని పలువురు అభిప్రాయపడుతున్నారు. ఈ వింత పరిస్థితి డిజిటల్ ఇండియా లక్ష్యాలకు పూర్తి విరుద్ధంగా ఉందంటూ నెటిజన్లు పెదవి విరుస్తున్నారు.