హోలీ స్పెషల్.. నేడు స్టాక్ మార్కెట్లకు సెలవు.. ట్రేడింగ్ ఎప్పుడు మొదలవుతుందంటే?

రంగుల పండుగ హోలీని పురస్కరించుకుని దేశీయ స్టాక్ మార్కెట్లు నేడు లావాదేవీలకు విరామం ప్రకటించాయి. దేశంలోని ప్రధాన ఎక్స్‌ఛేంజీలైన నేషనల్ స్టాక్ ఎక్స్‌ఛేంజ్ (NSE), బాంబే స్టాక్ ఎక్స్‌ఛేంజ్ (BSE) ఈరోజు పనిచేయవు. దీనివల్ల ఈక్విటీ డెరివేటివ్స్, సెక్యూరిటీస్ లెండింగ్ అండ్ బారోయింగ్ (SLB) విభాగాల్లో ఎలాంటి ట్రేడింగ్ జరగదు. ఇన్వెస్టర్లు మళ్ళీ రేపటి వరకు వేచి చూడాల్సిందే.
సాధారణంగా ఉదయం నుంచే సందడిగా ఉండే దలాల్ స్ట్రీట్, ఈరోజు హోలీ వేడుకల కారణంగా నిర్మానుష్యంగా మారింది. అయితే కరెన్సీ డెరివేటివ్స్ విభాగంలో కూడా ట్రేడింగ్ నిలిచిపోయింది. గడిచిన కొద్ది రోజులుగా మార్కెట్లో నెలకొన్న ఒడిదుడుకుల మధ్య, ఇన్వెస్టర్లకు ఈ సెలవు ఒక చిన్న విరామంగా భావించవచ్చు. మంగళవారం యథావిధిగా మార్కెట్లు ప్రారంభమై, ట్రేడింగ్ కార్యకలాపాలు తిరిగి పుంజుకోనున్నాయి.
కమోడిటీ మార్కెట్ విషయానికొస్తే, మల్టీ కమోడిటీ ఎక్స్‌ఛేంజ్ (MCX) ఉదయం సెషన్‌లో మూతపడి ఉంటుంది. కానీ ఇన్వెస్టర్లకు వెసులుబాటు కల్పిస్తూ సాయంత్రం సెషన్‌లో అంటే సాయంత్రం 5:00 గంటల నుంచి రాత్రి 11:30 గంటల వరకు ట్రేడింగ్ నిర్వహించనున్నారు. బంగారం, వెండి వంటి లోహాలపై పెట్టుబడులు పెట్టేవారు ఈ సమయాన్ని ఉపయోగించుకోవచ్చు. అంతర్జాతీయ మార్కెట్ కదలికల ఆధారంగా సాయంత్రం ట్రేడింగ్ కొనసాగుతుంది.
ఈ మార్చి నెలలో స్టాక్ మార్కెట్లకు మరికొన్ని సెలవులు కూడా లైన్లో ఉన్నాయి. హోలీ తర్వాత ఈనెల 26వ తేదీన శ్రీరామనవమి సందర్భంగా, అలాగే 31వ తేదీన మహావీర్ జయంతి సందర్భంగా మార్కెట్లకు సెలవు ప్రకటించారు. అంటే ఈ నెలలో ట్రేడింగ్ రోజులు తక్కువగా ఉండటంతో, ఇన్వెస్టర్లు తమ పెట్టుబడి ప్రణాళికలను ఈ సెలవుల క్యాలెండర్‌కు అనుగుణంగా మార్చుకోవాల్సి ఉంటుంది.